Iesus Uqa Ehelawe Faheian

Iesus uqa Mesaia, odan, mil he unug gude dana aid hatu filfil gude matibahin hoage wele Iesus le meu bahin houqa dahmemecian bean wele 2,000 iar oa. Odan wawa cefec tamanec houqa ode benmeme niea. Iesus uqa mil he unug hegude elcel unug qeimeian sain hogu, uqa ehelawe faheian ec ho uqa le made qel qeteanah. Odeaqa qa qei ehelawe fahec niea hoqa, uqa esi le made qel qetec uqau houqa ho ihoc mudeian.

Sain ige ede Iesus uqa ehelawe faheian ec ho humudede bilecungu ho, Ifan uqa ige gun bilecuncai, ode houqa ho uqa binainig meu nieian hi hogu bilecun ho uqa galedea. Uqa ige uqau king ilo bilec houqacan hofa, ige odacat madadecun hoconafa uqa galedea. Sain Iesus uqa milgu bileanahgu uqa madeanah, “Isau ewel oc dana hoage esi mil he unug gude hatu filfil unug hogude dana aid, hoage Ifan uqau ilo bilec houqacan meu le houqa sacadebilafa, ois sain qeimec houqa soian.”

Dana aid am filfil gude matibahin hoage Iesusun ho qei dahmec oia odecet bilecia. Iesus uqa hau ohis qei nuec bibile, uqa Kristen hoage le meu bahin heuqa, hoage dana aid ini qei bahin dahmec bileciacai hoage amasac le sacadenigan hocon madadeanah. Uqa madeanah, “Nueic dana aid am filfil gude ho unug hoage isau ewel oc dana aid bilenigan oadecie!” Ode uqa edefa madeanah, “Abi aben hoage ho eli walme nea!”

Iesus edefa madeanah, “Abi mel uqa ho, uqa Ilo Dana Ben uqau ho qei holimde uqa dana ben bileacai. Mil he unug hegude uqau ilo dana benben wenimacai hoage isacan wawa qei niniean, hoage isa gegehilciteinah iwe odecet adi, hoage esi agefa isacan bahin dewa dain uteteic, age aqebil almenigan. Gugufu, age mil he unug hegu ho esi dain cefenigan, odedebafa, age kat gagadi tawecie elacin, Satan uqa mil he unug heuqau ilo bile ofdea houqa isa uqa qigan qeimeanah. Age ode isacan adi bibilebil nueb sain qeimecgu alewafe, Ifan uqa esi age besade omeadeian!”

Iesus uqa ewel oc dana uqadeu hoage, elcel unug mil he unug hegude ho qeimec sain hogu, elaci ade esi dana aid hoagecai nieian ec ho, uqa hoage qatane donigan ecgu uqa le hoil tot aqeanah. Uqa madeanah, “Dana hoil uqa eli ebeh aci meu bahin houqa, uqa abi uqaugu cefeanah. Odan sain uqa huniniean, uqau ad fiac uqa soafa, uqa wit aci nieanahgu hogu, uqa gig meuqe aci hofa cefadeanah, odeafa uqa wa nueanah.”

“Sain elcel aci ho qage becianafa, dana houqau abi mel hoage madeinah, ‘Ilo igeu, ina eli ebeh aci meu bahin houqa ina abi hogu cefenah. Hocon qa, gig meuqe hoage qa elacicin iacul hogu niecia?’ Ilo hoageu uqa hoage madadeanah, ‘Afagu ad dana hoil uqa ho cefadeanah.’”

“Abi mel hoage waldeic ilo dana hoageu maudeinah, ‘Ige ois gig meuqe ho aciteadecun a?’ Ilo dana uqa madeanah, ‘Qec, ona age ho odefeic, age wit leihafa esi acitadenigan. Age ulebil nueb eli walmec acitec sain hogu qa ois, age gig meuqe hoage qa namadebil ienigan hocon, age toaqeic hoilgu adi memeadeic qa, age wit meu qa oade fale nueic, abi abengu lo isau benahiac eli ud meadican bileciacai hogu meadenigan.’”

Iesus uqau ewel oc dana hoage le totqec houqau gug ho qei doinah. Hocon hoage Iesus uqa le totqec houqau gug ho qatane madadeian ocolideinah. Odan Iesus madeanah, “Dana eli ebeh aci meu bahin cefeancai houqa ho Mesaiacan madea. Abi oc aben houqa ho mil he unug hegucun madea. Eli ebeh aci meu bahin houqa ho, dana aid hoage Ifan uqau ilo bilec hogu bileciacai hoagecen madea.”

