17. เลือง ซัณณา ยะ พระจัว ละ ดาวิด

ซาอูล มัฮ กะซัด อาเกือ ลอบ ปุย ยะ จัว อิซราเอล มัฮ ปี ฮลวง มัฮ ปี ไมจ มัฮ ยัง ปี กวด เอียะ มู อิซราเอล ซาอูล มัฮ กะซัด ปี ไมจ ละอา ละโอย เนวิม ณะ เปียนระ ตอวฺ จัว อิซราเอล ซาอูล มัฮ ปี ไก ลวน แมด เดน ซาอูล เปียน ปุย อู ไมจ อู จะ เนิง ปี อัฮ พระจัว กำทอ พระจัว รอยฮ ปุย ครอว เกือฮ เปียน กะซัด ปี อู เมือน ซาอูล.

พระจัว รอยฮ ปี อาแมะ จัว อิซราเอล ติ ปุย มาวฮ เอิง มัฮ "ดาวิด" เกือฮ เปียน กะซัด เตียน ซาอูล ดาวิด มัฮ ปี เลียง แกะ ปี ออก เนวิม ยวง เบธเลเฮม ซะแพระ แกะ ยะ เปือะ เตะ ดาวิด มอก ซิงโต เมียฮ เคระ ปี เฮว เมิก กก แกะ ดาวิด มัฮ ปุย ถือ เตว กอวฺ เตะ มัฮ ปุย เบิง ดาวิด มัฮ ปุย ปี อาอืง อาพาวม เตะเมียฮ พระจัว เนิง ลวน ปี อัฮ พระจัว.

แมด เดน ดาวิด เลียก เปียน ตะหาน ฮลอวฺ เปียน ฮัวนา ตะหาน มัฮ คาว แกฮ ลวน มัฮ เปลีย ดัง ดาวิด ดา อารุบ เมียฮ โกไลอัท ตะหาน ปี รึ ลวน แกฮ ลวน ฮลวง พะ ดาวิด เปียน ละอวย เตา มัฮ แม พระจัว โจย ดาวิด เมียฮ ตะหาน ยะ อิซราเอล ลวด พะ ดา อารุบ เมียฮ ซัดตรู แมด ดาวิด ปืน แป ซัดตรู ยะ เตะ เคริง ปุย เอิง ยวกลือ ดาวิด รักลวน ดาวิด เฮิง ลวน ดาวิด เนือง เอียะ ปืน แป ซัดตรู ยะ อิซราเอล.

ซาอูล คอย ลวน ดาวิด ทอ ณะ รัก ลวน ปุย ยวง เนือง ซะ ริ ฮมอก ดาวิด ทอ มัฮแม ดาวิด ทอ บละ เมาะ พะ ซาอูล ไก ติ ซะแงะ ซาอูล เลม มอก ดาวิด ซาอูล เลียก ตะ กะไน ทำ ณะ เมาะ ดาวิด กะรอ มัฮแม ซาอูล อู โยะ ดาวิด ทอ อาอืก ซะไดจ เมียฮ มัฮ อัฮ มอก ปืน มอก มัฮแม ดาวิด อู มอก เอิง มัฮ คาว ซาอูล มัฮ ปี รอยฮ พระจัว กำทอ ดาวิด เฮก ละเปะ ซาอูล อาเซียะ นอวฺ เอิง มัฮ ณะ เกือฮ โยง เอิง ดาวิด ซำ มอก เตว ซาอูล ทอ.

โฮยด ทอ ซาอูล ยุม ณะ ดา เตะ อารุบ ดาวิด ฮลอวฺ เปียน กะซัด อง ครอวฺ ยะ จัว อิซราเอล ปุย อิซราเอล ปอ ลวน อาพาวม ดาวิด มัฮ คาว ดาวิด มัฮ กะซัด ไมจ ลวน ปืน มัฮ เฮว ดา อา รุบ ดาวิด ทอ กะออ กะเอะ พระจัว ปันปวน ละ ดาวิด เกือฮ เอิง ปืน แป ปุย เคริง จวง เมือ เปียน ดาวิด ทอ กะซัด จัว อิซราเอล เมิง อิซราเอล เปียน เมิง ปี ไก ลวน ดาวิด ทอ เกือฮ เมิง เยรูซาเลม เปียน เมิง ระ ยะ จัว อิซราเอล.

ดาวิด กวด โบะ พระวิหาน ณะ ซำ เกือฮ ปุย อิซราเอล เคริง ปุย ฮลอวฺ ไหว ยวกลือ มัฮแม ณะ ตาน ซัด กะรอ ไก ปาอืง อาเยือะ เนวิม จัว อิซราเอล เฮว ไหว พระจัว ตาน ซัด นึง เตน ณะ เจวิบ โปะ เตะ ณะ โบะ โมเซซ อาอืง ลัง.

