13. ณะ ซัณยา ตะปูซาง อาอืง ละ มู อิซราเอล
แมด โฮยด ตะปูซาง ปา มู อิซราเอล เตือง ทะเล ซะครัก ปุน ณะ ซะเอาะ ซะโอยน ฮาอืก นึง มอ ปี มัฮ ซีนาย เมียง กำทอ มู อิซราเอล ทอ โบฮ ปาง ยะ เตะ นึง จวง มอ ทอ
ตะปูซาง อัฮ ยัง เฮฺ ละ โมเซซ เมียฮ มู อิซราเอล ปืน มัฮ เนิง ปะ ปี อัฮ เอ๊า อาอืก ปะ เมียฮ คำ ซัณยา ปี ยุฮ เอ๊า ละ ปะ ซำ เปียน ปะ ปี มัฮ ลวน อาพาวม เอ๊า. เอ๊า มัฮ กะซัด ยะ ปะ กอวฺปะ มัฮ ปะ ปุโรฮีต ยะ เอ๊า. มู กอวฺปะ ซำ เปียน ปะ จัดเจือ ปี ซะงะ ซะฆอม.
โฮยด ทอ ละโอย ซะแงะ ตะปูซาง เกือฮ มู อิซราเอล นฺา กอวฺ เตะ ซะงะ ซะฆอม ณะ ซำ เฮว เจวิบ เตะ พระองค์. กำทอ ตะปูซาง เลฮ นึง เปือง มอ ซีนาย. ไก เซียง เนวิม เบระ ปลุก เปรียก เมียฮ มาอืก เซียง แน เดือด เซียฮ. โมเซซ เตะ นฺอง ปี เกือฮ ตะปูซาง ฮวก นึง เปือง มอ ทอ.
ตะปูซาง เกือฮ ซัณยา อาอืง ละ มูทอ อัฮ ยัง เฮฺ เอ๊า มัฮ อะ พระยาเวฮ พระจัว ยะ กอวฺปะ. มัฮ ปี ปา มู กอวฺปะ ปูน ณะ เปียน เตะ คีครา ปุย ตะ เมิง อียิป. ปู จะ ไว ยวกลื พระจัว ไฮณฺ ทอ.
ปู จะ ยุฮ ฮุน ปู จะไว ฮุน ทอ มัฮ คาว ยัง เฮฺ เอ๊า มัฮ ตะปูซาง พะจัว ยะ ปะ คาง แปะ ปู จะ จอวฺ มาวฮ เอ๊า ณะ คระ อู ไมจ อู เกือฮ เกียด เอ๊า ซะแพระ ซะแงะ ซะบาโต เฮฺ ไมจ. มัฮ ซะแงะ ซะงะ ซะงอม มัฮ ยัง เฮฺ ยุฮ กัน ยะ ปะ ตังเอิก เอิง แลฮ ซะแงะ. มัฮแม ซะแงะ อาแลฮ ทอ มัฮ ซะแงะ อาดอวฺ ปะ กึด ฮาอืก ละ เอ๊า เมียง.
ตอง ปะ เกือฮ เกียด มะ เปือะ เตะ. ปู จะ มอก ปุย. ปู จะ แลน จุ ปะ. ปู จะ บละ. ปู จะ บรอวฺ ปุย. ปู จะ กวด เอียะ อาเอะ ยะ ปุย เฟียน เณือะ เฟียน มฺา เมียฮ อาเอะ เคริง ยัง ปี มัฮ ปะ เยือะ ปุย.
กำทอ ตะปูซาง เตียม กด บันยัด กัว ยัง นึงซะมอวฺ ละอา เพียน เกือฮ ละ โมเซซ ทอ. ตะปูซาง เกือฮ แม กด ยัง ไฮน ละ มู อิซราเอล เกือฮ เอิง ยุฮ ยัง ทอ. ปืน มัฮ เนิง กด ทอ ตะปูซาง ซำ ปันปวน ลัง ซะแพระ เอิง. ปืน มัฮ อู ยุฮ ยัง ทอ ตะปูซาง ซำ เลฮ ตุด เอิง.
