2. เลือง มับ เลียก ตะ โลก

อาดัม ทอ เมียฮ ปี อาเปิง ยะ เตะ อาอืก ตะ กะไน ณะ ไมจ ลวน ณะ ยุฮ พระจัว ลัง ปุย ละอา อาอืก ควง เอียะ เตว คัว อาเปะ เตะ มูทอ ยง เตว ซะกิก มัฮ คาว เมือทอ ตะโลก เฮฺ อู ติ ไก ฮมับ นึง เนือง ซะ มูทอ เฮว เอีย ตะ ซวน เคริง เมียฮ พระจัว เมียง.

มัฮแม ซะเอิง ไก ลอวฺ เมียฮ กะรอ เตะ ซะเอิง ทอ ไฮมน ปี อาเปิง ยะ อาดัม อัฮ ยัง เฮฺ พระจัว อำ ดอ เนวิม ละ ปะ อู เกือฮ ปะ กก เปลฮ คอวฺ ตะ ซวน เฮฺ

ปี อาเปิง ทอ อัฮ ลัง พระจัว เกือฮ เอะ กก เปลฮ คอวฺ มัฮ แม ไก ติ คอวฺ มัฮ คอวฺ ยง ปี ไมจ อู ไมจ ทอ พระจัว อัฮ ละ เอะ ปืน มะ กก ปะ เมียฮ คอวฺ ดุ๊ย ปัง ตอง ปะ ยุม

ซะเอิง ทอ อัฮ แม ลัง ยัง เฮฺ ทอ มัฮ เตว ปี เนวิม เออ ณะ ซำ ยุม ปะ อัฮ พระจัว ยง เอิก เมือ มาน มะ กก ปะ เปลฮ คอวฺ ทอ กอวฺปะ ซำ เปียน ปะ ยัง กอวฺ เอิง เมียฮ ซำ เลียก อาพาวม เตะ เมือน พระจัว ยง ปี ไมจ ยง ปี อู ไมจ

ปี อาเปิง ทอ เนียน คอวฺ ทอ ไมจ ลวน เมียฮ ซี ซำ ยุม ลวน มัฮแม กอวฺ เอิง กวด ไก ปันณา กวด เฮียง กำทอ แปฮ เปลฮ คอวฺ ทอ กก เอิง แม เกือฮ แม ละ ปี อาแมะ ยะ เตะ ปี อาแมะ ยัง กก ลอวฺ เมียฮ

กำทอ ปุย ละอา เปือฮ อัน ตะเอีย เอิง แม ยง กอวฺ เตะ อาอืก ควง โฮยด ทอ ปุย ละอา เอีย ซาวบ ฮละ คอวฺ เฮว จึง ติด โปะ เตะ เอียะ เปียน คัว อาเปะ เตะ

แมด ปี อาแมะ ปี อาเปิง ปุย ละอา ฮมอง เซียง พระจัว เฮว เลียก ตะ ซวน ทอ มูทอ บละ เมาะ ตะ พระจัว โฮยด ทอ พระจัว เฮว กอก อาดัม อัฮ ยัง เฮฺ ไก ปะ กะนม อาดัม อัฮ ยัง เฮฺ เอ๊า ฮมอง อัฮ กอวฺ เฮว มะ ตะซวน ฮลัด เตะ ตะ อาอืก ควง เตะ

โฮยด ทอ พระจัว อัฮ ยัง เฮฺ ลัง "มัฮ เปน ปี ดอ ละ ปะ อาอืก ควง ปะ " กก ปะ เปลฮ คอวฺ ปี อู เอ๊า เกือฮ เตะ กก ยง ปี อาแมะ ทอ อัฮ ยัง เฮฺ ปี อาเปิง ปี เกือฮ มะ ละ เอ๊า เ้กือฮ เปลฮ คอวฺ ทอ ละ เอ๊า มะ แม ปี อาเปิง ทอ อัฮ แม ยัง เฮฺ " มัน ปี ยุฮ ปะ " ปี อาเปิง อัฮ ยัง เฮฺ มัฮ ซะเอิง ทอ ปี บลอวฺ เอ๊า กก

พระจัว อัฮ ยัง เฮฺ ละ ซะเอิง ทอ กอวฺปะ ลอก ปะ ซะนา กอวฺปะ ตอง ปะ เฮว ตะ เวียก เตะ กำทอ กก ปะ แตะ อากาว กอวฺปะ เมียฮ ปี อาเปิง เฮฺ ซำ แกลฮ ปะ โยะ โปะ เตะ กวน ซอวฺ กวนระ ยะ ปะ เมียฮ ปี อาเปิง ซำ แกลฮ ปะ โยะ โปะ เตะ จาด เจือ ปี อาเปิง เฮฺ ซำ เชียด ไก ปะ ลวดลอง เมียฮ กอวฺปะ ซำ ปวก ปะ เจว ปี อาเปิง ทอ

เอ๊า ซำ เกือฮ อะ กอวฺปะ ซอวฺ ไซน ปืน มะ เกฮ ปะ กวน เตะ มัฮ แม กวด เอียะ ดัง ปะ ปี อาแมะ ยะ เตะ มัฮ แม ปี อาแมะ ยะ ปะ ซำ เปียน จัวเนีย ปะ

พระจัว อัฮ ยัง เฮฺ ละ ปี อาแมะ ทอ กอวฺปะ อวด ปะ ปี อาเปิง ยะ เตะ อู ปะ อวด ปี อัฮ เอ๊า ปะเดีย แตะ เฮฺ ลอก ซะนา มัฮ แม กอวฺปะ ซำ ตุก ณัก ปะ ซาวบ ปะ กก ซาวม นึง แตะ เฮฺ โฮยด ทอ ยุม ปะ ซำ แม เปียน ปะ แตะ ปี อาแมะ ดอวฮ มาวฮ ปี อาเปิง ยะ เตะ มัฮ เอวา ความมาย มาวฮ เอิง มัฮ " ปีเกือฮ จีวิด " มัฮ คาว ปี อาเปิง เฮฺ ซำ เปียน มะ ยะ ปุย เฮิง โฮยด ทอ พระจัว เกือฮ เอียะ คัว อาเปะ ปี ยุฮ เนวิม ฮัก ซัด ละ อาดัม เมียฮ เอวา

กำทอ พระจัว อัฮ ยัง เฮฺ " ปะเดีย ปุย เฮฺ อี ลอวฺ ยัง เอ๊า ยง ปี ไมจ ปู อู ไมจ " มูทอ ปะ จะ แกฮ กก เตว เปลฮ คอวฺ ปี เกือฮ ไก จีวิด กำทอ พระจัว กลา ณะ ละอา ออก พะซวน ไมจ ลวน ทอ พระจัว เกือฮ เตวาดา ปีระ อำนาด มอง ตะ คระ ซวน อู จะ เกือฮ ปุย เลียก กก เปลฮ คอวฺ ปี เกือฮ ไก จีวิด

เลือง เฮฺ ออก เนวิม พระธรรม ปฐมกาล 3