20. เลือง มู อิซราเอล ลอก กลา กำทอ เอณ แม

เมิง อิซราเอล เมียฮ เมิง ยะ ยูดา ละอา เมิง เฮฺ ยุฮ มับ ละ พระจัว มูทอ ฮลอวฺ เตว ยุฮ ณะ ซัณณา ปี เกือฮ พระจัง ลัง นึง มอ ซีนาย พระจัว ดัว ปี เคริง ตัง เตะ เฮว ดอ ละ มูทอ เกือฮ แม ไว ยวกลือ พระจัว แม มัฮแม มูทอ อู เนิง ปี อัฮ เอิง

กำทอ พระจัว เลฮ ตุด มูทอ เกือฮ ซัดตรู เอิง เฮว มอก ยุฮ เมียฮ อาเอะ ยัง เมิง แอซซีเรีย มัฮ จัดเจือ ปี ระอำนาด มัฮแม เมิง ปี อู ไมจ มู เฮฺ เฮว ยุฮ เมียฮ เมิง อิซราเอล ปุย แอซซีเรีย ฮลอว. มอก ปุย อิซราเอล ตึก เฮิง เตะ มอก เอิง ยุม ตึก โซะ เตะ ปุย แอซซีเรีย เริก ปี ไก งัวะ ยะ มูทอ ตอก แม เปว เมิง ยัง ตึก โซะ เตะ

ปุย แอซซีเรีย อาจอวฺ ฮัวนา ตัง เอิก กำ ปี ไก กำ ปีแกฮ นึง เมิง อิซราเอล ปา แม มูทอ เฮว นึง เมิง แอซซีเรีย เปว อาอืง ปี ตุก ปี ณัก ปู อู ลอก มอก นอวฺ อาอืง ตอวฺ เมิง อิซราเอล

ปุย แอซซีเรีย ปา ปุย เมิง ไฮน ทอ เฮว อาอืก นึง เมิง อิซราเอล ปุย เมิง ไฮน ทอ โบะ เณือะ ครอวฺ เตะ แม เณือะ เมียง ปุย อิซราเอล กวน ซอวฺ ยะ มู อิซราเอล เณือะ เมียฮ ปุย เมิง ไฮน ทอ มาวฮ เอิง มัฮ จัว ซะมาเรีย

ปุย นึง เมิง ยูดา โยะ ปี ยุฮ พระจัว ณะ เลฮ ตุด เมิง อิซราเอล ปี อู เจือ พระจัว เมียฮ ปุย ปี เนิง ปี อัฮ พระจัว มัฮแม ปุย อิซราเอล ไว ดัง ฮุน ทอ เมียฮ พระจัว ไฮน ปะ เยียะ คานาอัน กำทอ พระจัว ดัว ปี เคริง เตะ เฮว ดอ ลัง มัฮแม มูทอ อู เนิง ปี อัฮ เอิง

แมด ฮาอืก ติ อาเยือะ เนวิม แมด แอซซีเรีย ยุฮ เมียฮ เมิง อิซราเอล พระจัว ดัว กะซัด เนบูคัซเนซซา มัฮ กะซัด ยะ ปุย บาบิโลน เฮว ยุฮ เมียฮ เมิง ยะ เมิง ยูดา บาบิโลน มัฮ เมิง ปี ไก อำนาด กะซัด ยะ ยูดา ซัณณา ซำ เปียน คีครา กะซัด เนบูคัซเนซซา กำทอ ดัว เมียฮ พาซี ลัง เคริง เนวิม เอิง.

