16. เลือง ปุย ปี ตอวฮ มู อิซราเอล

แมด โยชูวา ทอ ยุม ยัง เฮฺ . ปุย อิซราเอล อู จะ เนิง ปี อัฮ ตะปูซาง อู กลา ปุย คานาอัน ปีเลือ ออก พะ แตะ ปี ซัณณา ตะปูซาง อาอืง ลัง. ปุย อิซราเอล ทอ เลิม ไว เตะ พระจัว ยะ มู ปุย คานาอัน เตียน พระจัว เนวิม ปี มัฮ ตะปูซาง. มู อิซราเอล ยุฮ ยัง ปี กวด ยุฮ เตะ อัฮ เอิง อีลอก ละ มู กอวฺเตะ มัฮ คาว อู ไก กะซัด ยะ.

ตะปูซาง เลฮ ตุด มู อิซราเอล มัฮคาว อู เนิง ปี อัฮ เอิง. เกือฮ มู ซัดทู ยุฮ เมียฮ มู กอวฺ เอิง เกือฮ เอิง บละ อาเอะ ยัง. กำทอ มอก แม ปุย อิซราเอล ยุมอวน แมด เดณ ยัง เฮฺ มู อิซราเอล อาเตือ อาพาวม เตะ แม ปอ ตะปูซาง โจย มู กอวฺเตะ.

กำทอ ตะปูซาง จอวฺ ปุย ปี ตอวฮ มู อิซราเอล เฮว โจย เกือฮ เอิง ปุน ซัดทู ยะ มู กอวฺเตะ. กำทอ เกือฮ มู อิซราเอล อาอืก ไมจ อาอืก มวน นึง แตะ ทอ. แมด เดณ ยัง เฮฺ มู อิซราเอล เบีย เปฮ ตะปูซาง กำทอ แม ไว เปฮ พระจัว ไฮน. กำทอ ตะปูซาง เกือฮ ปุย มีเดียน ปี มัฮ ซัดทู เฮว รุบ เอิง กำทอ มู อิซราเอล ทอ กัน.

มู ปุย มีเดียน ทอ บละ พัก ปี ซะมา มู อิซราเอล ตัง อาแลฮ เนวิม. มู อิซราเอล ทอ ฮลัดลวน ปา โปะ เตะ เฮว บละ เมาะ ตะทำ เพือ อู เกือฮ มู มีเดียน เจวิบ มู กอวฺ เตะ. แมด เดณ ยัง เฮฺ มู อิซราเอล ปอ แม ตะปูซาง โจย เตะ.

แมด ฮาอืก ติ ซะแงะ ไก ปี อาแมะ อิซราเอล ติ ปุย มาวฮ เอิง มัฮ กิเดโอน บละ โปะ เฮาะ ยะ เตะ ฮลัด มู มีเดียน บละ เอิง. กำทอ เตวาดา ยะ ตะปูซาง เฮว ละ กิเดโอน อัฮ ยัง เฮฺ ลัง . พระจัว อาอืก เมียฮ กอวฺปะ กอวฺปะ มัฮ ปะ ตะฮาน ปี แกฮ ลวน. เฮว เมอะ เฮว ปา มู อิซราเอล ทอ รุบ ปุย มีเดียน ทอ.

เปือะ กิเดโอน ไกราน ยะ มัฮ ณะ ตาน อาเอะ ละ พระจัว ยะ เตะ. ตะปูซาง ดอ ละ กิเดโอน อัฮ ยัง เฮฺ เณือะ เปฮ ปาวฮ ฆราน ทอ. มัฮแม กิเดโอน ฮลัด ตะ จัวยวง มอง ฮาอืก ซาวม. กำทอ ยัง เฮฺ เตียง เอิง โลยดลอง ตองแนะ โฮยดทอ โบะ แม กราน ครอวฺ ตัดทอ ละ ตะปูซาง. กำทอ มอก ตาน ซัด ละ ตะปูซาง นึง ฆราน ทอ.

