15. แตะ ณะ ซัณณา อาอืง

แมด โมเซซ เฮฺ ยุม โยชูวา ปา มู อิซราเอล ออก เฮว เลียก นึง แตะ คานาอัน แตะ ปี ซัณณา ตะปูซาง อาอืง ละ อับราฮัม. โยชูวา ดัฺว ปุย ละอา ปุย เฮว เลียก ตะ เมิง คานาอัน เมิง เยริโค. มัฮแม เมิง ทอ กำแปง แขงแลง ลวน. มัฮแม เมิง ทอ ไก ปี อาเปิง ปี ชอวฺกอวฺ เตะ นึง ติ ปุย มาวฮ เอิง มัฮ ราฮับ. ปี อาเปิง เฮฺ มัฮ ปี โจย ปี บฺระ เนียน เมิง เยริโค ทอ. เตวิม ยุฮ ยัง เฮฺ มัฮคาว เนิง ปี อัฮ ตะปูซาง. มูทอ อัฮ ซำ โจย ราฮับ เมียฮ ครอบครัว ปืน มัฮ ปืน รุบ มู อิซราเอล ทอ เมิง เยริโค.

มัฮแม มู อิซราเอล ตอง เตือง กลอง ละอาวม จอแดน เลียก เฮว นึง แตะ ปี ซัณณา ตะปูซาง อาอืง ลัง . ตะปูซาง ดฺอ เอิง ละ โยชูวา อัฮ ยัง เฮฺ เกือฮ ปุโรหิด เลฮ ตะ ละอาวม อะเกือ. แมด ปุโรหิด ทอ เลิม เลฮ เตะ ตะ กลอง ละอาวม จอแดน ดฺะ ละอาวม ยุด. กำทอ มู อิซราเอล ทอ เตือง ไล กะเติด ณะ ซะอฮ แตะ ทอ.

แมด มู อิซราเอล โฮยด เตือง ละอาวม กลอง จอแดน ทอ ตะปูซาง ดฺอ ละ โยชูวา เฮว รุบ เมิง เยริโค ปี แคงแลง ลวน ทอ. มู อิซราเอล เฮว ยุฮ ยัง ปี อัฮ ตะปูซาง มู ปุโรหิด เมียฮ ตะฮาน ทอ เฮว เวียด เมิง เยริโค ติ ซะแงะ ติ ลอบ แลฮ ซะแงะ.

แมด ฮาอืก ซะแงะ อาแลฮ ทอ ยัง เฮฺ มู อิซราเอล เฮว เวียด เมิง ทอ อาแลฮ จวง. มู ตะฮาน เดือด ซัฮ ปัว เอิง. มัฮแม ปุโรหิด ปลาอืง แน ยะ เตะ เดือด ซัฮ ดอยฮ เอิง.

โฮยด ทอ กำแปง เมิง เยริโค อาเลวิม. มู อิซราเอล ยุฮ เอิง ซิบฮาย เมียฮ อาเอะ ตะ เมิง ตัง เอิก เอิง ยัง ปี อัฮ ตะปูซาง ละ เตะ. มัฮแม มู อิซราเอล ซะไพรจ ปีอาเปิง ราฮับ เมียฮ ครอบครัว เอิง แมด ฮาอืก อาแคะ แม เปียน ปุย อิซราเอล. มัฮแม ปุย ไฮน ปี อาอืก ตะ เมิง คานาอัน ทอ แมด ฮมอง มู อิซราเอล อี ปืน รุบ เมิง เยริโค ยัง เฮฺ ฮลัด ลวน มู อิซราเอล ซำ รุบ แม มู แอะ เมียง.

ตะปูซาง จอวฺ มู อิซราเอล อู ซัณณา เมียฮ มู ไฮน ปี อาอืก ตะ เมิง คานาอัน. กำทอ ไก ปุย คานาอัน ติ มู อัฮ มูกอวฺ เตะ มัฮ ปุย กิเบโอน เฮว บรอวฺ โยชูวา อัฮ เตะ ออก เนวิม เมิง ซะเงีย พะ คานาอัน. มูทอ ปอ โยชูวา ยุฮ ซัณณา เมียฮ มูกอวฺ เตะ. มัฮแม โยชูวา เมียฮ มู อิซราเอล อู ไฮมน ตะปูซาง อาเกือฮ ปุย กิเบโอน เฮฺ อำ ออก เนวิม กะนม. กำทอ โยชูวา โฮยด ยุฮ เปะ ซัณณา เมียฮ มู ทอ.

