21. ปี ซัณณา พระจัว อาอืง เลือง พระเมซซิยา

มัฮ เนวิม กา ซำ ยุฮ โลก เฮฺ พระจัว ไก ปี ซำ ยุฮ ดัว พระเมซซิยา นึง จัดเจือ อาดัม เมียฮ เอวา พระจัว ซัณณา อาอืง ยัง เฮฺ ซำ เกือฮ จัดเจือ เอวา เกืฮฮ ไกน ซะเอิง อัฮ เอิง มัฮ ซาตาน ปี บลอวฺ เอวา ลวดลอง ตอง แนะ ณะ ซัณยา ยัง เฮฺ พระเมซซิยา ซำ อาอืก กะรัว ซาตาน มัฮ เนวิม ยัง ทอ

พระจัว ฮลอวฺ ซัณณา อาอืง ละ อับราฮัม ยัง เฮฺ ปุย ตะ โลก เฮฺ เคริง จัดเจือ ซำ ฮลอวฺ รับ ปวน ตะ กอวฺ เอิง ปวน เฮฺ ซำ โฮยด ปืน มัฮ อี เลฮ พระเมซซิยา แคะ ทอ เคริง ยัง ตอง เปียน ยัง ทอ เพือ ปุย เคริง จัดเจือ ซำ ฮลอวฺ รับ ณะ ลวด เตะ.

พระจัว ฮลอวฺ ซัณณา เมียฮ โมเซซ ทอ อัฮ ยัง เฮฺ กังกา ปี ซำ เฮือก เฮฺ พระจัว ซำ เกือฮ ปี เคริง ตัง พระจัว ยัง โมเซซ มัฮ กำ ซัณณา ปี อัฮ อาอืง พระเมซซิยา ซำ แม

พระจัว ฮลอวฺ ซัณณา เมียฮ เดวิด ยัง เฮฺ ซำ ไก ปี อาแมะ ติ ปุย ออก เนวิม จัดเจือ ดาวิด ซำ เปียน จัวเนีย ซะแพระ ปุย ยะ พระจัว เปียน กะซัด ตะลวด มัฮ พระเมซซิยา ซำ ออก เนวิม กวน ซอวฺ ดาวิด.

ณะ เกือฮ ปี เคริง ตัง พระจัว มาวฮ เอิง มัฮ เยเรมี พระจัว ฮลอวฺ ซัณณา อาอืง ยัง เฮฺ พระจัว ซำ เกือฮ ซัณณา ครอวฺ ปี อู เมือน ยัง ปี เกือฮ ละ มู อิซราเอล นึง มอ ซีนาย ซัณยา ครอวฺ เฮฺ พระจัว จอด อาอืง กดมาย ยะ กอวฺ เตะ นึง อาพาวม ปุย ยะ พระจัว ปุย มู เฮฺ ซำ โยง ปี มัฮ พระจัว เตะ ตู เตะ มู ทอ ซำ เปียน ปุย ยะ พระจัว มัฮแม พระจัว ซำ ยวก ฮมับ พิด ตัง เอิก ยะ มูทอ พระเมซซิยา ซำ เปียน ปุย รอง ยุฮ ซัณยา ครอวฺ เฮฺ

ปุย ปี เคริง ตัง พระจัว เคริง ปุย เอิง เกือฮ ปุย โยง ปี มัฮ พระเมซซิยา อัฮ ยัง พระจัว เฮฺ ซำ เปียน ปุโรฮิด เปียน ปุย เคริง ตัง พระจัว เมียฮ กะซัด ปุย ปี เคริง ตัง พระจัว ติ ปุย ฮมอง เคริง พระจัว ดอ เคริง พระจัว ละ ปุย เคริง ปุย เอิง พระจัว ซัณณา อาอืง ซำ ดัว พระเมซซิยา ปี เคริง ตัง พระจัว เนวิม

ปุโรฮิด จัว อิซราเอล ฮลอวฺ ตาน ซัด ละ พระจัว อาไซจ ฮมับ ยะ ปุย เคริง ปุย ปี ฮลอวฺ ยุฮ ปี พิด กำทอ มู กอวฺ เอิง ตัง เอิก ซำ ปุน ตุด ยะ เตะ ปุโรฮิด ปอ เอิง ปุย เคริง ปุย ละ พระจัว พระเมซซิยา ซำ เปียน ปุโรฮิด ปี ไมจ ซำ ตาน กอวฺ เตะ เปียน ปีตาน ซะงะ ซะงอม ละ พระจัว.

