19. ปุย ปี เคริง ตัง พระจัว

ตะลวด ประวัดติซาด ยะ มู อิซราเอล พระจัว ดัว ปี เคริง ตัง เตะ เลฮ มัฮแม ปี เคคริง ตัง พระจัว ฮมอง คาว เนวิม พระจัว เลฮ ดอ คาว พระจัว ละ มู อิซราเอล.

เอลียา มัฮ ปี เคริง ตัง พระจัว เมือทอ อาฮับ มัฮ กะซัด ยะ มู อิซราเอล อาหับ มัฮ ปู อู ไมจ ติ เมด มัฮ ปี ปา มู อิซราเอล ไหว พระปลอวม มาวฮ เอิง มัฮ บาอัล เอลียา อัฮ ยัง เฮฺ ละ อาฮับ จะ ไก เตว แฮละ ทอ เมียฮ ละอาวม ปี ราว ตะ เมิง อิซราเอล ปืน อู เอ๊า เกือฮ ละ ปะ กำทอ อาฮับ จะราย

พระจัว จอวฺ เอลียา เฮว นึง ตะงวด ณะ ซะออ ซะอยน เกือฮ เอิง เมาะ พะ กะซัด อาฮับ ปี อัฮ ซำ มอก กอวฺ เอิง เคริง ซะ เคริง ปู ไซน ทอ เริก ตอวฺ เมียฮ คะนม ปัง ลัง กะซัด อาฮับ ทอ เมียฮ ตะหาน ซาวบ เอลียา อู โยะ เอิง มัฮแม มูทอ อู เจวิบ เอลียา กะรอ ซะออ ซะอยน ละอาวม ตะงวด ปอ ซะออ เอิง

กำทอ เอลียา เฮว นึง เมิง ไฮน ทอ ตะ เมิง ทอ ไก แมฮาง เมียฮ กวน อาแมะ เอิง ติ ปุย ปีกก ปี ซาวม ซำ อาอืก มัฮแม ณะ ทอ ซะแพระ ดัง เอลียา พระจัว เกือฮ มัฮแม พระจัว เกือฮ ตอง อาเลียง เมียฮ ปัง ละเอาฮ อู เอิก มูทอ ไก ปีกก ปีซวม ปอ ตะลวด เมือ ซะออ ซะฮยน เอลียา อาอืก กะรอ ละอา ละโอย เนวิม

โฮยด ทอ ละโอย เนวิม เมียฮ กะบละ พระจัว ดอ ละ เอลียา เอน เปะ นึง เมิง อิซราเอล เคริง เมียฮ กะซัด อาฮับ อัฮ ยัง เฮฺ ลัง เอ๊า ซำ เกือฮ แม อัฮ แฮละ แม ราว แมด กะซัด อาหับ ทอ โยะ เอลียา อัฮ ลัง ปี ยุฮ ปี ตุก ปี ณัก เฮฺ เอลียา อัฮ ลัง กอวฺปะ ปี ยุฮ ปี ตุก ปี ณัก กอวฺมะ เปว ปะ พระยาเว พระจัว เนวิม เฮว ไหว ปะ พระบาอัล ปา มู อิซราเอล ตัง อาอืก เอิง เฮว นึง มอ คาเมล.

มู อิซราเอล ตัง เอิก นึง เมิง อิซราเอล เมียฮ ปุย ปาอืง อาเยือะ เมียฮ ละฮวน ปุย เฮว นึง มอ คาเมล เอลียา อัฮ ยัง เฮฺ ละ มู อิซราเอล อีเดน ลวน ไหว ปะ พระจัว ยะ เตะ ปืน มัฮ พระยาเว พระจัว เนวิม ไหว ปืน มัฮ พระบาอัล พระจัว เนวิม ไหว

โฮยด ทอ เอลียา เคริง เมียฮ ปี จอวฺ บาอัล มอก เมวิบ ไฮมน เตะ เกียม เปียน ปี ตาน ปะ ปู จะ ตอก งอ ทอ เอ๊า ซำ ยุฮ ลอวฺ ยัง ทอ พระนม ปี ตอบ ตะงอ มัฮ พระจัว เนวิม กำทอ ปี รับ พระบาอัล เกียม มัฮแม อู ตอก งอ

โฮยด ทอ ปี จอวฺ บาอัล ปอ ตะ พระบาอัล เฮ บาอัล ละแอะ ไกลจ ซะแงะ มู เอะ ปอ เอิง ปัว เอิง เฮก แม กอวฺ เตะ ตะ มีด กึด เตว อู เอะ ติ ยัง ลอบ.

ซะแงะ ละแอะ ทอ อี ซำ อาอืก เอลียา ทอ เกียม ปี ซำ ตาน เตะ ละ พระจัว ดอ ละ มูทอ ยัง เฮฺ เอียะ ละอาวม ตะ ตอง รึ กัว ละอา ตอง กำทอ โณะ นึง ปี ซำ ตาน ปะ เมียฮ กราน ทอ แจะ ตัง เอิก.

