Iesus Uqa Haun Ehelawe Ifan Bileaugu Nuea
Del Ifan uqa Iesus almec gude tulidean aieanahgu hogu, Iesus uqau ewel oc dana elis hoale ocobehi taun hoil utuqanu niean hogu nuehianah. Sain hoale ocobe nuehianahgu, hoale Iesus deweugu elaci alesoan houqacan totqeqehi nuehianah. Hoale isdehian ho Iesus uqa ho, uqa gugufu uqa Mesaia ec ho dohianah, odan hoqa, uqa qecian almeanah. Ois qil qa, aid hoage uqa ehelawe eawac bilea ec madeinah. Hoale etacub haqacan bahin wawalai cefecun ho qei dohianah.
Ois Iesus uqa hoale gemacu alesoafa, uqa hananme hoalecai hi obeinah, odan hoqa, hoale uqa ec ho qei fe dohianah. Uqa hoale elacicin mamade odehian houqacan ocolialeanah. Odan hoale del ganicif wele hedean hogu, elcel benben unug Iesus uqaugu aladesion houqacan hoale uqa maudehianah. Hoale uqa hoil gude faheal hocon, uqa Ierusalem hogu elaci alesoan houqacan qei doa hocon maudewa ec ho dohianah.
Odean Iesus uqa Ifan uqau legu Mesaiacan ade madea ho, uqa ho gug uqau qatane silide madaleanah. Uqa Ifan uqau le ahun madec dana hoage mamadeic, Mesaia uqa esi dain ben bahin efefeb, uqa qebil almeian, oda hoqa, uqa esi del ietgu uqa haun ehelawe aieian ec madein houqa, uqa hoale isdec ohian dahialai batawe aleanah. Sain hoage faheic taun dana elis hoale esi hogu niehian ec made dohian hogu alesoin houqa wele kesikes soanah.
Dana elis hoale Iesus uqa hoalecai nieian ec ho maudehianfe, uqa ode odeanah. Sain hoage lehiw eli lec ho lenigan bileinahgu, Iesus uqa bret qei agoc unica hoil oafa, uqa houqacan Ifan heiteca ec maudeafa, uqa houqa feneanah. Qei giec, hoale uqa Iesus ec ho mecide fe dohianah. Odan hoqa, sain hogucut bahin, hoale fefehian uqa hoale amalai fale lasideanah.
Dana elis hoale dodo hoil maudean maudean ehianah, “He ho Iesus! Ode hocon sain uqa Ifan uqau le ho gug uqau qatane silide maileahgu ho, ile wawile ho ben ode aieah!” Ode qei giec bahin, hoale ehelawe waldehi Ierusalem nuehianah. Odan sain hoale nue alewahiafa, hoale ewel oc dana hoage madadehianah, “Iesus uqa eawac bilea! Ile uqa fewah!”
Odean, sain ewel oc dana hoage le houqacan mamadecian, qei giec bahin Iesus uqa lo faman wauqan qetec niea hogu, uqa hoageugu amasac alesoafa uqa madeanah, “Age wawa meu nieale!” Ois ewel oc dana hoage uqa dol ec ho isdeinah. Odan hoqa, Iesus uqa madeanah, “Age elacicin cucumuniec wawa elis mecia? Age isa lebenicai faimi meciadecie. Isa qa dewenicai, odan dol hoage qa dewenacai qitigi!” Uqa dol qe ec ho, uqa hoage gugufu ec doudenigan hocon, uqa hoage elaci hoil utebil leian hocon uqa hoage ocoliadeanah. Odan hoage ac wagude hoil, namec niean houqa fenec niean ho utecian uqa leanah.
Ode Iesus uqa madeanah, “ Ifan uqau legu isacan louqec niea ho, unug esi ihoc mudec alesoian ec ho isa age madadinah.” Odede uqa hoage Ifan uqau le houqau gug ho donigan hocon, uqa hoageu isdec ho fiage adeanah. Ode uqa madeanah, “Mesaia uqa esi dain ben bahin efeian, ode uqa almeian, ode uqa del ietgu almec gude haun ehelawe aieian ec madec ho, weleu weleu bahin louqein ho niea."
“Ifan uqau le louqadec niea hogu, le louqec hoilafa niea hoqa ho, dana aid unug hoage qisol meadec hoageuan agase adede houqacan qei isdewanmefe ho, hoage qisolmec ho cuculeic wawa falidenigan ec ho, isau ewel oc dana hoage esi dana aid le ho amasac sacadenigan ec niea. Hoage esi Ierusalem hogu hananmeic ho odenigan, odeciafa, hoage dana aid am filfil gude masa masa unug nieadecia hogu, hoage hoageugu nuadenigan. Age elcel he alesocian ama usugu fein houqacan amasac madenigan niea.”
Del 40 ho niean ho iacul Iesus uqa sain maticai, uqa ewel oc dana uqadeu hoageugu uqa amasacme alesoanah. Sain hoil, uqa dana aid haniwadec 500 holimdec hoageugu hofa, uqa sain osahigu adi, ihocnanan adi, uqa hoageugu amasacme alesoanah! Uqa hi maticaigu, uqau ewel oc dana hoage uqa gugufu eawac bilea ec ho fenigan hocon ifacadeanah, ode uqa Ifan uqau ilo king bilec houqacan ho iwaladeanah.
Iesus uqa ewel oc dana uqadeu hoage madadeanah, “Elcel unug hau ohisdecai, mil gude ho unug isa adi ihoc facalisani nieian ec iteanah. Odan mil gude uqau gagadi odec ho unugcai, ho unug woladec ho gagadi odec isa adi itec niea. Hocon age nueic dana aid am filfil gude ho unug, Mem wenigucai, Melah wenigucai, Kis Gun wenigu, hoage wa loadec adedeic, elcel unug isa totodec odenigan madadin houqa, age hoage hoqa totodec odenigan ho iwaladebil, hoage ewel oc dana isadeu alesonigan. Isdeic docie, isa esi gaid ode agecai bileigan.”
Iesus uqa almec gude aieanafa del 40 oan, uqa ewel oc dana uqadeu hoage madadeanh, “Age Ierusalem hogu bibilebil nueb, sain Kis Gun uqa agecai faheian hogu ho, Mem uqa age gagadi odec adeian.” Odeafa Iesus uqa hau ohis teanah, odan tain hoil uqa lokumudeanfe hoage uqa qei feinah. Iesus uqa elcel unugun ho, uqa ilo bile ofdeian hocon, uqa Ifan uqau leben meulifain houqa uqa bileanah.
Ifan uqacan totqec louqec heqa: Metiu 28:16-20; Mak 16:12-20; Luk 24:13-53; Ion 20:19-23; Aposel 1:1-11 hogude