35. เลือง เปือะ ปี ลักพาวม ตะ กวน เตะ

ไก ติ ซะแงะ พระเยซู ซะตอก มู ปี เกียบ พาซี เมียฮ มู ปี มับ ณาวม อวด พระเยซู ตัง มู เตะ

ฮัวนา ปี ซะตอก ซาดซะนา อวน เกย โยะ เตะ พระเยซู เณือ มู ปี มับ อัฮ ยัง ปู เฮมว เอิง มูทอ อัฮ เมียฮ พระเยซู เมียฮ ปุย ไฮน กำทอ พระเยซู ฮู เลือง เฮฺ ละ มูทอ ตัง เอิก อัฮ ยัง เฮฺ

ไก ปี อาแมะ ติ ปุย ไก กวน อาแมะ ละอา ปุย กวน อาแมะ เตียะ เอิง อัฮ ยัง เฮฺ ละ เปือะ เตะ เปือะ เอ๊า กวด เอียะ คะกุน เตะ ปะเดีย กำทอ เปือะ ฆรอวฺ มาว เครีย ยะ เตะ เกือฮ ละ กวน อาแมะ แตว เตะ ตัง เอิก.

เดน เตว กวน อาแมะ แตว เริก มาว เครีย ปี ไก ยะ เตะ ตัง เอิก ออก เฮว เมิง ซะเงีย เอีย จอวฮ มาว เครีย ยะ เตะ ตัง เอิก.

โฮยด ทอ ซะเอาะ ซะโอยน ไปลน การอ มัฮแม กอวฺ เอิง อู จะ ไก มาวฮ ซำ ดี ปีกก ปีซอวม กำทอ เฮว ซาวบ ยุฮ กาน เฮว เลียง เลจ ลำมัก ลวน กวด ซอวม ปอ กวด ซอวม อาวบ ยะ เลจ

ฮาอืก อาแคะ กอวฺ เอิง อัฮ ยัง เฮฺ ละ กอวฺ เตะ เอ๊า ซำ ยุฮ อะ มัน กะโรย คีครา เปือะ เอ๊า ตัง เอิก ปีกก ปีซอวม อู จะ อาอืก กก อาอืก ซอวม เอ๊า ยุฮ มัน คอวฺ อาอืก ไปรน กะโรย เอ๊า ซำ เอน ละ เปือะ เตะ ปอ เปียน ครา เปือะ เอะ ติ ปุย

กำทอ กอวฺ เอิง กอวฮ เอน เณือะ ยะ เปือะ เตะ มะ ไก ดัง กอวฺ เอิง ซะเงีย เปือะ เอิง โยะ ฮมอ ทอ ลักพาวม ลวน ตะกวน เตะ ตอ ออก เฮว ลัง ออวม กวน เตะ

กวน เอิง อัฮ ยัง เฮฺ " เปือะ เอ๊า ฮลอวฺ ยุฮ มับ ละ พระจัว ละ กอวฺมะ เคด เฮ เฮว เอ๊า ชอม เตว อะ มัฮ กวน กอวฺปะ

มัฮแม เปือะ เอิง อัฮ ยัง เฮฺ ละ ปี จอวฺ เตะ ติ ปุย " จี ไจ เฮว เริก อาเปะ ปี ไมจ ลวน เกือฮ ละ กวน เอ๊า ซอวบ แม มาวฮ ติ วง ดอวฮ ละ เกะ มัฮแม ฮักจวง ติ กู กำทอ มอก แม กวน แกะ เตะ มู เอะ ตัง เอิก ซำ เลียง โปะ เตะ มัฮ คาว กวน อาแมะ เฮฺ เอ๊า อี ยุม แม ไอน แม อีเครีย แม เอน เจวิบ เมียฮ โปะ เตะ.

โฮยด ทอ มู ปุย ชะลอง โปะ เตะ มัฮแม กวน อาแมะ รอง เอน เณือะ ออก เนวิม ยุฮ เตะ กาน ฮมอง ดอยฮ เซียง เจีย อัฮ ยัง เฮฺ มัฮ มัน ทอ.

แมด กวน อาแมะ รอง โยะ มูทอ ชะลอง ปุ เตะ เอน เณือะ ดวก จะไร อู กวด เลียก ตะเณือะ เปือะ ออก ลัง อัฮ ยัง เฮฺ เลียก ตอวฺ เณือะ เฮฺ ชะลอง เมียฮ โปะ เตะ ฮมอ ทอ อู ณอม เลียก.

กวน อาแมะ รอง อัฮ ยัง เฮฺ เอ๊า ยุฮ กาน ละ มะ อี ไก คะดอวฺ เนวิม ไก เตว ติ จวง ณะ แลฮ อะ เคริง กอวฺมะ กวน แกะ แตว เตะ อู มะ เกย เกือฮ เตะ ละ เอ๊า เฮว ชะลอง เมียง ปู เฮมว เตะ กวน อาแมะ เฮฺ ปะ เอีย จอวฮ มาว ยะ มะ ณะ อู ไมจ อู ลอก แมด เอน แคด มะ ชะลอง มก ปะ แกะ ตุย ละ.

กวน กอวฺปะ อาอืก ปะ เมียฮ เอ๊า ตะลวด อาเอะ เคริง ยัง ปี ไก ยะ เอ๊า ตัง เอิก เอ๊า ไก ซิด ชะลอง เอิง มัฮ คาว ปุ ปะ อี ยุม ปีเดีย กอวฺ เกะ อี แม ไอน กอวฺ เครีย มู เอะ อี แม เจวิบ เมียฮ โปะ เตะ เปือะ เอิง อัฮ ยัง เฮฺ ลัง.

เลือง เฮฺ ออก เนวิม พระธรรม ลูกา 15:11-32