14. เลือง มู อิซราเอล ลง นึง ณะ ซะอฮ ซะอยน

แมด โฮยด ตะปูซาง ดอ กด ปิ ซำ เกือฮ มู อิซราเอล อวด เนิง เตะ. กำทอ มู อิซราเอล ออก เฮว พะ มอ ซีนาย. ตะปูซาง ปา มูทอ เฮว นึง แตะ ปี ซัณณา อาอืง ลัง อัฮ เมิง คานาอัน เมียง. กำทอ เบีฺยฮอาวม เฮว กังกา เอิง ปา มูทอ เฮว นึง เมิง คะนาอัน.

ตะปูซาง ฮลอวฺ ซัณณา อาอืง ละ อับราฮัม อิซอัค เมียฮ ยาโคบ. ตะปูซาง อัฮ ซำ ยวก เกือฮ แตะ ปี ซัณณา อาอืง ละ จาดเจือ เอิง. มัฮแม ปะเดีย แตะ กะรอ ทอ อี ไก ปี อาอืก นึง ละอา ละอวย มู อัฮ กอวฺ เตะ มัฮ ปุย คานาอัน. ยวกลื เตว เนิง เตว ตะปูซาง มัฮแม ไว พระ ปลอมฺ ยุฮ ลวน ปี ชัว.

ตะปูซาง อัฮ ละ มู อิซราเอล ยัง เฮฺ "มู กอวฺปะ ตอง ปะ กลา มู คานาอัน ตัง เอิก เอิง ออก พะ แตะ ทอ. ปู จะ มัฮ เมียฮ ปู จะ เณือะ เมียฮ มู ทอ. มู แปะ ตอง ปะ เบฺณ ฮุน ยะ มู ทอ โลยดลอง ตัง เอิก เอิง. มู แปะ ปืน มัฮ อู ปะ เนิง ปี อัฮ เอ๊า ซำ ไว ปะ ฮุน ยะ มู ทอ ตัง เอ๊า.

แมด มู อิซราเอล เฮว ฮาอืก นึง เคด เมิง คานาอัน โมเซซ ทอ รอยฮ ปี อาแมะ นึง มู อิซราเอล ติ มู ติ ปุย ไก กัวละอา มู. โมเซซ ทอ จอวฺ ปี อาแมะ กัว ละอา ปุย เกือฮ เฮว บระ เนียน เมิง คะนาอัน อำ มัฮ ยังมัน อำ กอ อำจุม อัฮ.

แมด ปีอาแมะ กัว ละอา ปุย อาอืก นึง เมิง คานาอัน ระปาอืง ซะแงะ. โฮยด ทอ แม เอณ ดอ ละ มู อิซราเอล ยัง เฮฺ. เมิง คานาอัน ทอ ไมจ ลวน ปีกก ปีซอวม นึง. มัฮแม ปี อาแมะ กัว ปุย ปี บระ เนียน ทอ อัฮ ยัง เฮฺ. เมิง คานาอัน แคง แลง ลวน. ปุย นึง มัฮ ยัง ยัก. ปืน มัฮ เฮว รุบ ปัง มู แอะ ซำ กัน ปะ กำทอ ซำ มอก มู แอะ ยุม.

มัฮแม ปี บระ เนียน ละอา ปุย มัฮ คาเลบ เมียฮ โยชูวา อัฮ ยัง เฮฺ. มัฮ เนวิม ยัง ทอ ปุย คานาอัน ฮลวง ลวน แคด แม แคงแลง. มัฮแม มู แอะ แป ปะ มูทอ แนนอน มัฮคาว ตะปูซาง รูบ เมียฮ มู แอะ.

มัฮแม มู อิซราเอล อู เนิง ปี อัฮ คาเลบ เมียฮ โยชูวา. มูทอ จะราย ละ โมเซซ เมียฮ อาโรน อัฮ ยัง เฮฺ "ยุฮ มัน มู กอวฺปะ คอวฺ ปะ ปา มู แอะ เฮว ยุม. ลัง อาอืก อะ ตะ เมิง อียิป ทอ ไมจ พะ ซำ ยุม อะ กะโรย. มัฮแม ปี อาเปิง กวน มูแอะ ซำ เฮมิก เอิก เอิง เปียน ครา." มู อิซราเอล ทอ กวด รอยฮ ฮัวนา ครอวฺ เตะ เพือ ซำ ปา มู กอวฺ เอิง แม เอณ เมิง อียิป.

ตะปูซาง ทอ จะราย เลียก ตะ กะไน เตน ณะ เจวิบ โปะ เตะ. กำทอ อัฮ ยัง เฮฺ "เปียน ตะ มู กอวฺ ปะ อู ปะ เนิง ปี อัฮ เอ๊า ปุย อิซราเอล ตัง เอิก ซำ ลง ปะ นึง ณะ ซะอฮ ซะอยน เฮฺ. กำทอ ปี ไก อาณุ งา เนวิม ฮวก ซำ ยุม ปะ กะรอ. ปะ จะ ฮลอวฺ เตว เลียก นึง เมิง คานาอัน ทอ เวน โยชูวา เมียฮ คาเลบ นอง."

