38. พระเยซู ลอก ทรยด
มู จัวยิว ชะลอง พิธี ปัสกา เคริง เนวิม. เฮฺ มัฮ พิธี ณะ จวย พระจัว ตะเยือะ เอิง. เกือฮ เอิง ปุน ณะ เปียน เตะ คีครา ตะเมิง อียิฟ. กาทอ ละอา ละอวย อาเยือะ เนวิม กา ซำ เริม ซะตอก พระเยซู ซะตอก เตะ. มอก ละอวย เนวิม พระเยซู อัฮ ยัง เฮฺ อัฮ ยัง เฮฺ ละ ลูกซิด เตะ เอ๊า กวด ชะลอง ปัสกา เมียฮ มูทอ ตะเมิง เยรูซาเลม. เอ๊า ซำ ลอก อะ มอก ยุม กะรอ.
ลูกซิด พระเยซู ทอ ติ ปุย มาวฮ เอิง มัฮ ยูดาซ ยูดาซ เฮฺ มัฮ ปี ไปน ซะยม ซะตัง ลูกซิด ยะ พระเยซู ทอ. กอวฺ เอิง มัฮ ปุย ฮัน ลวน ตะ มาวฮ กอวฺ เอิง เนือง ซะ บละ มาวฮ ตะ ซะยม ทอ. โฮยด ทอ พระเยซู เมียฮ ลูกซิด เตะ ฮาอืก นึง มิง เยรูซาเลม. ยูดาซ ทอ เฮว ละ ฮัวนา จัว ยิว อัฮ ซำ ทรยด ละ มูทอ แลก เอิง เมียฮ มาวฮ. กอวฺ เอิง โยง ฮัวนา จัวยิว อู ณอม รับ พระเยซู มัฮ พระเมซซิยา กำทอ ซาวบ เลือง ณะ ซำมอก พระเยซู.
ฮัวนา จัวยิว ติ ปุย มัฮ จัวริด เกือฮ มาวฮ ละ ยูดาซ งวย เลียน ณะ ทรยด พระเยซู ทอ. มัฮ แม เลือง เฮฺ กึด ยัง ปีเคริงตัง พระจัว. ยูดาซ เฮฺ ณอม รับ มาวฮ ซาวบ เค คระ ณะ ซำ โจย มูทอ เฮมิก พระเยซู.
พระเยซู ชะลอง พิธี ปัสกา เมียฮ ลูกซิด เตะ นึง เมิง เยรูซาเลม.พระเยซู ไปน คะนม ปัง เวียก เอิง อัฮ ยัง เฮฺ เฮอะ กก เปะ เฮฺ มัฮ แนะ เอ๊า ยุฮ ยัง เฮฺ เพือ ณะ ซำ กึด ปะ ฮาอืก ละ เอ๊า. โฮยด ทอ พระเยซู อัฮ แม ยัง เฮฺ เฮฺ มัฮ แนะ เอ๊า ณอม ซะละ ละ มู กอวฺปะ.
เฮฺ ฮนำ เอ๊า มัฮ ซัณณา ครอวฺ ปืน ยวก ฮมับ ละ มู กอวฺปะ. เคริง จวง เอิง ปืน มัฮ ปัง ทอย เฮฺ มัฮ ณะ ซำ กึด ปะ ฮาอืก ละ เอ๊า.
โฮยด ทอ พระเยซู อัฮ ยัง เฮฺ ละ ลูกซิด เตะ มูกอวฺ ปะ ไก ติ ปุย ปี ซำ ทรยด เอ๊า. มู ลูกซิด เอิง อาเฆริง อัฮ ยัง เฮฺ มัฮ เปน ปี ซำ ยุฮ ยัง ทอ. พระเยซู อัฮ ยัง เฮฺ ลัง มัฮ ปี เกือฮ เอ๊า คะนม ปัง ลัง ปี ซำ ทรยด เอ๊า กำทอ พระเยซู เกือฮ คะนม ปัง ละ ยูดาซ.
แมด ยูดาซ รับ คะนม ปัง ทอ ยัง เฮฺ ซาตาน เลียก ซิง ยูดาซ ทอ ยูดาซ ออก เฮว. กำทอ เฮว ละ มู ฮัวนา จัวยิว เฮว โจย มู จัวยิว เฮมิก พระเยซู เมือทอ มัฮ มะซาวม.