โฮยด ทอ ตะปูซาง ดอ แม ยัง เตน ปี กวด โบฮ. มู ทอ อัฮ เตน ณะ เจวิบ โปะ เตะ. ไก ละอา ฮอง กัง ตะ พลุ. ไก ปุโรหิด เตะ นฺอง ปี แกฮ เลียก ตะ ฮอง ทอ มัฮคาว ตะปูซาง อาอืก กะรอ.
ปะ ออฮ ปะ เอะ โยก ปี ยุฮ ปี พิด กด ยะ ตะปูซาง ตอง ปะ เริก ซัด เตะ ยอง ปัง นึง ฆราน ลัก กะนา เตน ทอ ไก ปุโรฮิด นึง เตะ มอก ซัด ทอ ตอง ซัด นึง ฆราน ณะ ตาน เตะ ละ ตะปูซาง. ตะปูซาง โยะ ปุย ซะงะ ซะงอม มัฮคาว ฮนำ ซัด ทอ. ตะปูซาง รอยฮ อาโรน เอียกระ โมเซซ เมียฮ จัดเจือ เอิง เปียน ปุโรฮีด ตะลวด.
มู อิซราเอล ตัง เอิก ณอม รับ กด ปี เกือฮ ตะปูซาง ละ เตะ. กำทอ ยวกลือ ตะปูซาง ยะ เตะ นอง. มัฮ แม มู อิซราเอล ซำ เปียน ปุย พิเซด ละ ตะปูซาง. ปอ เตว เดณ เตะ แมด มูทอ โฮยด ซันณา เมียฮ ตะปูซาง. มู อิซราเอล แม ยุฮ แม ฮมับ ระ ลวน.
มัฮ คาว โมเซซ ทอ ฮวก นึง มอ ซีนาย เฮว เจวิบ ตะปูซาง เดณ ลวน เปฮ. มัฮแม มู อิซราเอล เตือ ตะ มอง เตะ เอิง อู จะ เลฮ ลอบ. กำทอ ปา โปะ เตะ เฮว ละ อาโรน เกือฮ มาวฮ เครีย ลัง ปอ เอิง ยุฮ ฮุน เมวิบ ละ มู กอวฺ เตะ.
กำทอ อาโรน เอียะ มาวฮ เครียฮ ลอ เอิง เปียน ฮุน เมวิบ. กำทอ มู อิซราเอล ไว ฮุน ทอ เริก อาเอะ ลัง เฮว ตาน ละ ฮุน เมวิบ. กำทอ ตะปูซาง จะราย ละ มูทอ มัฮ คาว ฮมับ ปี ยุฮ เอิง. กำทอ ตะปูซาง อัฮ ซำ มอก มูทอ ยุม ตัง เอิก เอิง. มัฮแม โมเซซ ปอ เอิง ตัง มูทอ. มัฮแม ตะปูซาง อวด ปี อัฮ โมเซซ อู เนวิม จะ มอก เอิง.
แมด โมเซซ ทอ เลฮ เนวิม เปือง มอ ยัง เฮฺ โยะ ฮุน เมวิบ จะราย. กำทอ ลักโลง ซะมอวฺ ละอา เพียน ปี เตียม ตะปูซาง กด นึง เบือะ โลยดลอง.
กำทอ โมเซซ ทอ เตียง ฮุน เมวิบ ทอ โลยดลอง แตว เอิง ตะ ละอาวม คะนาบ มู อิซราเอล ทอ โณะ เอิง. มัฮแม ตะปูซาง เกือฮ แม คึด กึด ละ มู อิซราเอล มู อิซราเอล ทอ ยุม ตึก โซะ เตะ.
กำทอ โมเซซ ฮวก แม ละ ตะปูซาง นึง เปือง มอ ปอ ตะปูซาง อู จะ เอียะ ตุด มูทอ. มัฮแม ตะปูซาง อู จะ เอียะ ตุด เอิง ยัง ปี ปอ โมเซซ. กำทอ โมเซซ เตียม แม กด นึง ซะมอวฺ ละอา เพียน เทียน ปี เบือะ ทอ. มัฮแม ตะปูซาง ปา แม มู อิซราเอล ออก พะ มอ ซีนาย เฮว นึง แตะ ณะ ซันยา อาอืง ลัง.
เลือง เนวิม พระคัมพี อพยพ 19-34