แมด มู อิซราเอล ฮมอง ปี อัฮ ตะปูซาง เซ ลวน อาพาวม ณะ ฮลอวฺ เตะ ยุฮ มับ ยัง เฮฺ ละ ตะปูซาง. กำทอ เฮมิก วิก เซิก อาเอะ เฮว รุบ เมียฮ ปุย คานาอัน. มัฮแม โมเซซ อาฆาอืก เอิง มัฮคาว ตะปูซาง อู จะ อาอืก เมียฮ มูทอ. มัฮแม มู อิซราเอล อู เนิง ปี อัฮ โมเซซ ทอ.

ตะปูซาง อู เฮว รุบ เมียฮ มู อิซราเอล ทอ. มัฮคาว ยัง เฮฺ มู อิซราเอล เตวิม กัน ยุม ตึก โซะ เตะ. กำทอ มู อิซราเอล แม เอณ นึง คานาอัน ลง นึง ณะ ซะอฮ ซะอยน ตะลวด ระปาอืง เนวิม.

มา อาอืก มู อิซราเอล ทอ นึง ณะ ซะอฮ ซะอยน ระปาอืก เนวิม ตะปูซาง เลียง ดัง เอิง. เกือฮ ปีกก ปีซอวม ออก เนวิม มะลอง อัฮ มานา เมียง. ตะปูซาง เกือฮ แม ไซน ลัง เกือฮ แม เอิง ฮลอวฺ ปวน ตอวฺ. มัฮแม คัว อาเปะ ฮาอืก ฮาก จวง อู เกือฮ เอิง อู โจะ อู เดิก.

ปัง ตะปูซาง ทอ เกือฮ ละอาวม ออก เนวิม ซะมอวฺ ยัง ปี ปะราด. มู อิซราเอล ทอ โณย ดัง ละ ตะปูซาง เมียฮ โมเซซ. มัฮแม ตะปูซาง กึด ดัง ฮาอืก ละ ณะ ซัณณา เตะ อาอืก ละ อับราฮัม อิซอัค เมียฮ ยาโคบ.

ไก แม ติ จวง มู อิซราเอล อู ไก ละอาวม โณะ. ตะปูซาง อัฮ โมเซซ ยัง เฮฺฺ ละ โมเซซ "เคริง เมียฮ ซะมอวฺ ทอ นะ. ละอาวม ซำ ออก เนวิม ซะมอวฺ ทอ." มัฮแม โมเซซ ทอ อู ยุฮ ปี อัฮ ตะปูซาง. ชะนา ตะปูซาง ตัดนา มู อิซราเอล. เอียะ คอวฺ อาเฆระ เตะ เบณ เปะ ซะมอวฺ ละอา จวง. ลัง เคริง เมียฮ ซะมอวฺ ทอ. มัฮแม ละอาวม ออก ดัง เอียะ นึง ซะมอวฺ ทอ. เกือฮ มู อิซราเอล ฮลอวฺ โณะ เคริง ปุย เอิง. ตะปูซาง จะราย ละ โมเซซ อัฮ ยัง เฮฺ "กอวฺปะ ปะ จะ ฮลอวฺ เตว เลียก นึง แตะ ณะ ซาณณา เอ๊า ตะ เมิง คานาอัน."

โฮยด ทอ มู อิซราเอล ลง ณะ ซะอฮ ซะอยน ระปาอืง เนวิม. มัฮแม ปุย อู เซือ ตอ ตะปูซาง เอิก ยุม เคริง ปุย. โฮยด ทอ ตะปูซาง ปา มู อิซราเอล ปี เลือ เฮว ฮาอืก นึง เคด เมิง คานาอัน. โมเซซ ทอ อี กวด ลวน. ตะปูซาง รอยฮ โยชูวา เปียน ปี ปา มู อิซราเอล เทียน โมเซซ ทอ. โฮยด ทอ ตะปูซาง ซัณณา ละ โมเซซ อัฮ ยัง เฮฺ "ติ ซะแงะ เอ๊า ซำ ดัว ปุย ปี เคริง ตัง ปี มัฮ ยัง กอวฺปะ."

กำทอ ตะปูซาง จอวฺ โมเซซ ฮวก นึง เปืองมอ ทอ. โมเซซ เนียน เมิง คานาอัน. ตะปูซาง เกือฮ เตว โมเซซ เลียก ตะ เมิง ทอ. โฮยด ทอ โมเซซ ยุม กะรอ. มัฮแม มู อิซราเอล ปา โปะ เตะ อายวง ตะ โมเซซ งวย ซะแงะ. กำทอ โยชูวา เปียน ฮัวนา ปี ไมจ ยะ มูทอ. มัฮคาว โยชูวา เนิง ลวน ปี อัฮ ตะปูซาง.

เฮฺ มัฮ เลือง เนวิม ปี ออก เนวิม พระคำพี อพยพ 16-17; กันดารวิถี 10-14; 20; 27 เฉลยธรรมบัญญัติ 34