47. เลือง เปาโล เมียฮ ซิลาซ เฮว ตะ เมิง ฟิลิบปี

ไก ติ ซะแงะ เปาโล เมียฮ ซิลาซ เฮว ตะ เมิง ฟิลิปปี เอีย ดอ คาว ไมจ เลือง พระเยซู ละ ปุย ตะ เมิง ทอ. กำทอ เฮว โพด นึง ณะ อาทิทาน ปุย พระจัว ไก ฮิม ละอาวม กะนอก เมิง. กะรอ ไก ปีอาเปิง ปี ไนจ นึง ติ ปุย มาวฮ เอิง มัฮ ลิเดีย. ปีอาเปิง เฮฺ มัฮ ปี รัก พระจัว.

แมด ฮมอง คาว ไมจ เลือง พระเยซู พระจัว ปอวฮ อัน อาพาวม ปีอาเปิง เฮฺ เมียฮ ปุย ตะ เณือะ ยัง. กำทอ ลิเดีย เมียฮ ปุย ตะ เณือะ เคริง ปุย รับ อัน บัพติซมา ซะแงะ ทอ. โฮยด ทอ ลิเดีย ฮัก เปาโล เมียฮ ซิลาซ เฮว อาอืก ตะ เณือะ ณะ เตะ.

เปาโล เมียฮ ซิลาซ เจวิบ ปุย เฮิง นึง ณะ อะทิทาน เนือง ซะ. เคริง ซะแงะ ปืน มัฮ เฮว มูทอ กะรอ ไก คีครา ปีอาเปิง เครฮ ปี เลียก พี นึง ติ ปุย เอีย เครียบ มู ทอ. พี ปี เลียก นึงปีอาเปิง ทอ แกฮ โยง ปี ซำ กึด กังกา ยะ ปุย มัฮ คาว ยัง เฮฺ เตวิม แกฮ ซาวบ มาว ละ จัวเนีย เตะ.

ปีอาเปิง เฮฺ ปืน มัฮ เฮว เอีย ปัว อัฮ ยัง เฮฺ ปีอาแมะ มู เฮฺ มัฮ ปี จอวฺ พระจัว ฮลวง ลวน. ซำ ดอ ณะ ลวด ปุย ละ มู กอวฺปะ เกือฮ ปะ โยง เอิง. ปีอาเปิง เฮฺ เอีย เปฮ เครียบ เอิง เปาโล อู จะ มวน อาพาวม.

แมด ฮาอืก แม ติ ซะแงะ ปีอาเปิง ปี เลียก พี เลิม แม ปัว เตะ. กำทอ เปาโล อะเตือะแม ปีอาเปิง ทอ จอวฺ พี ปี เลียก ตะ ปีอาเปิง ทอ อัฮ ยัง เฮฺ ตะ มาวฮ พระเยซู ออก เฮว เปะ พะ ปีอาเปิง ปุย เฮฺ. กำทอ พี ปี อาอืก ตะ กะไน ปีอาเปิง ทอ ออก ดวน อัน.

มัฮแม จัวเนีย ยะ ปีอาเปิง ทอ จะราย. มัฮคาว โยง ปืน อู ไก พี ปีอาเปิง เฮฺ อู จะ โยง ปี ซำ กึด กังกา ยะ ปุย. อู จะ ไก ปี จัง เอิง เลย อู จะ ปืน มาว.

กำทอ จัวเนีย ยะ ปีอาเปิง ทอ เฮมิก เปาโล เมียฮ ซิลาซ ออ เฮว ละ จัวเมิง. จัวเมิง เกือฮตะฮาน เฟียด เบณ เปาโล เมียฮ ซิลาซ. กำทอ ปา ปุย ละอา คัง เอิง ตะ คอก.

กำทอ ดอวฺฮ โซ นึง จวง เอิง. แมด ฮาอืก อวน ซาวม ยัง เฮฺ เปาโล เมียฮ ซิลาซ ฮอง เพลง ยวกลื ตะปูซาง ยะ เตะ.