กำทอ เอลียา ปอ เอิง อัฮ ยัง เฮฺ พระยาเว พระจัว ยะ อับราฮัม อิซอัค ยาโคบ ปอ กอวฺมะ ทะแลง กอวฺ เตะ ละ เอะ กอวฺมะ มัฮ ปะ พระจัว ยะ มู อิซราเอล เอ๊า มัฮ ปี รับ จอวฺ กอวฺมะ ตอบ ละ เอ๊า เซียะ นะ ณะ ซำ โยง มู เฮฺ ปี มัฮ กอวฺมะ มัฮ พระจัว เนวิม.

ติ จำ ลำ งอ ราว เลฮ เนวิม มะลอง ตอก ตอวฺ ตอก คอวฺ เมียฮ ปี ยุก กำ ละอาวม ปี เวียด กราน ทอ มู จัวยวง โยะ ปี กึด ทอ ยัง เฮฺ มุ นึง แตะอัฮ ยัง เฮฺ "พระยาเว มัฮ พระจัว พระยาเวมัฮ พระจัว

โฮยด ทอ เอลียา อัฮ แม ยัง เฮฺ ปู จะ เกือฮ มู บาอัล ปืน ตอ กำทอ มู จัว ยวง เฮมิก ปี จอวฺ บาอัล ปา มูทอ ออก พะ การอ เฮว มอก ยุม ตัง เอิก.

โฮยด ทอ เอลียา อัฮ ละ กะซัด อาฮับ "เอน เป เมิง ยะ ปะ ไกลจ ไกลจ แฮละ ระ อี ซำ เพีย" ติ จำ ลำ มะลอง เฟียก กำทอ ราว แฮละ พระยาเว ณุด ณะ ซะออ ซะอยน ทอ ณะ เกือฮ ปุย ทอ โยง กอวฺ เตะ มัฮ พระจัว เนวิม .

แมด อาอืก เมือ ยะ เอลียา พระจัว รอยฮ ปี อาแมะ ติ ปุย มาวฮ มัฮ เอลีชา เปียน ปี เคริง เตียน พระจัว พระจัว เกือฮ ปี ปะราด เฮิง ลวน ออก เนวม เอลีชา ปี ปะราด ติ ยัง ปึด เนวิม อานามาน มัฮ ฮัวนา ตะหาน เปียน โรคเกลน ปอ ลวน ฮลัดนึง กอวฺ เอิง ฮมอง คาว เอลีชา กำทอ ปอ เอลีชา เยือ กอวฺ เตะ เอลีชา จอวฺ อานามาน จืด กอวฺิเตะ ตะ ละอาวม จอแดน อาแลฮ จวง.

อาเกือ เอิง นาอามาน ดวก จะราย อู ยุฮ อัฮ มัฮ เลือง งัว แมด ฮาอืก อาแคะ อาเตือะ อาพาวม ณอม จืด กอวฺ เตะ อาแลฮ จวง ตะ ละอาวม จอแดน ทอ แมด ออก พะ ละอาวม จวง อาแคะ ทอ ยัง เฮฺ เฮีย แม ไมจ ยัง ไพรน พระจัว เยือ เกะ เอิง.

พระจัว ดัว แม ปุย เคริง ตัง เตะ ปาอืง พวน ปุย มูทอ ดอ ละ จัวยวง ปู จะไหว ฮุน ทอ โจย เลือ ปีซอวฺ ปีไซน ยุฮ ปี เซอ ลัก พาวม ตะ ปี ไฮน ทอ ปี เคริง ตัง พระจัว ดอ ละ ปุย ยัง เฮฺ ปืน มะ อู ปะ ณึด ยุฮ ปู อู ไมจ แม เนิง ปะ ปี อัฮ พระจัว มัฮแม พระจัว ซำ เลฮ ตุด ปะ เกือฮ มู กอวฺปะ ไก ณะ พิด.

เคริง จวง มู ปุย เฮิง อู เนิง พระจัว เนือง ซะ มูทอ ยุฮ ปี พิด ละ ปี เคริง ตัง พระจัว เปียน เมือ เอิง มอก ยุม ไก ติ จวง ปี เคริง ตัง พระจัว มาวฮ เอิง มัฮ เยเรมี เฮว วัด นึง ละอาวม มอ ซะออ ลอก คัง นา ยุม ตะ อาปึง แมด นา ยุม กะซัด จอวฺ ปุย ยะ เอิง โจย เอิง เยียง ออก พะ ละอาวม มอ ซะออ ทอ ลักพาวม นึง

ปี เคริง ตัง พระจัว เคริง ดัง เมียฮ พระจัว ปัง มูทอ แกละ โยะ มูทอ อัฮ ละ ปุย ยัง เฮฺ พระจัว ซำ ยุฮ เมียฮ ปะ ปืน มะ อู ปะ เปลียน อาพาวม เตะ อัฮ แม เลือง ซัณณา ยะ พระจัว ยัง เฮฺ พระเมซซิยา ซำ เลฮ แม ติ จวง.

เลือง เฮฺ ออก เนวิม พระธรรม พงกะซัด 16-18 2 พงกะซัด 5 เยเรมี 38