5. เลือง กวน อะแมะ ปี ซัณณา พระจัว อาอืง ลัง

โฮยด ทอ กัว เนวิม อับราฮัม เมียฮ ซาราย อาอืก ตอวฺ เมิง คานาอัน . ซาราย ปี อาเปิง ยะ อับราฮัม อัฮ ยัง เฮฺ ลัง. เนวิม มา อู่ พระจัว ติ เกือฮ เอ๊า ไก กวน. มา เดีย เอ๊า อี กวด ลอบ เตะ แกฮ ไก เตว กวน. เฮฺ มัฮ ฮากา ปี จอวฺ เอ๊า. เอียะ เปฮ เพือ ซำ ไก กวน เกะ ละ เอ๊า.

อับราฮัม เณือะ เมียฮ ฮากา ปี อาเปิง ทอ เกฮ กวน อาแมะ เตะ ลัง ติ ปุย. อับราฮัม ดอวฺฮ มาวฮ กะดอวฺ ทอ มัฮ อิซมาเอล. มัฮ แม ซาราย คอย ฮากา แมด อิซมาเอล ไก อายุฮ กัว ละ โอย เนวิม. พระจัว อัฮ แม ละ อับราฮัม ติ จวง.

เอ๊า มัฮ พระจัว ปี ไก ริด ฮลวง ลวน. เอ๊า ซำ ยุฮ ซัณณา เมียฮ กอวฺมะ พระจัว อัฮ ยัง เฮฺ . กำทอ อับราฮัม แมด ฮมอง เซียง พระจัว มุ นา เตะ เลฮ นึง แตะ. "กอวฺมะ ซำ มัฮ ปะ เปือฮ ยะ ปุย ตะโลก เฮฺ" เอ๊า ซำ เกือฮ กอวฺมะ เฮมียฮ กวน ซอวฺ มะ เปียน จัว แตะ คานาอัน เปียน คะกุน กอวฺมะ. เอ๊า ซำ มัฮ พระจัว ยะ มู กอวฺมะ ตะลวด. มัฮ ยัง เฮฺ ปี อาแมะ เคริง ปุย ปี อาอืก เณือะ ยะ กอวฺมะ ตอง ปะ เลียก ซุนัด."

ซาราย ปี อาเปิง ยะ ปะ ซำ เกฮ กวน อาแมะ เตะ ละ ปะ ติ ปุย. กอวฺ เอิง ซำ เปียน กวน ปี ซัณณา เอ๊า อาอืง อฮ. ดอวฮ มาวฮ เอิง มัฮ "อิซอัค" เอ๊า ซำ ยุฮ อัฮ ซัณณา เมียฮ เกะ. ซำ เปียน เกะ จัดเจือ ระ ติ จัดเจือ "เอ๊า ซำ เกือฮ อัฮ อิซมาเอล เปียน ปี ระ ติ จัด เจือ รอฮ". มัฮ แม ซัณณา ยะ เอ๊า ซำ อาอืก เมียฮ อิซอัค . กำทอ พระจัว เปลียน มาวฮ อับราม เปียน อับราฮัม. มัฮ เปือะ ยะ ปุย ตะโลก มัฮ แม ซาราย เปียน ซารา มัฮ มะ ยะ ปุย ตะโลก เฮฺ.

ซะแงะ ทอ อับราฮัม เกือฮ ปี อาแมะ ตอวฺ เณือะ ยะ เตะ เคริง ปุย เลียก ซุ นัด. ติ เนวิม อาเคะ ทอ อับราฮัม ไก อายุฮ ติ อาเยือะ เมียฮ งา เนวิม. ซารา ไก อายุฮ ระไตน เนวิม เกฮ กวน อาแมะ เตะ ติ ปุย ละ อับราฮัม. กอวฺ เอิิง ดอวฮ มาวฮ เอิง มัฮ อิซอัค ยัง ปี ดอ พระจัว ทอ อาอืง ละ เตะ.

แมด อิซอัค ทอ เปลีย พระจัว ลอง อาพาวม อับราฮัม อัฮ ยัง เฮฺ. " อิซอัค กวน อาแมะ เตะ ปะ กำทอ มอก ตาน ละ เอ๊า" อับราฮัม เนิง ปี อัฮ พระจัว. กำทอ เกียม กวน อาแมะ ยะ กอวฺ เตะ ซำ ตาน ละ พระจัว.

แมด อับราฮัม เมียฮ อิซอัค เฮว ฮาอืก นึง ณะ ตาน เตะ ซัด ทอ. อิซอัค ไฮมน อัฮ ยัง เฮฺ เปือะ เคะ อี ไก มัฮ แม แก อำ ไก กะนม อับราฮัม อัฮ ยัง เฮฺ ลัง. พระจัว ซาวบ เกียม นอง เอีย กวน แกะ ปี ซำ ตาน ละ กอวฺ เตะ.

แมด ฮาอืก นึง ณะ ซำ ตาน ทอ. อับราฮัม เฮมิก ปุก กวน อาแมะ เตะ เฮว ยอง นึง กราน ทอ. ทวด มีด เตะ อัฮ ซำ มอก เอิง พระจัว อัฮ ยัง เฮฺ " ณึด ฮาม ปู จะ ยุฮ เมียฮ กะดอวฺฮ ทอ ปะเดีย เอ๊า อีโยง กอวฺปะ ฮลัด ปะ ตะ เอ๊า. กอวฺปะ คัง เตว กวน อาแมะ ติ ปุย เฮฺ พะ เอ๊า.

ฮิม ทอ อับราฮัม โยะ กวน แกะ เตะ คาง นึง กักคอวฺ พระจัว อี เกียม อาอืง กวน แกะ ปี ซำ ตาน อับราฮัม เตียน อิซอัค. อับราฮัม มอก กวน แกะ ตาน ละ พระจัว มวน งัน ลวน อาพาวม เอิง.

กำทอ พระจัว อัฮ ยัง เฮฺ ละ อับราฮัม มัฮ คาว กอวฺปะ. ตาน ปัง ละ เอ๊า เคริง ยัง ฮาก กวน อาแมะ ปะ ไก เตะ นอง ตาน เอิก ปัง. เอ๊า ซัณณา เมียฮ กอวฺมะ ซำ ปันปวน ละ ปะ กวน ซอวฺ กอวฺมะ ซำ เฮิง ยัง ซะเบิง ตะ มะ ลอง. มัฮ คาว กอวฺมะ อวด เนิง ปะ ปี อัฮ เอ๊า มัฮ ยัง เฮฺ ปุย ตะ โลก เฮฺ ซำ ฮลอวฺ รับ ปวน ตะ คอบครัว กอวฺมะ.

เลือง นึง พระคัมภีร์ ปฐมกาล 16-22