แมด โฮยด ทอ ละอา ละโอย เนวิม กะซัด ยะ ยูดา อู จะ เซอ เมียฮ บาบิโลน กำทอ ปุย บาบิโลน แม ดา อา รุบ เมียฮ เมิง ยูดา แตะ ซาย ทอ เปียน ปะ เยียะ เมิง เยรูซาเลม ยุฮ เมียฮ วิหาน เอียะ ปี ไก งัวะ กำ ปี ไก ตะเณือะ

ณะ เลฮ ปี ตุด กะซัด ยะ ยูดา ณะ ฮลอวฺ ปี ยุฮ อู ไมจ ตะหาน ยะ เนบูคัซเนซซา มอก กวน เอิง ตัดนา โฮยด ทอ เกือฮ จัก ตะเอีย โฮยด ทอ เฮว คัง เอิง ตะคอก ฮาอืก คาว ยุม นึง เมิง บาบิโลน

เนบูคัซเนซซา เมียฮ ตะหาน ยะ กอวฺ เอิง ปา ปุย ตอวฺ เมิง ยูดา เฮว ตะ เมิง บาบิโลน นอวฺ อาอืง ปุย ตุก ลวน เกือฮ อาอืก นึง แตะ ทอ ซะมา อูเอะ นึง เฮฺ มัฮ เมือ เฮว ปุย ยะ พระจัว คะนาบ ปุย เอิง ออก พะ แตะ ปี ซัณณา พระจัว อาอืง อัฮ เอิง ยัง เฮฺ ปี ลอก กลา

ปัง พระจัว เลฮ ตุด ปุย ยะ เตะ ณะ ฮลอวฺ ยุฮ มับ ละ พระจัว เกือฮ เอิง ลอก กลา มัฮแม พระจัว เมียฮ เตว ณะ ซัณณา ยะ กอวฺเตะ พระจัว ซะแพระ ดัง มูทอ เคริง เมียฮ เกือฮ ปี เคริง ตัง เตะ ดอ ลัง พระจัว ซัณณา อาอืง ปืน ฮาอืก อาแลฮ เนวิม มูทอ ซำ ฮลอวฺ แม เอน นึง แตะ ปี ซัณณา เอ๊า อาอืง ลัง แม ติ จวง

แมด ฮาอืก อาแลฮ เนวิม ยัง เฮฺ ไซรัซ มัฮ กะซัด ยะ เปอเซีย รุบ แป บาบิโลน กำทอ เมิง เปอเซีย เลียก อาอืก นึง เมิง บาบิโลน ปุย อิซราเอล กำทอ ไก มาวฮ ครอวฺ อัฮ ปุย ยิว เมียฮ ปุย เฮิง ลวน อาอืก นึง เมิง บาบิโลน ตะลวด ชีวิด ยะ เตะ ไก ปุย ยิว กวด นึง อวน ไตน ดัง เอียะ แตะ เมิง ยูดา ทอ.

เมิง เปอเซีย แคงแลง ลวน มัฮแม มูทอ มัฮ ปี ไมจ อาพาวม ลักพาวม ตะ ปี อาอืก กะกราวม เตะ ปอ เตว เดน เตะ ไซรัซ ฮวก เปียน กะซัด ยะ เปอเซีย ดอ ละ ปุย ยิว มัฮ เปน ปี กวด ออก พะ เมิง เปอเซีย แม เอน อาอืก เมิง ยูดา เปียน กะซัด ไซรัซ เกือฮ แม มาวฮ ลัง เกือฮ โบะ วิหาน ครอวฺ โฮยด ทอ อาแฆระ เนวิม ปุย ยิว อาเซียะ ทอ แม เอน ยวง เยรูซาเลม นึง เมิง ยูดา

เมือ เอน มูทอ ฮาอืก นึง เมิง เยรูซาเลม มูทอ โบะ วิหาน ครอวฺ ลอ กำแปง เวียด เมิง ปัง มูทอ อาอืก กะราวม เมิง ไฮน มัฮแม มูทอ ฮลอวฺ อาอืก นึง แตะ ณะ ซัณณา พระจัว อาอืง ละ เตะ ฮลอวฺ แม ไว พระจัว ยะ เตะ ตะวิหาน แม

เลือง เฮฺ ออก เนวิม พระธรรม 2 พงกะซัด 17:24 -25 2 พงศาวะดาน 36 เอซะรา 1-10 เนฮะมี 1-13