แมด ฮาอืก มะซะ ยัง เฮฺ จัวยวง จะราย แมดโยะ ฆราน ครอวฺ เตียน ฆราน ไพรน ยะ เตะ. กำทอ ปาโปะ เตะ เฮว นึง เณือะ ณะ กิเดโอน อัฮ ซำ มอก เอิง. กำทอ เปือะ กิเดโอน อัฮ ยัง เฮฺ ละ จัวยวง ยุฮมัน มู กอวฺปะ คอวฺปะ ซำ โจย พระจัว ยะ เตะ ปืน มะ มัฮ พระจัว เนวิม โจย นอง เอะ กอวฺเตะ เอียะ. เตวิม มู จัวยวง อู จะ มอก กิเดโอน มัฮ คาว อัฮ เปือะ กิเดโอน ทอ ยัง เฮฺ.

โฮยด ทอ ยัง เฮฺ มู มีเดียน เอณแม ตะยวง อิซราเอล บละ พัก ยัง มูทอ ไก ตึก โซะ เตะ.กำทอ กิเดโอน ปอ ตะปูซาง เกือฮ ปี ปะราด ละ เตะ ละอา ยัง ณะ ซำ เกือฮ เตะ โยง เอิง ตะปูซาง จอวฺ กอวฺ เอิง ปา มู อิซราเอล เฮว รุบ.

ปี ปะราด อาเกือ กิเดโอน เอียะ ฮากแกะ ณอง นึง แตะ กำทอ ปอ ตะปูซาง เกือฮ ละอาวม อะนะ ราว นึง ฮาก ซัด ทอ นอง อู ราว นึง แตะ ตะปูซาง ยุฮ ยัง ทอ. แมด ฮาอืก มะซาวม มะ ซะเอะ ทอ ยัง เฮฺ ปอ แม ตะปูซาง เกือฮ แตะ ทอ แจะ เกือฮ ฮาก ซัด ทอ ซะออ ตะปูซาง ทอ ยุฮ ยัง ทอ. มัฮแม ปี ปะราด ละอา ยัง เฮฺ มัฮ ณะ ซำ เกือฮ กิเดโอน โยง เอิง ตะปูซาง จอวฺ กอวฺ เฮว รุบ มู มีเดียน.

โฮยดทอ กิเดโอน กอก มู อิซราเอล รวม โปะ เตะ เฮว รุบ มู มีเดียน. ไก 32,000 ปุย ปี เฮว ละ กิเดโอน ทอ. มัฮแม ตะปูซาง ดอ ละ กิเดโอน เฮิง ลวน ดัง. กำทอ กิเดโอน จอวฺ มู ปี ฮลัด ทอ เอณ ไก 22,000 ปุย. ตะปูซาง ดอ แม ละ กิเดโอน ยัง เฮฺ ปี อาแมะ ทอ เฮิง ลวน กำทอ กิเดโอน เกือฮ มูทอ เอณ เวน ตะฮาน 300 ทอ นอง.

ซาวม ทอ ตะปูซาง ดอ ละ กิเดโอน เฮว เมอาะ เฮว นึง ปัง ยะ มู มีเดียน ทอ. ปืน มะ ฮมอง ปะ ปี ฮู มู มีเดียน กอวฺปะ ปะ จะ ฮลัด เตว. ซาวม ทอ กิเดโอน เฮว นึง ปัง ยะ มู มีเดียน ฮมอง ตะฮาน มีเดียน ละอา ปุย ทอ. ฮู อามอวฺ เตะ ปูเฮมว ติ ปุย อัฮ ยัง เฮ ลัง อามอวฺ ปะ มัฮ ยัง เฮฺ ออ. ตะฮาน ยะ มู กิเดโอน ซำ รุบ แป ตะฮาน มู มีเดียน ทอ กิเดโอน แมด ฮมอง ยัง เฮฺ ยวกลือ ตะปูซาง ยะ เตะ.

