9. เลือง พระจัว กอก โมเซซ

แมด โยเซฟ ทอ ยุม จัดเจือ เอิง ตัง เอิก ปี อาอืก นึง เมิง อียิฟ ทอ . กวน ซอวฺ พรุ ปูฮวก อัฮ เมียฮ มัฮ จัว อิซราเอล.

โฮยด ทอ ปุน เอิง ละอา ละโอย เนวิม ปี มัฮ จัว อิซราเอล พรุ ปูฮวก ติก ติก. จัว อียิฟ มูทอ ฮลัด ตะ มู อิซราเอล. มัฮ คาว มู อิซราเอล พรุ ฮาอืง ปู เฮว ติก ติก. ฟาโร จัว เมิง อียิฟ เมือทอ เกือฮ มู อิซราเอล เปียน คีครา เมิง อียิฟ.

จัว อียิฟ ทอ คะนาบ มู อิซราเอล ทอ โบฮ ตึก เมิง รึ รึ. กาน ปี ยุฮ เจียน ลวน จีวิด ตุก ณัก ลวน. มัฮ แอม พระจัว ปันปวน ละ มูทอ มัฮแม มูทอ พรุ ปู เฮว ติก ติก.

ฟาโร โยะ มู อิซราเอล ไก กวน ฮาอืง ปูเฮว ติก ติก. กำทอ จอวฺ ปุย ยะ เตะ มอก กูดอวฺ อาแมะ มู อิซราเอล. เฮว เปว เอิง ตะกลอง ละอาวม ไน.

ไก ปี อาเปิง อิซราเอล ติ ปุย เกะ กวน อาแมะ ติปูย. กอวฺ เอิง เมียฮ ปี อาแมะ ยะ เตะ ริ บละ เมาะ กูดอวฺ เฮฺ. ตำ ยะ ปืน เมาะ เตะ เอิง.

แมด มะ เปือะ อู จะ ปืน เมาะ เอิง. มู กอวฺ ดอวฺฮ กูดอวฺ ทอ ตะ กะไน กอก. มัฮ ณะ ซำ เกือฮ กูดอวฺ ทอ ปุน ณะ ซำ มอก ปุย เอิง. อาระ มอง เนียน มัน ปี ซำ กึด เมียฮ ปุ เตะ.

ไก ติ ซะแงะ กวน เครฮ ฟาโร โยะ กอก ทอ เนียน กะไน กอก. กำทอ โยะ กูดอวฺ ทอ เริก เอน เปียน กวน เตะ. โฮยด ทอ จาง แม มะ จัว อิซราเอล เลียง กูดอวฺ ทอ. กูดอวฺ ทอ โยง เตว มัฮ มะ เตะ. แมด กูดอวฺ ทอ รึ มะ เอิง แม ดัว ละ กวน เครฮ ฟาโร. ดอวฺ มัฮ เอิง มัฮ โมเซซ.

ไก ติ ซะแงะ แมด โมเซซ ทอ รึ โยะ จัว อียิฟ ทอ. เบน จัว อิซราเอล โมเซซ ทอ ริ โจย มู อิซราเอล ทอ ลวด.

เมือทอ โมเซซ กึด เอิง ไก เตว ปี โยะ เอ๊า. กอวฺ เอิง มอก ปุย อียิฟ ทอ ยุม อาปาอืง เมียฮ เอิง ตอวฺ ไฮมจ. ไก ติ ปุย โยะ โมเซซ ยุฮ ยัง ทอ.

แมด ฟาโร ฮมอง คาว ปี ยุฮ โมเซซ. ริ ซาวบ มอก โมเซซ ทอ ยุม. โมเซซ ทอ ตอ ออก พะ เมิง อียิฟ. เฮว นึง ณะ ซะออ ซะอยน. มัฮ ณะ ซำ ปุน ตะหาน ยะ ฟาโร.

โมเซซ แม เปียน ปี เลียง แกะ นึง ณะ ซะอฮ ซะอยน ซะเงีย ลวน พะ เมิง อียิฟ ทอ. โมเซซ เณือะ เมียฮ ปี อาเปิง ติ ปุย ณะ อาอืก เอิง. ไก กวน อาแมะ ละอา ปุย เมียฮ โปะ เตะ.

ไก ติ ซะแงะ โมเซซ เฮว เลียง แกะ ยะ เตะ. โยะ งอ พรุย เอีย คอวฺ ทอ มัฮแม ฮละ คอวฺ อู ฮะ. โมเซซ ทอ เนียน เอิง กำทอ โมเซซ ฮมอง เซียง พระจัว. ปาอืก ฮาก จวง ปะ ออก ณะ จง ปะ มัฮ ณะ ซะ งะ ซะฆอม.

พระจัว เคริง เมียฮ โมเซซ " เอ๊า โยะ อัฮ ณะ ตุก ณัก ลวน ปุย ยะ เตะ. เอ๊า ซำ ดัว กอวฺปะ เฮว ละ ฟาโร . มัฮ กอวฺปะ ปี ซำ ปา มู อิซราเอล เฮฺ ออก พะ เปียน คีครา ตอวฺ เมิง อียิฟ. เอ๊า ซำ ยวก แตะ คานาอัน ละ เกะ มัฮ แตะ ปี ซัณณา เอ๊า อาอืง ละ อับราฮัม เมียฮ ยาโคบ.

โมเซซ ไฮมน พระจัว อัฮ ยัง เฮฺ ปืน มะ ไฮมน มู อิซราเอล ทอ เอ๊า. อำ มัฮ เปน ปี ดัว กอวฺมะ เฮว ละ เอะ. เอ๊า ซำ ดอ ละ มู จัว อิซราเอล ยัง มัน. เอ๊า มัฮ ปี มัฮ เตะ พระจัว อัฮ " เอ๊า มัฮ ปี มัฮ เตะ ดัว กอวฺ มะ ดอ ยัง เฮฺ ละ มู กอวฺมะ.เอ๊า มัฮ พระจัว ยะ ตะ เยือะ ปะ มัฮ พระจัว ยะ อับราฮัม ยะ อิซอัค อิซราเอล. เฮฺ มัฮ มาวฮ เอ๊า ตะลวด.

โมเซซ ฮลัด ลวน อู กวด เฮว ละ ฟาโร. กึด กอวฺ เตะ มัฮ ปุย อู แกฮ เคริง. ฮอยด ทอ พระจัว ดัว อาโรน เอียกระ โมเซซ ทอ เฮว โจย เอิง. พระจัว อัฮ ละ โมเซซ เมียฮ อาโรน อัฮ ยัง เฮฺ กะซัด ฟาโร มัฮ ปี กอ ลวน ไกน.

เลือง นึง พระธรรม อพยพ 1-4