27. เลือง ปุย ซะมาเรีย ไมจ ลวน อะพาวม

ไก ติ ซะแงะ ไก อาจาน จัวยิว ปี โยง ลวน กดมาย นึง เฮว ละ พระเยซู ซำ ทดลอง พระเยซู อัฮ ยัง เฮฺ อาจาน เอ๊า ซาวบ อัฮ ยุฮ ยัง มัน ซำ เกือฮ เตะ ไก ชีวิด ตะลวด พระเยซู อัฮ ยัง เฮฺ ตอวฺ กดมาย พระจัว เคียน อาอืง ยัง มัน.

ปี โยง กดมาย ทอ อัฮ ยัง เฮฺ "กดมาย ยะ พระจัว อัฮ ยัง เฮฺ ตอง ปะ รัก พระจัว ยะ เตะ อาอืก อาพาวม อาอืก เรียง อาอืก เดียน ปะ มัฮแม รัก ปุย เฟียน เณือะ เฟียน ฮมา ยัง รัก ปะ กอวฺ เตะ" พระเยซู อัฮ ยัง เฮฺ ลัง ลอก ปี อัฮ ปะ เฮว ยุฮ ยัง ทอ กอวฺปะ ซำ ไก ชีวิด ปะ.

มัฮแม ปี โยง ลวน กดมาย ทอ กวด อวด กอวฺ เตะ มัฮ ยัง ปุย ไมจ ปุย เบิง กำทอ ไฮมน แม พระเยซู ยัง เฮฺ มัฮ เปน ปี มัฮ ปุย เฟียน เณือะ เฟียน ฮมา ยะ ปะ

พระเยซู ยวก เลือง ลัง ติ เลือง ยัง เฮฺ ไก ปุย ยิว นึง ติ ปุย ออก เนวิม เมิง เยรูซาเลม ซำ เฮว เมิง เยรีโค.

เมือ เฮว ปี อาแมะ ทอ ตอวฺ คระ ไก จอน นึง ติ มู เบน ฮมอ ทอ เอียะ อาเอะ ยัง เคริง ยัง ปี ไก ยะ ฮมอ ทอ เบน เอิง ปอ ซำ ยุม กำทอ มูทอ ตอ

โฮยด ทอ ปอ เตว เดน เตะ ไก ปี ซะตอก ซาดซะนา นึง จัวยิว ติ ปุย เฮว เค คระ เตะ ทอ แมด เพีย ซะแดะ ปีซอวฺ ปี ซะตอก ซาดซะนา เฮว โยะ ฮมอทอ ลอก ปน ลอก เบน กอวฺ เอิง เว เฮว คระ ไฮน. แคด อู โยะ อู ฮมอง ปี อาแมะ ปี กวด เกือฮ ปุย โจย เตะ มัฮแม ปี ซะตอก ซาดซะนา ยิว เฮว แม คระ ยะ กอวฺ เตะ.

โฮยด ทอ ปอ เตว เดน เตะ ไก แม ปุย เลวี นึง ติ ปุย เฮว คระ ทอ เลวี มัฮ ปุย ยิว ปี ยุฮ กา โจย อาจาน ตะ วิหาน ปุย เลวี ทอ เตือง เฮว คระ ไล กะออ ทอ อู เนียน อู นอก ปี อาแมะ ปี ลอก ปน ลอก เบน ทอ

ไก แม ปุย นึง ติ ปุย มัฮ ปุย จัว ซะมาเรีย เฮว ละ คระ ทอ จัว ซะมาเรีย มัฮ ลอวฺ จาดเจือ ยิวปี เณือะ เมียฮ ปุย จาดเจือ ไฮน ปุย ซะมาเรีย ทอ เมียฮ ปุย ยิว ลอก เตว โปะ เตะ ปุย ซะมาเรีย เคริง เมียฮ ปุย ยิว ทอ กอวฺ เอิง ลักพาวม ลวน นึง ตะ ปี ลอก ปน ทอ กำทอ ซะแพระ ปอ แพล ฮมอทอ

จัว ซะมาเรีย ปุย ทอ ยวก ฮมอ ทอ นึง ฆอ ลา ยะ เตะ ปา เฮว ตะ โรงแรม ฮิม คระ ทอ ปืน ซำ ปืน เนียน ฮมอ ทอ ไมจ.

แมด ฮาอืก แม ติ ซะแงะ ปุย ซะมาเรีย ออก เฮว เกือฮ อาอืง มาวฮ ละ ปี เนียน โรงแรม ทอ อัฮ ลัง ยัง เฮฺ ซะแพระ ปี อาแมะ ทอ ปืน จอวฺ มาวฮ โซะ พะ ปี เกือฮ เอ๊า ละ ปะ ปืน มัฮแม อัฮ ซำ บอวฺ แม ละ ปะ เมือ แม เอ๊า.

กำทอ พระเยซู ไฮมน แม ปี โยง ลวน กดมาย ทอ ยัง เฮฺ กอวฺมะ อำ กึด ปะ ยัง มัน ปี อาแมะ ละอวย ปุย ทอ อำ มัฮ เปน ปี มัฮ ปุย เฟียน เณือะ เฟียน ฮมา ยะ ปะ ปี ลอก ปน ลอก เบน ทอ กอวฺ เอิง อัฮ ยัง เฮฺ ปุย ปี ลักพาวม ตะ ปี อาแมะ ทอ พระเยซู ดอ ละ ปี อาแมะ ทอ กอวฺ ปะ เอน ยุฮ ยัง ทอ.

เลือง เฮฺ ออก เนวิม พระธรรม ลูกา 10:25-37