3. ณะ ทวม ละอาวม โลก

โฮยด ทอ แมด เดน ปุย ปี อาอืก ตะโลก เฮิง ลวน มูทอ ยุฮ ปี อู ไมจ กำทอ พระจัว อัฮ ซำ ยุฮ เมียฮ ปุย นึง โลก เฮฺ เกือฮ ละอาวม ระ ทวม เอิง

มัฮ แม โนอา มัฮ ปี ปอ ลวน อาพาวม พะจัว กอวฺ เอิง มัฮ ปี เบิง อาอืก เมียฮ มู ปี อู ไมจ ทอ พระจัว ฮู เลือง ซำ เกือฮ แตะ ละอาวม ทวม โลก ละ โนอา กำทอ พระจัว เกือฮ โนอา โบะ เฮือ ระ ติ ลำ

พระจัว เกือฮ โนอา โบะ เฮือ เวือะ งา ละ ลวย เมด ดึง ติ อาเยือะ เมียฮ ระปาอืง เมด ฮลวง กัว ละ อวย เมด เมียฮ กะบละ โบะ ตะ คอวฺ ไก ละโอย จัน ตะ กะ ไน เฮิง ไก ละอา ละอวย ตอม ไก พรัง ไก แม ปอง เตะ โนอา เมียฮ คอบครัว เตะ เมียฮ ซัด เคริง ยัง ซำ ลวด พะ ละอาวม ทวม ตอวฺ เฮือ เฮฺ

โนอา เนิง ปี อัฮ พระจัว กอวฺ เมียฮ กวน อาแมะ ละโอย ปุย โบะ เฮือ ยัง ปี เกือฮ พระจัว เตะ โบะ เอิง มะ โบะ เฮือ จอวฺ เวลา ละอา ละโอย เนวิม เตวิม ซำ โฮยด ตะ รึ ลวน เฮือ ทอ โนอา ดอ ละ ปุย ณะ ซำ ทวม ละอาวม แม ดอ ณะ ซำ เกือฮ มู แม ละ พระจัว มัฮ แม มูทอ อู เนิง ปี อัฮ โนอา

พระจัว จอวฺ แม โนอา เมียฮ คอบครัว เตะ เกียม ปีกก ปีซอวม ยะ เตะ เมียฮ ซัด ปี อาอืก ตะ เฮือ ทอ แมด อาเอะ เฮฺ พรวม เคริง ยัง พระจัว เกือฮ โนอา เมียฮ กวน อาแมะ เมียฮ กวน เมิง ละโอย ปุย ตัง เอิก เอิง ไก ซะแตะ ปุย เลียก ตะ กะ ไน เฮือ อี ซำ ฮาอืก เมือ เอิง

พระจัว เกือฮ แม ซัด นึง มอ เมียฮ ไซน เคริง ยัง กำ ปี ไฮมน กำ ปี เกิง ละ โนอา เกือฮ มู ซัด ฮวก ตะ เฮือ ลวด พะ ละ อาวม ทวม พระจัว ดัว ซัด ทอ ติ ยัง อาแลฮ กู กำ ปี ไฮมน ปี เกิง เกือฮ เปียน ปี ซำ มอก ตาน เอิง แมด ซัด เฮฺ เมียฮ คอบครัว โนอา อาอืก ตอวฺ เฮือ พระจัว ซอง นอง อาเวือะ กำทอ

กำทอ แฮละ ทอ เตวิม แฮละ ระปาอืง ซะแงะ ระปาอืง ซาวม ตู ณึด ละอาวม ออก กะรัว แตะ อาเอะ เคริง ยัง กำ มอ ฮลวง ลวน มุด ตอวฺ กะ กลาวม ละอาวม ทอ

ปี ไก จีวิด เคริง ยัง ตัง เอิก ปี ไก ตะ โลก ยุม เอิก ไก ดัง ปุย เมียฮ ซัด ปี อาอืก ตอวฺ เฮือ นอง ปี ไอน ดัง เฮือ ทอ ลอง เมียฮ ละอาวม ซะแพระ ปี ไก จีวิด ตอวฺ เฮือ เคริง ยัง อู มุด ตอวฺ ละอาวม ลวด ฆะ

แมด แฮละ ทอ ณุด ยัง เฮฺ เฮือ ทอ ลอย กะรัว ละอาวม พวน เคะ มัฮ แม ละอาวม เลฮ ปู เฮว ติก ติก แมด ฮาอืก ติ ซะแงะ เฮือ ณึด นึง เปือง มอ ทอ มัฮ แม แตะ อาอืก ดัง กะกลาวม ละอาวม ทอ โฮยด ทอ ละอวย เคะ เปือง มอ พด พะ ละอาวม

โฮยด ทอ ระปาอืง ซะแงะ โนอา ปลอย ไซน เกือฮ เอิง ซาวบ เนียน แตะ ซะอฮ ไซน ทอ เปว เฮว ไป เฮว มา อู โยะ เตว อาเอะ

โฮยด ทอ โนอา ปลอย แม ไซน กาแก ออก เฮว อู แม โยะ แตะ ซะอฮ กำทอ เปว เอน ละ โนอา ยัง ไพรน เตะ แมด ฮาอืก แม ติ ซะแงะ โนอา เกือฮ แม ไซน กาแก ออก เปว แม ติ จวง ไซน กาแก แมด เอน เกียด ปู เอน ฮละ คอวฺ มะกอก กำทอ โนอา โยง ละอาวม ทอ อี เลฮ พะ แตะ ทอ เมียฮ คอวฺ อา ฆลอวฺ แม ไมจ แม

โนอา มอง แม เอิง แมด ฮาอืก แม ติ ซะแงะ เกือฮ แม ไซน กาแก เปว แม ติ จวง ไซน กาแก แมด เปว อู จะ แม มัฮ คาว แตะ อี ซะอฮ

แมด ฮาอืก ละอา เคะ พระจัว อัฮ แม ละ โนอา กอวปะ เมียฮ ปุย ตอวฺ เณือะ ณะ ปะ ออก เปฮ พะ เฮือ เฮฺ เกือฮ จัดเจือ ปะ พรุ เดวิบ โลก เฮฺ กำทอ โนอา เมียฮ ปุย ตอวฺ เณือะ ยะ เตะ ออก เฮว

แมด โนอา โฮยด ออก พะ เฮือ โบะราน ตาน ซัด กำ ปี เกิง กำ ปี ไฮมน อาแลฮ กู ละ พระจัว มะ คาว พระจัว เกียม อาอืง ลัง มัฮ ณะ ปอ อาพาวม เอิง พระจัว ปันปวน ละ โนอา เมียฮ ปุย ตะ เณือะ ลัง

พระจัว อัฮ ยัง เฮฺ ลัง เอ๊า ซัณณา เมียฮ ปะ แตะ เฮฺ จะ ลอก เตว ซะนา ปัง ปุย เฮฺ ยุฮ ปี อู ไมจ ปุย เฮฺ กึด เนวิม ฮมับ มัฮ คาว ยัง เฮฺ ละอาวม จะ ทวม เตว โลก

พระจัว ยุฮ ซอวฺ เกือฮ เอิง เปียน กำ ซัณณา ยะ กอวฺ เตะ ปืน มะ โยะ ปะ ซอวฺ กก ละอาวม มัฮ ณะ ซัณณา พระจัว เมียฮ ปุย ยะ เตะ

เลือง พระธรรม ปฐมกาล 6-8