กะซัด ทอ อวน ปี เปียน จัวเนีย ซำ เลฮ ตุด ตาม ปี ยุฮ ปุย ปี อาอืก กะฆลาวม กอวฺ เอิง พระเมซซิยา ซำ เปียน กะซัด พรอวม ซำ ณาวม นึง ตัง อี ยะ กะซัด ดาวิด ปี มัฮ ตะ เณือะ เอิง ซำ ซะแพระ เดบ โลก ตะลวด ซำ เลฮ ตุด ตาม ณะ ยุฮ เอิง

ปุย ปี เคริง ตัง พระจัว อวน โยะ กังกา เตะ ปี กิว เมียฮ พระเมซซิยา มาลาคี ปุย ปี เคริง ตัง พระจัว ติ ปุย อัฮ อาอืง ยัง เฮฺ ซำ ไก ปี เคริง ตัง พระจัว ปี ระ ลวน ติ ปุย ซำ ฮาอืก กา ซำ เพียฮ พระเมซซิยา อิซยา ปี เคริง ตัง พระจัว อัฮ อาอืง พระเมซซิยา ซำ เอน กึด นึง ปี เครฮ จี มีคา ปุย ปี เคริง ตัง พระจัว อัฮ อลอวฺ ยัง เฮฺ พระเมซซิยา ซำ กึด ตอวฺ เมิง เบธเลเฮม

อิซซยา ปุย ปี เคริง ตัง พระจัว อัฮ อาอืง พระเมซซิยา ซำ อาอืก ตอวฺ เมิง กาลิลี พระเมซซิยา ซำ อาฆาอืง ปุย เคริง ปุย ปี เซ อาพาวม กำทอ ดอ อิซะระพาบ ปุย ปี ราว นึง ฮมับ อัฮ ยัง เฮฺ พระเมซซิยา ซำ เกือฮ ปุย ซอวฺ เกือฮ เเฮีย เกือฮ ปุย เฮลือก เกือฮ ฮมอง ปี อัวะ เกือฮ แกฮ เคริง ปุย จัก เกือฮ แกฮ โยะ ปุย เย แกฮ เฮว แม

อิซยา ปี เคริง ตัง พระจัว อัฮ ยัง เฮฺ ปุย อู ณอม รับ เอิง มัฮแม แกละ โยะ พระเมซซิยา อู ไก ซาเฮด มัฮแม ปี เคริง ตัง พระจัว ไฮน ทอ อวน อัฮ อาอืง

ปี เคริง ตัง พระจัว ไฮน ทอ เคริง ลอก พระเมซซิยา อัฮ ยัง เฮฺ พระเมซซิยา ซำ ยุม เกะ อิซซะยา ปี เคริง ตัง พระจัว อัฮ ยัง เฮฺ ปุย ซำ เทอก นึง เบน เอิง เณือ เอิง มูทอ ซำ บวก พรวก กำทอ ยุม ซอวฺไซน ลวน ครา แม มีมัก เอิง ปัง อู ฮลอวฺ ยุฮ ปี พิด ติ เมด.

ปี เคริง ตัง พระจัว เคริง ปุย เคริง ลอก พระเมซซิยา ยัง เฮฺ พระเมซซิยา ปัง มัฮ ปุย ซะงะ ซะงอม ลวน ไก เตว ฮมับ นึง ติ เมด พระเมซซิยา ยุม มัฮ ณะ ซำ รับ ตุด มู เอะ เคริง ปุย ณะ เลฮ พะจัว ตุด เกะ เกือฮ ปุย แม ไมจ เมียฮ พระจัว เฮฺ มัฮ เหดพล ยุฮ มัน พระจัว คอวฺ เกือฮ พระเมซซิยา ครา ลวน มีมัก เตะ.

ปุย ปี เคริง ตัง พระจัว อัฮ อาอืง ยัง เฮฺ พระเมซซิยา ปัง ยุม มัฮ แม พระจัว เกือฮ แม เอิง แม ไอน ณะ ยุม เมียฮ ณะ กอวฮ ไอน เอิง พระจัว เกือฮ ปี ยุฮ เตะ โฮยด ณะ โจย ปุย ฮมับ ตัง เอิก เกือฮ เอิง ลวด มัฮ ณะ กึด รอง กำ ซัณณา ครอวฺ ยัง.

พระจัว ปอวฮ อาเอะ เกือฮ ปุย ปี เคริง ตัง เตะ โยง ปี มัฮ พระเมซซิยา มัฮแม พระเมซซิยา ติ เลฮ กึด เตว เมือ ปุย ปี เคริง ตัง พระจัว เฮิง เคริง ลอก แมด ฮาอืก มก ปาอืง อาเยือะ ฮอวฺ เนวิม แมด ฮาอืก เมือ เอิง พระจัว ดัว พระเมซซิืยา เลียก ตะ โลก

เลือง เฮฺ ออก เนวิม พระธรรม ปฐมกาล 3:15,12:1-3 เฉลยธรรมบัญญัติ 18:15; 2 ซามูเอล 7 เยเรมีย์ 31 อิสยาห์ 59:16 ดาเนียล 7:14 มาลาคี 4:5 อิสยาห์ 7:14 มีคาห์ 5:2 อิสยาห์ 9:1-7; 35:3-5:61: 53 สดุดี 22:18; 35:19; 69:4; 41:1 เศคารียาห์ 11:12:13 อิสยาห์ 50:6 สดุดี 16:10-11.