โอยด ทอ กิเดโอน แม เอณ ละ ตะฮาน ยะ เตะ เกือฮ แน เกือฮ โกม เกือฮ ดังแตะ ลัง เคริง ปุย เอิง ปา โปะ เตะ เฮว เวียด ปัง ยะ มู มีเดียน กำทอ. มู มีเดียน กำลัง ปืนไอท กำทอ ตะฮาน ยะ กิเดโอน จาวบ งอ ยะ เตะ ดัง ยะ เตะ ตะ ดังแตะ เพือ อู เกือฮ มู มีเดียน โยะ เตะ.

กำทอ ตะฮาน ยะ กิเดโอน เคริง ปุย เอิง ปาโปะ เตะ เบน ดังแตะ เบือะ พรอม โปะ เตะ. แมด ดังแตะ เบือะ ยัง เฮฺ งอ รัง มู อิซราเอล ปลอืง แน เคริง กอวฺ ปุย ปัว เมียง อัฮ ยัง เฮฺ. เฮ มัฮ วิก ยะ ตะปูซาง เมียฮ วิก ยะ กิเดโอน.

กำทอ ตะปูซาง เกือฮ มู มีเดียน อาซุก อาซาอืก อู โยง ปี มัฮ โปะ เตะ. มู มี เดียน ทอ ดา นอง เอียะ อารุบ. มู อิซราเอล ทอ มอก มู มีเดียน ยุม ตึก โซะ เตะ. กำทอ กลา แม ปี เลือ ออก พะ แตะ ยะ มู อิซราเอล. ปุย มีเดียน ปี ยุม ซะแงะ ทอ ไก 120,000 ปุย. มัฮแม ตะปูซาง โจย มู อิซราเอล ทอ ลวด พะ มู มีเดียน.

โฮยดทอ ยัง เฮฺ มู อิซราเอล ทอ กวด เกือฮ กิเดโอน เปียน จัวเนีย ยะ มู กอวฺเตะ. มัฮแม กิเดโอน อู ณอม ยุฮ ยัง ทอ. อัฮ ยัง เฮฺ ลัง ตะปูซาง เตะ นอง ออ ปี มัฮ จัวเนีย ยะ มู กอวฺปะ. โฮยดทอ ยัง เฮฺ กิเดโอน ปอ เครีย ตะ มู มีเดียน กำทอ ปุย มีเดียน เฮว เกือฮ เครีย ละ กิเดโอน ไก ตึก โซะ เตะ.

โฮยด ทอ กิเดโอน เอียะ เครีย ทอ ยุฮ อาเปะ นึง ยัง ปี เกย ปุโรฮิด เอียะ เตะ เอิง. แมด เดน ยัง เฮฺ มู อิซราเอล ปา โปะ เตะ เฮว ไว อาเปะ ปี ยุฮ กิเดโอน ทอ. โฮยด ทอ ยัง เฮฺ ตะปูซาง เลฮ ตุด เอิง มัฮคาว ไว อาเปะ ทอ เมียฮ พระจัว ไฮน.

กำทอ ตะปูซาง เกือฮ ซัดทู เฮว ยุฮ เมียฮ มู อิซราเอล แมด เดน ยัง เฮฺ มู อิซราเอล อาเตือะ อาพาวม เตะ ปอ ตะปูซาง โจย มู กอวฺ เตะ ปุน ซัดทู ทอ. ตะปูซาง จอวฺ ปุย ปี ซำ ตอวฺฮ มู อิซราเอล เฮว โจย เอิง.

แมด ฮาอืก อาแคะ ทอ ยัง เฮฺ มู อิซราเอล กวด ไก กะซัด ยะ ยัง เมิง ไฮน ทอ ปอ ตะ ตะปูซาง. มัฮแม มู อิซราเอล กวด เอียะ กะซัด ปี แคงแลง ปี ปืน ปา มู อิซราเอล เฮว รุบ มัฮแม ตะปูซาง อู ปอ อาพาวม เอิง. มัฮแม ตะปูซาง เกือฮ ดัง กะซัด ยัง ปี ปอ มู อิซราเอล ทอ ลัง.

เลือง ปี ออก เนวิม พระคำพี ผู้วินิจฉัย