24. เลือง ยอน ปี เกือฮ พระเยซู รับ บัพติซมา
ยอน กวน เซคาริยา เมียฮ เอลีซาเบท แมด รึ มัฮ ปี เคริง ตัง พระจัว กอวฺ เอิง อาอืก ณะ ซะออ ซะโอย กก ละอาวม แฮ เมียฮ ซะเดา เอียะ คัว อาเปะ ปี ยุฮ เอิง ตะ เฮิก อุด
ปุย เฮิง ณะ ซะออ ซะโอย เฮว ละ ยอน กอวฺ เอิง จอวฺ มูทอ อัฮ ยัง เฮฺ อาเตือะ เป อาพาวม ปะ ณะ อาอืก พระจัว ยะ เตะ.
มูทอ แมด ฮมอง ยอน ทอ ยัง เฮฺ มูทอ อวนอาเตือะ อาพาวม เตะ มัฮแม ยอน เกือฮ ปุย รับ บัพติซมา เตะ ฮัวนา ซาดซะนา เกือฮ ลอวฺ ยอน เกือฮ เตะ รับ บัพติซมา มัฮแม มูทอ อู อาเตือะ อาพาวม เตะ ยุฮ ดัง ฮมับ
ยอน อัฮ ละ มู ปี เคง ซาดซะนา ยัง เฮฺ ซะเอิง อาเตือะ เป อาพาวม ปะ เมียฮ ปี ยุฮ ปะ คอวฺ ทอ เคริง คอวฺ ปี อู ไก เปลฮ ไมจ ซำ ลอก มอก เปว เตะ ตะ งอ ยอน ทอ ยุฮ ยัง ปุย ปี เคริง เตียน พระจัว อาอืง อัฮ ยัง เฮฺ เอ๊า อี ดัว ปี เคริง ตัง เตะ เฮว กังกา กอวฺ มะ ปี เกียม เค คระ ยะ กอวฺปะ
ปุย ยิว อวน ไฮมน ยอน อัฮ ยัง เฮฺ กอวฺมะ มัฮ ปะ พระเมซซิยา ยอน อัฮ ลัง เอ๊า มัฮ เตว พระเมซซิยา มัฮแม ซำ ไก ติ ปุย ปี ซำ เพีย กัง แคะ เอ๊า มัฮ ปี ระ ลวน เอ๊า ชอม เตว ปัง อัฮ ซำ ฮวก ฮักจวง
แมด ซะเอะ มะซะ พระเยซู รับ บัพติซมา เมียฮ ยอน แมด ยอน ทอ โยะ พระเยซู อัฮ ยัง เฮฺ เนียน แกะ ยะ พระจัว ทอ นะ มัฮ ปี ซำ ยวก ฮมับ ยะ ตอวฺ โลก เฮฺ
ยอน อัฮ ยัง เฮฺ ละ พระเยซู ชอม เตว เอ๊า ซำ เกือฮ เอ๊า กอวฺมะ รับ บัพติซมา มัฮ กอวฺมะ ปี ลัง เกือฮ เอ๊า รับ บัพติซมา มัฮแม พระเยซู อัฮ ลัง ยัง เฮฺ อี ลอก ปี ยุฮ กอวฺมะ ชอม กอวฺมะ เกือฮ มะ เอ๊า รับ กำทอ ยอน เกือฮ พระเยซู รับ บัพติซมา ปัง พระเยซู อู ฮลอวฺ ยุฮ ฮมับ
แมด พระเยซู ออก พะ ละอาวม โฮยด รับ บัพติซมา อาโปะ ซะงะ ซะฆอม ยะ พระจัว มัฮ ยัง ไซน กาแก เลฮ นึง พระเยซู กำทอ ไก แม เซียง พระจัว อัฮ ยัง เฮฺ กอวฺมะ มัฮ ปะ กวน เอ๊า ปี รัก ลวน เอ๊า มัฮ ปะ ปี มัฮ ลวน อาพาวม เอ๊า
พระจัว อัฮ ละ ยอน ยัง เฮฺ อาโปะ ซะงะ ซะฆอม อี เลฮ อาอืก เมียฮ ปุย อวน ปี เกือฮ กอวฺ มะ ปี รับ บัพติซมา ปุย ทอ มัฮ กวน พระจัว ไก พระจัว เตะ นอง แมด ยอน โฮยด เกือฮ บัพติซมา ละ พระเยซู กอวฺ เอิง ฮมอง เซียง พระจัว เคริง โยะ แม กอวฺพระจัว มัฮ พระเยซู กอวฺ เอิง โยะ แม อาโปะ ซะงะ ซะฆอม.
เลือง เฮฺ ออก เนวิม พระธรรม มัทธิว 3 มาระโก 1: 9 -11 ลูกา 3:1 - 23