แมด โฮยด ซอวม พระเยซู ทอ เมียฮ ลูกซิด เตะ เฮว นึง มอ มะกอกเทด. พระเยซู อัฮ ยัง เฮฺ มู กอวฺมะ ซำ เปว นอง ปะ เอ๊า. มัฮ ยัง ปี เคียน ปุย อาอืง นึง พระคำพี ปี เลียง แกะ ซำ เบณ ปุย เอิง มัฮ แม แกะ เฮฺ ซำ อาอืก ตอ.
เปโตร อัฮ ยัง เฮฺ ปัง มูทอ นอวฺปะ เอ๊า ณอม เตว นอวฺปะ . พระเยซู อัฮ แม ลัง ยัง เฮฺ ซาตาน กวด เอียะ มู กอวฺมะ เคริง ปุย เอิง. เอ๊า อะทิทาน ละ ปะ ณะ ซำ เกือฮ ความ เจือ มู กอวฺมะ อูเฆา. มัฮแม ซาวม เฮฺ กา ซำ ละออ แอ กอวฺปะ อัฮ ปะ เตะ อู ยง ปี มัฮ เอ๊า ละอวย จวง.
เปโตร อัฮ ละ พระเยซู ปัง เอ๊า ยุม เอ๊า ปะติเสด กอวฺมะ. มัฮแม ลูกซิด เอิง ตัง เอิก อัฮ ยัง เตะ ฆะ.
โฮยด ทอ พระเยซู ลูกซิด เตะ เฮว ตะ ววน อัฮ ซวน เกซเสมมะนี. พระเยซู อัฮ ละ ลูกซิด เตะ มู กอวฺมะ ตอง ปะ อะทิทาน เพือ ณะ อู ปะ ลอก เตะ ลองอาพาวม. กำทอ พระเยซูเฮว อะทิทาน นอง ตู เตะ.
พระเยซู อะทิทาน ละอวย จวง เปือฮ ปืน มัฮ เปียน ปู จะ เกือฮ เอ๊า โณะ ทอย เฮ ลำ มักลวน. ปืน มัฮ อู ไก คระ ไฮน ละ ปี ยวก ฮมับ ละ ปุย.
แมด พระเยซู โฮยด อะทิทาน พระเยซู แม ละ ลูกซิด เตะ. มัฮ แม มู ลูกซิด เอิง เมา เมียฮ ไอท แมด ฮาอืก ละอวย จวง พระเยซู แม ละ ลูกซิด เตะ อัฮ ยัง เฮฺ ลัง. กอวฮ เมอะ ปี ทรยด เอ๊า อี ซำ เพียฮ กะเรย.
ยูดาซ เมียฮ ฮัวนา จัวยิว กำ ตะหาน กำ ปุย เฮิง ทอ มูทอ ไปน เริก วิก เมียฮ คอวฺ อาเบณ. ยูดาซ เลียก ฮอม พระเยซู อัฮ ยัง เฮฺ อาจาน ยิน ดี ลวน นึง โฮยด ทอ พระเยซู มัฮ ซำ เกือฮ มุ ฮัวนา จัวยิว ไฮมน อำ มัฮ เปน ปี ซำ เฮมิก เอ๊า. โฮยด ทอ พระเยซู อัฮ ยัง เฮฺ ลัง ยูดาซ ทรยด มัฮ เอ๊า ยุฮ มัน คอวฺปะ เอ๊า
มะ เฮมิก ตะหาน พระเยซู ทอ เปโตร ทวด วิก เตะ ตอยฮ ละ ซวก ปี รับ จอวฺ จัวริด ติ ปุย. พระเยซู อัฮ ยัง เฮฺ ลัง นอวฺ เปะ วิก ยะ ปะ เอ๊า ปืน ปอ ตะหาน ตะ เปือฮ เอะ มู เตวาดา ซะแพระ เอ๊า เอ๊า ตอง อวด ปี อัฮ เอิง. โฮยด ทอ พระเยซู เยือ ละซวก ปี อาแมะ ทอ แมด พระเยซู ลอก เฮมิก มู ลูกซิด เอิง ตอ เอิก .
มัทธิว 26:14, มาระโก 14:10-50 ลูกา 22:1-53 ยอนห์ 12:6,18:1-11