แมด มู อิซราเอล โยง ปุย กิเบโอน บรอวฺ มู กอวฺ เตะ จะราย. มัฮแม มู อิซราเอล อาอืก ดัฺง เมียง ซัณณา ปี ยุฮ เตะ เมียฮ มู กิเบโอน มัฮคาว ฮลอวฺ ซัณณา โปะ เตะ ตัด นา ตะปูซาง. แมด เดณ ยัง เอฺ กะซัด ยะ มู อาโมไร เมียฮ ปี อาอืก เมิง คานาอัน ฮมอง คาว ปุย กิเบโอน เฮฺ ยุฮ ซัณณา เมียฮ มู อิซราเอล. โฮยด ทอ รวม โปะ เตะ ปา โปะ เตะ เฮว รุบ ปุย กิเบโอน. กำทอ ปูย กิเบโอน เฮฺ จอว ปุย เฮว ดฺอ เอิง ละ โยชูซา ปอ เกะ เฮว โจย มู ทอ อะเซียะ.

มัฮแม โยชูวา กอก ตะฮาน มู อิซราเอล โฮยด ทอ ปา โปะ เตะ ออก เฮว ตัง ซาวม ฮาอืก เมิง กิเบโอน มะเซะ ลอง. ตะฮาน อิซราเอล เฮว รุบ มู อาโมไร. มู ทอ อาฆราอืง อู ยง มู อิซราเอล เฮว รูบ มู เตะ.

ซะแงะ ทอ ตะปูซาง รุบ ตัง มู อิซณาเอล. พระอง เกือฮ ตะฮาน มู อาโมไร ณุง อาพาวม. กำทอ เกือฮ แม แพร รึ มัฮ ยัง ซะมอวฺ ราวฺ เตียง มู อาโมไร ยุม ตึก โซะ เตะ.

ตะปูซาง เกือฮ แม ซะแงะ ตะ มะลอง ยุด ตึก เดฺณ. มัฮคาว ซำ เกือฮ มู อิซราเอล ทอ รุบ แป มู อาโมไร ตัง เอิก เอิง. ตะปูซาง เกือฮ มู อิซราเอล ทอ แป ซะแงะ ทอ.

แมด ตะปูซาง โฮยด แป มูทอ ยัง เฮฺ มู ปุยไฮน ปี อาอืก กะรอ รวม โปะ เตะ เฮว รุบ ปุย อิซราเอล.โยชูวา เมียฮ มู อิซราเอล เฮว รุบ มูทอ ทัมลาย มูทอ ตัง เอิก เอิง.

แมด โฮยด ดฺาอะรุบ ยัง เฮฺ ตะปูซาง เกือฮ แตะ ละ มู อิซราเอล ติ ตอวฺ ตอ ติ เจือ. กำทอ ตะปูซาง เกือฮ มู อิซราเอล อาอืก ไมจ อาอืก มวน นึง แตะ ทอ.

แมด โยชูวา อี กวด ยัง เฮฺ กอก มู อิซราเอล ตัง เอิก เอิง เฮว ปาซูม โปะ เตะ. กำทอ โยชูวา เกือฮ มู อิซราเอล กึด ฮาอืก ละ นาที ปี ยุฮ มูทอ ละ ตะปูซาง . ตอง ปะ เนิง ซัณณา ยะ ตะปูซาง ปี ยุฮ ละ มู กอวฺปะ นึง มอ ซีนาย. มัฮแม มู อิซราเอล ซัณณา อัฮ ยัง เฮฺ มู เอะ ซำ ไตน เอิง ซำ เซอ ตะ ตะปูซาง. ซำ ยุฮ ตาม กด ยะ ตะปูซาง ทอ.

เลือง พะคำพี โยชูวา 1- 24