36. เลือง พระเยซู ทะแลง กอว เตะ

ไก ติ ซะแงะ พระเยซู ปา ลูกซิด เตะ ละอา ละอวย ปุย มัฮ เปโตร ยากอบ เมียฮ ยอน ( ยอน เฮฺ มัฮ เตว ยอน ปี เกือฮ พระเยซู ฮับ บัพติซมา เตะ) มูทอ ออก เฮว ฮวก นึง มอ ทอ อธิษฐาน

มะ อธิษฐาน พระเยซู กะรอ พระเยซู ออก แซง นึง มัฮ ยัง ซะแงะ มัฮแม อาเปะ ปิง ซะ ปิง มัฮ ยัง เบีย อาวม เคริง กวน ปี ไก ตะ โลก

แมด โมเซซ เมียฮ เอลียา ปี เคริง ตัง พระจัว เปลฮ กอวฺ เตะ แคะ กา มู เฮฺ เกย อาอืก เตะ ตะ โลก เฮฺ มอก พวน อาเยือะ เนวิม กาทอ มูทอ อัฮ อาอืง ณะ ซำ ยุม พระเยซู เดน เตว ซำ กึด นึง เมิง เยรูซาเลม.

มะ เคริง โมเซซ เอลียา เมียฮ พระเยซู เปโตร อัฮ ยัง เฮฺ ละ พระเยซู " มัฮ ปี ไมจ ปืน มะ อาอืก มู เอะ กะโรย" เอ๊า ซำ โบะ ณะ อาอืก เตน ละโอย ตอวฺ ละ พระเยซู ติ ลัง โมเซซ ติ ลัง มัฮแม เอลียา ติ ลัง เตวิม เปโตร ทอ อัฮ ยัง เฮฺ อู โยง กอวฺ เตะ อัฮ มัน.

มะ เคริง เปโตร ทอ ไก แบีย อาวม เปือฮ เลฮ ซะแดะ มูทอ ไก เซียง ออก เนวิม เบีย อาวม อัฮ ยัง เฮฺ " เฮฺ มัฮ กวน ปี รัก ลวน เอ๊า เอ๊า ปอ ลวน อาพาวม เกะ อวด ปี อัฮ เกะ " มู ลูกซิด ตัง ละโอย ฮลัดลวน ปอ เฆา เลฮ แตะ.

โฮยด ทอ พระเยซู ไปน มูทอ อัฮ ยัง เฮฺ " ปู จะ ฮลัด กอวฮ เมอะ" มูทอ แมด เนียน เวียด กอวฺ เตะ โยะ พระเยซู อาอืก กะรอ เตะ นอง

พระเยซู เมียฮ มู ลูกซิด เตะ เลฮ พะ มอ โฮยด ทอ พระเยซู อัฮ ยัง เฮฺ ละ ลูกซิด เตะ "ปู จะ ฮู ปี กึด เฮฺ ละ ปุย " จะ เดน เตว เอ๊า ซำ ยุม เตะ อาแคะ ซำ กอวฮ ไอน แม เตะ โฮยด ทอ มู กอวฺปะ แกฮ ฮู ปัง ละ ปุย กำทอ

เลือง เฮฺ ออก เนวิม พระธรรม มัทธิว 17:1-9 มาระโก 9:2-8 ลูกา 9:28-36