4. เลือง ณะ ซัณณา พระจัว อาอืง ละ อับราฮัม
เดณ ลวน มะ โฮยด ทวม ละอาม ปุย เมือทอ กำเคริง มัฮ ดัง ยัง เตะ กำทอ อัฮ ยัง เฮฺ ละ โปะ เตะ มู เอะ ยุฮ อัฮ ฮอ ฮลวง ซำ ฮวก ตะ มะลอง กำทอ ปา โปะ เตะ ยุฮ เอิง
มูทอ ปอ ลวน อาพาวม เอิง อู จะ เงิด งอง ปี อัฮ พระจัว อาอืง ลัง มูทอ ปา โปะ เตะ ยุฮ ฮอ เกือฮ ฮลวง เพียฮ ตะ มะลอง มัฮแม พระจัว เนียน เอิง มู เฮฺ ยุฮ ปี ฮมับ ยุฮ ปี อู ไมจ เฮิง ปู เฮว ติก ติก
กำทอ พระจัว เกือฮ มูทอ อู จะ ยง เคริง โปะ เตะ เกือฮ กำ เคริง อู จะ เมือน โปะ เตะ โฮยด ทอ ปุย เฮิง ออก เฮว ตะ ไพ ตะ มัน เดวิบ โลก เฮฺ เมิง ระ ณะ ยุฮ เอิง อัฮ บาเบว เมียง ความมาย อะซุก อะเซาวจ
แมด เดณ เปียน อาเยือะ เนวิม เตะ ยัง เฮฺ พระจัว เคริง เมียฮ ปี อาแมะ ติ ปุย มาวฮ เอิง มัฮ อับราฮัม พระจัว อัฮ ลัง ยัง เฮฺ " ออก เปฮ พะ เมิง ณะ อาอืก ปะ เมียฮ คอบครัว ยะ ปะ เฮว นึง แตะ เอ๊า ซำ ทะแลง กอวฺ เตะ ละ ปะ ซำ ปันปวน ละ ปะ กอวฺมะ จัดเจือ ปะ ซำ เปียน จัดเจือ ระ เอ๊า ซำ เกือฮ กอวฺมะ ไก มาวฮ เซียง เดบ โลก เอ๊า ซำ ปันปวน ละ ปุย ปี ปันปวน ละ ปะ ซำ ซะนา ปุย ปี ซะนา กอวฺมะ ปุย ตะโลก เฮฺ ซำ ฮลอวฺ รับ ปวน ยะ พระจัว.
โฮยด ทอ อับราฮัม เนิง ปี อัฮ พระจัว ปา ปี อาเปิง ยะ เตะ มาวฮ เอิง มัฮ ซารา เมียฮ ปีจอวฺ เตะ อู เอะ ยัง เคริง ยัง เฮว นึง แตะ ปี ดอ พระจัว ลัง แตะ ทอ อัฮ แตะ คานาอัน เมียง
แมด อับราฮัม ฮาอืก นึง แตะ คานาอัน ทอ พระจัว อัฮ ยัง เฮฺ ละ อับราฮัม เนียน เดบ แตะ ปี โยะ ปะ เอ๊า ซำ ยวก เกือฮ ละ ปะ เปียน คาว กุน ละ จัดเจือ ปะ โฮยด ทอ อับราฮัม เลฮ ณาวม นึง แตะ ทอ
ไก ติ ซะแงะ อับราฮัม เจวิบ เมลคีเซเค ปุโรฮิด ฮลวงลวน ยะ พระจัว กำทอ เมลคีเซเดค ปันปวน ละ อับราฮัม อัฮ ยัง เฮฺ ปอ พระจัว ปี ฮลวง ลวน จัว มะลอง เมียฮ โลก เฮฺ ปันปวน ละ กอวฺมะ
เดน บุย อับราฮัม เมียฮ ซาราย อู ดัง ติ ไก กวน พระจัว อัฮ ละ อับราฮัม ซัณณา ลัง กอวฺ เอิง ซำ ฮลอวฺ ปะ กวน อาแมะ เตะ เมียฮ กวน ซอวฺ เฮิง ลวน เมือน ซะเบิง ตะ มะลอง อับราฮัม เนิง ปี อัฮ พระจัว พระจัว อัฮ ละ อับราฮัม กอวมะ มัฮ ปะ ปุย ไมจ ลวน เนิง ปะ กำ สัณณา เอ๊า
มัฮ คาว ยัง เฮฺ พระจัว ยุฮ ซัณณา เมียฮ โปะ เตะ เมียฮ อับราฮัม กำ ซัณณา เฮฺ มัฮ ปี ยุฮ เอ๊า ตัง ละอา เตะ เอ๊า ซำ เกือฮ กวน อาแมะ ปี ออก เนวิม กอวฺปะ เอ๊า ซำ เกือฮ แตะ คานาอัน ละ จัดเจือ ยะ กอวฺมะ มัฮ แม อับราอัม ติ ไก ดัง เตว กวน
เลือง เฮฺ ออก เนวิม พระธรรม ปฐมกาล 11-15