กำทอ ยัง เฮฺ เเตะ อาโยะ. อะเวือะ คอก เคริง ตอวฺ เอิง ปอวฮ เตะ ออก. มัฮแม โซ ปี ปุก จวง เคริง ปุย ลุด อัน กำทอ.

มัฮแม ฮัวนา ปี คุม นักโทด กอวฮ จีไจ เฮว เนียน เอิง. กำทอ โยะ อะเวือะ คอก ปอวฮ เตะ เคริง ตอวฮ เอิง. กอวฺ เอิง ฮลัด ลวน. กึด ตะ กะไน อาพาวม เตะ มู นักโทด อี ตอ เอิก ออก อัฮ. อัฮ ซำ มอก กอวฺ เตะ ยุม. มัฮ คาว ยัง เฮฺ ปืน มัฮ โยง มู ตะฮาน ระ ยะ มู โรมัน เอิง ซำ มอก เกะ เอ๊า ยุม อัฮ เอ๊า มัฮ ปี ปลอย มู นักโทด ตอ ออก. มัฮแม เปาโล โยะ ฮัวนา ปี คุม นักโทด ทอ ปัว เอิง อัฮ ยัง เฮฺ ยุด ฮาม ปู จะ ยุฮ เมียฮ กอวฺปะ. มู แอะ ตัง เอิก อะ ไก ดัง เตะ กะเรย.

มัฮแม ฮัวนา ปี คุม นักโทด อะปลอย ฮลัด. แมด เปาโล เมียฮ ซิลาซ เลียก ซะแดะ มู กอวฺ เอิง ไฮมณ เอ๊า ซำ ยุฮ ยังมัน เตวิม ซำ ลวด. กำทอ เปาโล อัฮ ยัง เฮฺ ลัง เจือ พระเยซู พระจัว เตะ นฺอง กอวฺมะ เมียฮ ปุย ตะ เณือะ ยะ ปะ ซำ ลวด ปะ. โฮยด ทอ ฮัวนา ปี คุม นักโทด ปา เปาโล เมียฮ ซิลาซ เลียก ตะ กะไน เณือะ ณะ เตะ. กำทอ อะไซจ แพล ปุย ละอา ทอ. เปาโล ฮู คาว ไมจ เลือง พระเยซู เกือฮ มูทอ อวด เอิง เคริง ปุย ปี อาอืก ตะ กะไน เณือะ ทอ.

โฮยด ทอ ฮัวนา ปี คุม นักโทด เมียฮ เคริง ปุย ตะ เณือะ เจือ พระเยซู. กำทอ รับ บัพติศมา. ฮัวนา ปี คุม นักโทด ทอ เกือฮ เปาโล เมียฮ ซิลาซ ซอวม. มัฮแม มูทอ ตัง มู เอิง ปา โปะ เตะ มวน งาน.

แมด ฮาอืก ติ ซะแงยัง เฮฺ มู ปี ระ ตะ เมิง ปลอย เปาโล เมียฮ ซิลาซ ออก พะ คอก ทอ. กำทอ ปอ ปุย ละอา ออก พะ เมิง ฟิลิปปี เฮฺ. เปาโล เมียฮ ซิลาซ เฮว ไจ ลิเดีย เมียฮ ปูเฮมว มู กอวฺ เอิง ปี อาอืก ตะ เมิง ทอ. โฮยด ทอ เปาโล เมียฮ ซิลาซ ปา โปะ เตะ ออก เฮว พะ เมิง ทอ. มัฮแม เลือง คาว ไมจ ละ พระเยซู พลุฮ เดบ เมิง. มัฮแม มู ปี เจือ พระเยซู เฮิง ปู เฮว ติก ติก.

เปาโล เมียฮ พูนำ ปี เจือ พระเยซู เฮว เอีย ตะ เมิงไฮน. ดอ เมียฮ ซะตอก ปุย เลือง คาว ไมจ ยะ พระเยซู คริซต์. มูทอ เคียน จดมาย เฮิง เพือ นุน อาพาวม เมียฮ ซะตอก ปี เจือ ตะ คริซะจัก ไฮน. จดมาย ทอ อวน มัฮ นังซือ ตะ พระคัมพี บะเดีย.

เลือง เนวิม พระคัมพี กิจการ 16:11-40