พระจัว ดอ ละ นาทาน ปี เคริง ตัง เตะ เกือฮ เฮว ดอ ละ ดาวิด อัฮ ยัง เฮฺ กอวฺมะ ปะ แกฮ ยุฮ เตว พระวิหาน มัฮ คาว แตะ กอวฺมะ ยุก ลวน ปะ ตะฮนำ ณะ ดา ปะ อารุบ ปะ ปืน โบะ เตว วิหาน ละ เอ๊า เอ๊า ซำ เกือฮ กวน กอวฺปะ โบะ ละ เอ๊า เอ๊า ซำ ปันปวน เฮิง ลวน ละ ปะ ซำ ไก ปี อาแมะ นึง ติ ปุย ปี ออก เนวิม จัดเจือ ยะ กอวฺปะ ซำ เปียน จัวเนีย ปุย ยะ เอ๊า ซำ เปียน ลอบ กะซัด ตะลวด ปี อาแมะ ทอ มัฮ พระเมซซิยา พระจัว รอยฮ อาอืง โจย ปุย เคริง ปุย เกือฮ ลวด พะ ฮมับ.

แมด ดาวิด ฮมอง ยัง เฮฺ กอวฺ เอิง ยวกลื อันพระจัว ยะ เตะ มัฮ คาว พระจัว เกือฮ เกียด ระ ลวน ลัง เมียฮ ปันปวน เฮิง ลวน ละ ดาวิด ณะ ฮลอว์ ซัณณา ลัง มัฮแม ดาวิด อู โยง ปี ซำ ยุฮ พระจัว ทอ ลัง มัฮแม จัว อิซราเอล ตอง มอง ฮาอืก ติ เปือน เนวิม เตือน พระเมซซิยา ซำ เอน ลัง.

ดาวิด ทอ ฮลอวฺ เปียน จัวเนีย ยะ มู อิซราเอล ยุฮ ปี เซอ ปี ไมจ ลวน เดน ยุฮ ยัง ทอ มัฮแม พระจัว ฮลอวฺ ปัน ปวน บลัง ยัง ทอ ปัง ยัง ทอ มะกวด เอิง ดาวิด ฮลอวฺ ยุฮ ฮมับ ระ ลวน.

เมือ ดา ปี อารุบ ตะหาน ปี แกฮ ยะ ดาวิด ตัง เอิก เฮว ดา อา รุบ ดาวิด ทอ ออก เนียน ตะปอก นึง วัง ยะ เตะ โยะ ปี อาเปิง ไมจ ลวน มาวฮ มัฮ บัทเชบา ฮาวม เอีย เตะ

กอวฺ เอิง ลัง เนียน เปฮ กะ ไฮน กอวฺ เอิง เกือฮ แม ปุย ยะ เตะ ปา ปี อาเปิง เลียก ละ เตะ ตะวัง กำทอ ไอจ เมียฮ ปี อาเปิง ทอ โฮยด ทอ เกือฮ แม ปี อาเปิง ทอ แม เอน เณือะ ยะ เตะ ปอ เตว เดน เตะ บัทเชบา ตอม เคริง เตะ ละ ดาวิด ดอ ณะ เฆียง เตะ ลัง .

เมือ อาดอวฺ ณะ ดา เตะ อารุบ อุรียา ปี อาแมะ ยะ บัทเชบา มัฮ ตะหาน ปี แกฮ ลวน ยะ ดาวิด ทอ อาเตือะ แม เอน ณะ ดา เตะ อารุบ ดาวิด จอวฺ อุรียา เอน อาอืก เณือะ ยะ เตะ เมียฮ เอน ละ บัทเชบา มัฮแม กอวฺ เอิง อู ณอม เฮว โฮยด ทอ ดาวิด จอวฺ แม อุรียา เฮว ดา อารุบ กำทอ จอวฺ ฮัวนา ตะหาน เกือฮ อุรียา ดา อารุบ ณะ ตุกณัก ลวน มัฮ ณะ ซำ เกือฮ ปุย มอก ยุม กะรอ.

แมด อุรียา ยุม กะรอ ดาวิด ทอ เณือะ เมียฮ บัทเชบา ปี อาเปิง ทอ เกะ กวน อาแมะ เตะ ติ ปุย มัฮแม พระจัว จะราย ลวน ละ ดาวิด มัฮ คาว ยุฮ ยัง ทอ พระจัว ดอ ละ ปี เคริง ตัง เตะ นาทาน กะดอวฺ ทอ ตอง ยุม เปียน คาว ฮมับ ลวน ปี ยุฮ ดาวิด กำทอ ดาวิด ณอม รับ เอิง แม อาเตือะ อาพาวม เตะ ณะ ฮมับ ปี ฮลอวฺ เตะ ยุฮ เอิง มัฮแม พระจัว ยวก ตุด เอิง ละ ดาวิด ดาวิด กำทอ เนิง ปี อัฮ พระจัว ตะลวด ปัง เจวิบ ปีซอวฺ ตุกณัก

ปัง ยุฮ ยุฮ ณะ ออ ณะ เอะ กูดอวฺ ทอ ยุม มัฮ คาว ฮมับ ยะ ดาวิด ทอ เมือ ไก ดัง ดาวิด ทอ เอียกปุ ดา นอง เอีย อารุบ เปียน คาว ณะ อู ดาวิด ทอ อู เซอ อาพาวม เมียฮ พระจัว แมด เดน ดาวิด อู จะ กวดไก อำนาด มัฮแม พระจัว อาอืก ดัง เมียฮ ซัณณา ยะ กอวฺ เตะ ละ ดาวิด มัฮ ปี อาเปิง ยัง บัทเชบา เกะ กวน อาแมะ เตะ ละ ดาวิด ดอวฮ มาวฮ เอิง มัฮ ซาโลมอน

1 ซามูเอล 10:15 -19 ,24:31 2 ซามูเอล 5:7 11-12