22. ณะ กึด ยอน
เฆาะ พระเจ้า ดอ อาอืง ละ ปุย ยะ เตะ เมียฮ เตวาดา กำ ปีเคริงตังพระจัว. แมด โฮยด ทอ ปาอืง อาเยือะ เนวิม ยัง เฮฺ พระจัว เคริง เตว เมียฮ ปุย ยะ เตะ. ไก ติ ซะแงะ เตวาดา เอณ ดอ ปี อัฮ พระจัว ละ ปุโรฮิด เศคาริยาห์. เศคาริยาห์ เมียฮ ปีอาเปิง ยัง เตะ เอลิซาเบธ ปุย ละอา มัฮ ปี ไมจ เอเลซาเบธ อู แกฮ ไก กวน ซะแกด.
เตวาดา ดอ ละ เศคาริยาห์ อัฮ ยัง เฮฺ ปีอาเปิง ยะ ปะ ซำ ไก กวน อาแมะ ดอวฮ มาวฮ มัฮ ยอน. ปุย เฮฺ อาโปะซะงะ ซะงอม ยะ พระจัว ซำ อาอืก เมียฮ เกะ. โฮยด ทอ เกียม อาอืง ปุย ยะ พระจัว ละ พระเมสสิยาห์. เศคาริยาห์ อัฮ ยัง เฮฺ ปีอาเปิง ยะ แอะ อีกวด ลวน อำ ซำ แกฮ ไก ดัง กวน ยัง มัน. เอ๊า โยง ยัง มัน เลือง เฮฺ ซำ กึด เอิง.
เตวาดา อัฮ ละ เศคาริยาห์ เอ๊า ออก เนวิม พระจัว เอณ ดอ ปี ไมจ ละ มู กอวฺปะ. มัฮ คาว กอวฺมะ อู ปะ เจือ เอ๊า กอวฺมะ ปะ จะ แกฮ เคริง เตว เคด เฮฺ เฮว อู กวน ปะ ติ เกะ. กำทอ เศคาริยาห์ จะ แกฮ เคริง เตว มัฮ แม เตวาดา ออก เฮว พะ เศคาริยาห์ โฮยด ทอ เศคาริยาห์ เอณ เณือะ เตะ มัฮแม ปี อาเปิง ยัง เฆียง.
แมด เอลิซาเบธ เฆียง กาย แลฮ เคะ เตวาดา องค์ไพร แถลง เตะ ละ เอียก ปุ เอลิซาเบธ. มาวฮ มัฮ มารี. กอวฺ เอิง มัฮ ปี เครฮจี ไก ปี เปลีย ยะ มัฮ โยเซฟ มาวฮ เอิง. เตวาดา อัฮ ยัง เฮฺ ลัง กอวฺมะ ซำ เฆียง ปะ ซำ เฆะ ปะ กวน อาแมะ เตะ ติ ปุย ปืน มะ อี กึด ดอวฮ มาวฮ เอิง มัฮ เยซู. กะดอวฺ เฮฺ มัฮ กวน พระจัว ปี ฮลวงลวน ซำ เปียน จัวเนีย ยะ ปะ ตะลวด.
มารี อัฮ ยัง เฮฺ อำ ซำ เปียน ยัง ทอ ยัง มัน เอ๊า มัฮ ดัง ปีเครฮจี. เตวาดา อัฮ ลัง อาโปะซะงะ ซะงอม ซำ เลฮ อาอืก นึง กอวฺมะ ริด อำนาด ยะ พระจัว วำ อาอืก เมียฮ กอวฺมะ. กะดอวฺ เฮฺ มัฮ ปี ซะงะ ซะงอม มัฮ กวน ยะ พระจัว.
แมด เตวาดา โฮยด เคริง ปอ เตว เดณ เตะ มารี เฮว เอีย ละ เอลีซาเบธ .แมด เอลีซาเบธ ฮมอง เคริง มารี ทอ กวน ตะเวียก อะซอ. กำทอ กอวฺ เอิง มวน ลวน อาพาวม มัฮคาว ปี ยุฮ พระจัว ละ กอวฺเอิง โฮยดทอ มารี อาอืก เมียฮ เอลีซาเบธ ละอวย เคะ กำทอ มารี เอณ เณือะ เตะ.
แมด เอลีซาเบธ ทอ เกะ กวน อาเแมะ เตะ เศคาริยาห์ เมียฮ เอลีซาเบธ ดอวฮ มาวฮ เอิง มัฮ ยอน ณะ ดอ ปี อัฮ เตวาดา ทอ ลัง. กำทอ พระจัว เกือฮ แม เศคาริยา แม แกฮ เคริง ยัง ไพรน เตะ. เศคาริยา เคริง ยวกลือ พระจัว มัฮ คาว พระจัว กึด ฮาอืก ละ ปุย ยะ กอวฺ เตะ. กะดอวฺ เฮฺ ซำ เปียน ปี เคริง ตัง พระจัว ฮลวง ลวน ปุย ปี ซำ เคริง เมียฮ ปุย ยะ พระจัว ปุย เคด เฮฺ เฮว แกฮ ปุน ปะ ฮมับ ยะ กอวฺเตะ
__