“Gig meuqe hoage qa, ho dana aid ini gagatu gude meuqec houqauan bileutecia hoagecen madea. Ad fiac in uqa gig meuqe cefadean houqa ho Satan. Eli walmean acitec sain houqa ho, elcel unug mil he unug hegude ho qeimeian sain houqacan madea. Odan, eli walmean acitec dana hoage qa ho Ifan uqau engel hoagecen madea.”

Sain mil he unug heuqa qeimeian hogu, engel hoage esi dana aid unug Satan uqauan bileutecia ho unug oade faheic, lai iec belinag iegogowe nie hogu tahuladebil nonigan, odeb hoage esi hogu dain ben bahin efefeic, hoage euweweic aina kikiwacudenigan. Odeb tutu obec hoage qa esi Ifan uqau ilo bilec hogu bibileic, hoage esi cam uqau fulacdec iwe hoage ie fulacdenigan.

Iesus uqa mil he unug hegude elcel unug qeimeian sain soian ninieb bahin hogu, uqa esi mil he unug hegu ehelawe faheian ec hofa madeanah. Uqa esi nueanah iwe odecet bahin uqa ehelawe faheian. Ode ho, uqa esi deweu ganaccai uqa hau ohis taingu faheian. Iesus uqa ehelawe faheian sain hogu, Kristen hondeg almein hoage esi almec gude ehelawe aieciafa, hoage hau ohis hogu Iesuscai febfebcenigan.

Odebafa, Kristen hondeg qei almec bilecia hoage qa esi aie hau ohis teciafa, hoage Kristen fialacil almec gude aie tein hoagecai gabandenigan. Hoage unug esi Iesuscai hogona bilenigan. Ho hedebafa, Iesus uqa esi dana aid uqadeu hoagecai, hoage wawa malol itomom adi niecgu bilenigan, odeb hoage wawa osahime bilecgu hoage gaidgaidun ode bilenigan.

Iesus uqa dana aid ini uqacan wawa cefecia ho, uqa esi hoage houqacan amug adeian. Hoage esi Ifancai eawac bibileic, hoageu bilec Ifancai wawa meu niec meu bahingu bilec houqa ho esi gaidgaidun ode nieian.

Odedeqa Ifan uqa esi dana aid ini hoage Iesusun qei wawa cefecia ho, uqa esi hoage unug gehimade feadeian. Uqa esi hoage hadesgu tahuladeb nociafa, hoage esi hogu gaidgaidun ode hoage dain meuqe ben bahin ho efefeic, hoage qaqaleic, aina kikiwacudedeic bilenigan. Lai iec hoil, houqa qei afileacai hoqa esi gaid ode hoage ciciade nieian, odeb mamat esi hoage dewena lenigan ho qei ulebilac.

Sain Iesus uqa ehelawe faheian hogu, uqa esi Satan uqacai, ilo bilec uqau ho unug bahin qeb qeimebcaiteian. Iesus uqa esi Satan tahuleb hadesgu nobafa, hogu uqacai, dana aid ini hoage Ifan ou totode odecun uculeic qa, hoage Satan totodenigan hocon gawoin hoagecai, ilam hoage gaidgaidun ode lai ciciadeb bilenigan.

Adamcai Ewa hoale Ifan ou totode odecun uculehi qa, hoale qisolmec mil he unug hegu osohianah, odan Ifan uqa mil he geldede, uqa mil he qeb qeimeian hocon isdec mudeanah. Oda hoqa, nueb nueb del esi sonigan hogu Ifan uqa esi, Ifan uqau bilec hau ohis meu bahin qildec hoilcai, mil he unug qildec hoil, odeb houqa meu bahinag houqa uqa esi ifaneian.

Iesus uqa esi dana aid uqadeucai, hoage esi mil he unug qildec hogu bilenigan. Odeb uqa esi elcel unug hogu alesoic nieadenigan ho, uqa hoageu ilo bile ofadec dana gaidgaidun ode bileian. Uqa esi ama lehu nea ho unug acue adeian, odeb hogu ho esi ulumen efefe bilec ho qitigimeian, walolomacai bilec ho qitigimeian, qaqale bilec ho qitigimeian, kobol meuqec ho qitigimeian, dain efefe bilec ho qitigimeian, almec ho qitigimeian. Iesus uqau ilo bilec houqa ho, uqa esi wacu meu niecgucai, elcel tutucungu adi odeccai houqa uqa ilo bile ofdeian, odeb uqa esi dana aid uqadeu hoagecai uqa gaidgaidun ode bileian.

Ifan uqacan totqec louqec heqa: Metiu 24:14; 28:18, Ion 15:20, 16:33; Le Amasacdec 2:10; Metiu 13:24-30, 36-42; 1 Thessalonians 4:13-5:11; Iems 1:12; Metiu 22:13; Le Amasacdec 20:10, 21:1-22:21