18.

แมด ดาวิด ทอ ยุม ยัง เฮฺ มัฮแม กวน เอิง เปียน จัวเนีย ซะแพระ เมิง อิซราเอล พระจัว อัฮ ละ โซโลมอน ไฮมน เอิง อาเอะ ปีกก เอียะ ลวน ปะ มัฮ มัน มัฮแม โซโลมอน ทอ ปอ ซติ ปัณณา เตะ กำทอ พระจัว ยินดี นึง มัฮแม เกือฮ เอิง เปียน ปุย เฮียง ลวน ตะโลก โซโลมอน เฮลียน โยง เคริง ยัง มัฮแม เปียน ปี ตัดซิน อาเอะ กำทอ เปียน แม ปี ไก ลวน.

ตอวฺ เมิง เยรูซาเลม โซโลมอน โบะ วิหาน มัฮ ปี กึด อาอืง ดาวิด เปือะ เอิง จัว เมิง ไหวพระจัว ตาน อาเอะ ยะ เตะ ละ พระจัว ตะ วิหาน เตียน เตน ณะ เจวบ โปะ เตะ พระจัว เลฮ อาอืก ตะ กะไน วิหาน ทอ อาอืก เมียฮ ปุย ยะ เตะ กะรอ

มัฮแม โซโลมอน เอียะ เป ปี อาเปิง เมิง ไฮน กอวฺ เอิง อู เนิง ปี อัฮ พระจัว เณือะ เมียฮ ปี อาเปิง เฮิง ลวน ไก มอก ติ เปือน ปุย ปี อาเปิง เฮิง มู เฮฺ ออก เนวิม เมิง ไฮน เริก พระจัว ยะ มู กอวฺ เตะ เมียง มัฮแม ไว เอิง ตะลวด แมด โซโลมอน ทอ กวด ไหว ดัง เอียะ พระจัว ยะ เตะ

พระจัว จะราย ละ โซโลมอน เลฮ อาอืง ตุด ณะ อู เซอ พระจัว อัฮ ลัง ซำ อาฆะ มู อิซราเอล เปียน ละ ตอวฺ โฮยด ทอ โซโลมอน ทอ ยุม

แมด โซโลมอน ทอ ยุม เรโฮโบอำ กวน เอิง ฮวก เปียน กะซัด เรโฮโบอำ มัฮ ปี งัว มู อิซราเอล ปะชุม โปะ เตะ เกือฮ เอิง เอียะ เปียน กะซัด มูทอ โณย อัฮ ยัง เฮฺ ลัง โซโลมอน ทอ เค เอะ ยุฮ กัน เจียน ลวน เกือฮ แม มู เอะ เซ พาซี โซะ ลวน.

เรโฮโบอำ ปีงัว ทอ อัฮ ละ มูทอ ยัง เฮฺ มู กอวฺปะ อัฮ ปะ เปือฮ เอ๊า เกือฮ เตะ ยุฮ กัน เจียน มัฮแม เอ๊า ซำ เกือฮ มู กอวฺปะ ยุฮ กัน เจียน พะ ปี ยุฮ เปือะ เอ๊า เอ๊า ซำ เลฮ อะ ตุด ปะ เฮิง พะ ปี ยุฮ เปือะ เอ๊า.

กัว เตา มู อิซราเอล จะ เซอ เมียฮ เรโฮโบอัม ไก นอง ละอา จัดเจือ นอง ปีเซอ เมียง กำทอ แม เปียน เมิง ยูดา

กัว จัดเจือ ยะ มู อิซราเอล ปี อู เนิง ปี อัฮ เรโฮโบอำ แตงตัง ปี อาแมะ ติ ปุย มาวฮ เอิง มัฮ เยโรโบอำ เกือฮ เปียน กะซัด ยะ มู กอวฺ เตะ เมิง ยะ มู เฮฺ ไก ลัก กะ ดวง อัฮ มาวฮ เอิง มัฮ อิซราเอล

เยโรโบอำ อู เซอ ตะ พระจัว เปียน ปู อู ไมจ ละ จัว ยวง เตะ ยุฮ ฮุน ละอา ฮุน เกือฮ ปุย ยะ เตะ ไหว เอิง เตียน พระจัว ตอวฺ วิหาน ยะ ยูดา

เมิง ยูดา เมียฮ อิซราเอลดา เอีย อารุบ เมียฮ โปะ เตะ ยัง ทอ.

ตอวฺ เมิง ครอวฺ ยะ อิซราเอล กะซัด ตัง เอิก มัฮ ปี อูไมจ กะซัด มู เฮฺ ลอก มอก ตะ ปุย อิซราเอล เอียะ

กะซัด เมียฮ ปุย ยวง ปี มัฮ เมียง เตะ ไหว ฮุน ทอ แลน จุ เตะ เมียฮ ปัน เมือ เอิง มอก ตาน กูดอวฺ.

กะซัด ยะ ยูดา มัฮ จัดเจือ ยะ กะซัด ดาวิด อวน มัฮ กะซัด ไมจ เซอ อาพาวม ไหว พระจัว กะซัด ยะ ยูดา อวนเอิง อู ไมจ ไหว ฮุน ตาน กวน เตะ ละ พระไฮน จัว ยูดา เฮิง ลวน ปี อู เซอ อาพาวม ตะ พระจัว.

1 พงค์กษัตริย์ 1-6 ,11 -12