27. เลือง ปี เปลีย ไก ลวน
ไก ติ ซะแงะ ปี เปลีย ไก ลวน เฮว ละ พระเยซู ไฮมน พระเยซู อัฮ ยัง เฮฺ " อาจาน เอ๊า ซำ ยุฮ ยัง มัน เตือม ซำ ไก จีวิด ตะลวด" พระเยซู อัฮ ยัง เฮฺ ลัง ยุฮ มัน กอวฺปะ อัฮ ปะ ปี ไมจ ลวน เมียฮ เอ๊า พระจัว เตะ นอง ปี ไมจ ลวน ปืน มะ กวด ไก จีวิด ปะ ตะลวด เนิง ปี อัฮ พระจัว ทอ.
กอวฺ เอิง ไฮมน พระเยซู อัฮ ยัง เฮฺ " เอ๊า ตอง อะ อวด กด มัน อวน" พระเยซู ทอ ดอ ลัง "ปู จะ มอก ปุย ทอ ปู จะ แลน จุ ปะ ปู จะ บลอวฺ ปู จะ คี อู รัก มะ รัก เปือะ ปะ รัก ปุย เฟียน เณือะ เฟียน ฮมา ยะ ปะ มัฮ ยัง รัก ปะ กอวฺ เตะ.
มัฮแม ฮมอ ทอ อัฮ ยัง เฮฺ "กด ปี อัฮ ปะ ตัง เอิก เอ๊า เนิง เนวิม มะ มัฮ เตะ กะดอวฺ เตียะ" เอ๊า ซำ ยุฮ แม มัน อวน เตือม ซำ ไก จีวิด ตะลวด พระเยซู เนียน ฮมอ ทอ รัก ลวน เอิง.
พระเยซู อัฮ ยัง เฮฺ ลัง ปืน มะ กวด ไก จีวิด ปะ ตะลวด เอน ชอวฺ อาเอะ ยะ ปะ เคริง ยัง กำทอ ฆลอวฺ ละ ปี ตุก ปี ณัก กอวฺปะ ซำ ไก อาเอะ ยะ ปะ เคริง ยัง ตอวฺ มะลอง โฮยด ทอ เครียบ เอ๊า.
แมด ฮมอ ทอ ฮมอง ปี อัฮ พระเยซู ทอ ตัก เตวิม อันนา เอิง มัฮ คาว ไก ลวน อูเอะ ยัง อู กวด เกือฮ อูเอะ เตะ ละ ปุย ไฮน ทอ กำทอ เฮว พะ พระเยซู ทอ.
โฮยด พระเญซู อัฮ ยัง เฮฺ ละ ลูกซิด เตะ ณัก ลวน ปี ไก ซำ ฮลอวฺ เลียก ตอวฺ มะลอง (ณะ อาอืก พระจัว) อูด เลียก ตะ ตอวฺ เคม ไง ดัง พะ ปี ไก ซำ เลียก ตะ ณะ อาอืก พระจัว.
แมด มู ลูกซิด ฮมอง ปี อัฮ พระเยซู ยัง ทอ" มูทอ อาฆราอืง อัฮ ยัง เฮฺ ปืน มัฮ ยัง ทอ มัฮ เปน ปี ซำ ลวด.
พระเยซู เนียน มู ลูกซิด เตะ อัฮ ยัง เฮฺ " ปุย เอะ ปะ แกฮ ยุฮ เตว มัฮ พระจัว นอง ปี แกฮ ยุฮ เคริง ยัง.
เปโตร อัฮ ละ พระเยซู " มู เอะ เปว เอิง เคริง ยัง เมียฮ กอวฺมะ เอะ ซำ ฮลอวฺ มัน อวน.
พระเยซู อัฮ ยัง เฮฺ ลัง มะ เปน ปี เปว เณือะ ฮมา ยะ เตะ เมียง เอียกปุ มะ เปือะ เตะ เมียฮ มาว เครีย คะ มาวฮ เอ๊า ซำ ฮลอวฺ ปัง พะ ไพรน ตอ อาเยือะ เตา มัฮแม ซำ ฮลอวฺ ปะ จีวิด เตะ ตะลวด มัฮแม ปุย อาเกือ ซำ เปียน ปะ ปุย อาแคะ ปุย อาแคะ ซำ เปียน ปะ ปุย อาเกือ.
เลือง เฮฺ ออก เนวิม พระธรรม มัทธิว 19:16-30 มาระโก 10:17-31 ลูกา 18:18-30