3. Потопо

Прогия бут бэрш. Дэ свэто исыс бут манушэн. Ёнэ исыс дрыван захалэ, и лэндэ сыс барытка йилэ. Мануша по скицы кэрдэпэ хасютнэ, со Дэвэл пхэндя со хаскирэла саро свэто, зачивава лэс панэса. (патопоса)

Машкир сарэндыр манушэндыр Дэвэл исыс лошало екхэса Ноёса, палдава со ёв пхирэлас ангил Дэвлэстыр, пашэ манушэндэ савэ дживэнас дэ бэзэх. Дэвэл розпхэндя лэскэ одова, со Ёв камэл тэкэрэл, Пхув тэ зачивэл барэ панеса, и палдава Ноё трэби тэ кэрэл баро караблё.

Адава дрыван баро каштуно караблё трэби тэавэл длунгипэн 140 метров, буглыпэн 23 метра и вучыпэн 13, 5 метров, до трин ярусы, бут отсеки, крышаса и вокнаса. Ноё, лэски семья и животна сарэ савэ пэ пхув трэби тэ зракхэнпэ панестыр машкирал дэ адава караблё.

Ноё кандыя Дэвлэс. Ёв пэскирэнса тринэнса чавэнса кэрдя караблё дасаво саво пхэндя лэскэ Дэвэл. Кэрэнас караблё бут бэрш, палдова со ёв исыс дрыван баро.

Дэвэл пхэндя Ноёскэ тэ лэл бут хабэн ваш пэскэ, пэскирэ семьякэ и животнонэнгэ. Сыр саро сыс кэрдо, Дэвэл пхэндя Ноёскэ, со явья дова дэвэс лэскэ, ромнякэ и тринэнгэ чавэнгэ пэскирэ ромненса тэ заджян машкироал до караблё, Лэн сарэн исыс восем человек.

Дэвэл дякэш пхэндя Ноёскэ тэ лэл пэса до караблё кожнонэстыр животнонэнстыр муршэс и джювля и дякэж кожнонэ чириклятыр, соб ёнэ тэ зракхэнпэ барэ панестыр, а дякэш тэ лэл сем муршэн и сем джювлендыр одолэн жывотнонэн, савэн можно тэанэ дэ жертвоприношэние. Сыр сарэ исыс машкирал до кароблё, Дэвэл Кокоро закэрдя паллэндэ дверь.

Тэнче гия брэшинд, саво на пирьячелас тэ джял саранда дэвэса и ратя! Брэшынт джялас и джялас! Паны дякэж джялас пхувьятэр. Саро дэ свэто учакирдяпэ панеса, дякэш сарэ барэ бэрги.

Сарэ мануша и животна, савэ дживэнас пэ пхув, похасинэ. Но сарэ, кон сыс до короблё ачнэпэ джидэ и на хасинэ.

Тэнче брэшинд пирьяча, кароблё плывиндя панчь чёна, Тэпче паны понабутка уджялас. Екхвар караблё тэрдыя пэ бари бэрга, свэто ще исыс учакирдо панэса. Прогия трин чёна и исыс душло набутка бэрга.

Прогия ще саранда дэвэса, и Ноё вымэкья чириклэс (ворона), соб тэполэ, на вышутия ли паны пэ пхув. Чирикло литал и родэлас шуки пхув и на попэя.

Тэнчэ Ноё вымэкья голумбос, нэ ёв дякэш на попэя пхув шуки и рисия палэ кэ Ноё. Прогия курко и Ноё вымэкья ще екхвар голумбос, и ёв рисия кашторэса да муй! Паны уджялас, и пэ пхув гия тэ барьён чар сыр и исыс.

Ноё подужакирдя ище курко и вымэкья чириклэс голумбос дэ трито моло. Пэ адава моло чирило попэя пэскэ штэто, кай тэ бэшэ, и на рисия палэ. Пхув вышутия!

Прогия дуй чёна, Дэвэл пхэндя Ноёскэ: «Кана ту пэскирэ сэмьяса и сарэса скотоса выджя кораблёстыр. Мэк тумэндэ авэла бут чаворэн и внукэн! Тэ авэл бут манушэн пэ пхув! «Тэнче Ноё семьяса выгия короблёстыр.

Тэнче Ноё кэрдя жэртвинико и яндя дэ жэртва скотина розно видно сави можно тэянэ пэ жэртвоприношэния. Дэвэл исыс лошало ада жертватэр и бичадя Ноёскэ бах и лэскирэ сэмьякэ.

Дякэш Дэвэл пхэндя: «Мэ дав лав, со на лава тэ зачивав пхув панеса, пал дова со мануша кэрэнас дылныпэн, наподыкхава по дова со мануша лэна тэ кэрэн бэзэх тэрнэ бэршэндыр».

Соб тэсыкавэл со Дэвэл ракирэлас, Ёв кэрдя радуга. И пхэндя со кажно моло, сыр дро болыбэн авэла тэ сыкавэлпэ радуга, Ёв авэла тэ зрипирэл со пхэндя, со бутыр налэла тэзачивэ Пхув панэса.

Библэйско история с Бытия 6-8