Iesus Kotgu Mulecia

Ois, wi tu gemacu hogu, fan adec dana hoage Iesus mehuleic, hoage ihanec ilo dana ben houqau logu nueinah, odeb, ihanec ilo dana ben uqa Iesus ocolideian. Odan Pita uqa ehna sibacul acanamcai hoage gatina otiwewe totoade faheanah. Sain hoage Iesus mehuleic lo iacul wawacian, Pita uqa sibelu lai ianahgu hogu uqa lai tataculean nieanah.

Odan lo iacul hogu qa, Iuda hoageu hanuqec ilo dana hoage qa Iesus kotgu muleinah. Hoage leih uqacan ulec le menigan hocon hoage matibahin mehadeic soinah. Odan hoqa, hoage le ho meadein houqa ho le hoage osahigu adi qei soinah. Ode hocon, Iuda hoageu hanuqec ilo dana hoage, le hoil uqa deweu lecai ec ho ifaiean ho, hoage le hoil qei mecideinah. Iesus uqa le hoil qei madel.

Odan nuean unug qeimecgu qa, ihanec ilo dana uqa dodo uqa gul Iesus mecidulele uqa maudeanah, “Ina Mesaia, odan ina Ifan eawac bilea ho ina uqa Melahcaf ho ina maigece?”

Odan Iesus uqa madeanah, “Io hoqa Isa, odeb isa esi Ifancai bibileu, isa hau ohis fafahemin age esi feitenigan.” Odan ihanec ilo dana uqa gemag bean, deweu launec loto uqadeu ho basiladede, uqa Iuda cufu houqau hanuqec ilo dana odacat hoage utae madadeanah, “Ige in hoil ehele so le uqau ho meian hocon ub isdemunac! Uqa Ifan melah ec ho mamadean age dahmeciah. Ageu gehilec ho ade?”

Iuda hoageu ufu hogude hanuqec ilo dana hoage unug ihanec ilo dana ho maudeinah, “Uqa ihocun almeian!” Odeciafa, hoage Iesus amug ahiteinah, ode uqa ifole qeinah, uqa qeqeic uqa igaudeinah.

Odedean sain Pita uqa lo sibelu humade tatawean, abi aid hoil uqa Pita feafa maudeanah, “Inafa ho Iesuscai bilenah!” Odan Pita uqa hoqa qei duga ec madeanah. Odan sain nag ode nueanafa, aid hoil uqa ehele le houqacat adi Pita maudeanah. Odan Pita uqa haun ehele hoqa qei duga ec madeanah. Odean ho unug itqecgu qa dana aid hoage madeinah, “Ige doqa ina Iesuscai obehianah, elacin, ale ilam ale Galilide adi.”

Odean Pita uqa le uqau houqa gagadi mumude uqa madeanah, “Isa dana heuqa doudicacai mefe ho, Ifan uqa ois isa geldec iteian.” Odan qei giec bahin madu manafal hoil eweanafa, Iesus uqa waldeafa Pita meciduleanah.

Odan Pita uqa alewa nueafa, uqa ben bahin wacu dodoan qaleanah. Ho odedean, Iudas dana uqa Iesus maumudec ad lebenagu meanahcai ho uqa fean ho, Iuda hoageu hanuqec ilo dana hoage, Iesus uqa ois almeian ec ho madecian ho fean hocon, Iudas uqa wacu ben bahin dodoan uqa alewa nueafa uqa deweu qeanah.

Odan etenangu eteu weleu, Iuda hoageu hanuqec ilo dana hoage Iesus mehuleic Pailatcai wainah. Pailat uqa ho, uqa Rom gabman uqau hatu houqa ofdec uqa gabman ilo hogu bileanah. Ois hoage doin ho, Pailat uqa esi Iesus uqa deweu lecai hocon uqa ois qebil almeian ec madeian ec hoage ho doinah. Ois Pailat uqa Iesus ocolideanah, “Ina Iuda ageu king a?”

Odan Iesus uqa walde maudeanah, “Ina madecal ho ode adi, oda hoqa, isau ilo bilec houqa ho milgu ilo bilec houqa niea ho iwe qe. Ois ode mehul ho, isau ewel oitec dana hoage esi isacan memeic fan adebih. Isa mil hegu sun hoqa ho isa Ifan uqau gugufu le houqa madeigan hocon sunah. Dana aid unug ini hoage gugufu le houqacan wawa nieacai hoage ho, hoage isau le dahmeciacai.” Odan Pailat uqa madeanah, “Elaci haqa ho gugufu le?”

Ois Pailat uqa Iesus le maude hedeafa, uqa alesoafa dana aid am ho niean hogude ho madadeanah, “Isa mecidical ho, dana heuqa ho deweu lecai qe.” Odan hoqa, Iuda hoageu hanuqec ilo dana hoagecai, dana aid am ho niean ho hoage utaeinah, “Uqa na babalecgu qebil alme!” Odan Pailat uqa walde madeanah, “Uqa deweu lecai qe!” Odan hoqa, hoage ho bencai ode utaeinah. Odean Pailat uqa le made ietdeanah, “Uqa deweu lecai qe!”

Ode Pailat uqa dana aid am ho niean ho, hoage adociec hoil ub osobilac hocon uqa cumunieanah. Ode hocon uqa fan adec dana hoage Iesus na babalecgu qenigan ec ho uqa ois ec madeanah. Odan Romde fan adec dana hoage Iesus wakidedeic, hoage uqa king ageu lotocai ec ho uqa launudedeic, hoageking ageu galab gatinagu bileacai hondeg houqa ho, hoage etacub duduncaigu mudeciafa, hoage houqa tean Iesus gatigu launudeinah. Odeciafa hoage uqa igaudedeic madeinah, “Fecie, Iuda ageu king!”

Ifan uqacan totqec louqec heqa: Metiu 26:57-27:26; Mak 14:53 -15:15; Luk 22:54-23:25; Ion 18:12-19:16 hogude