42. Иисусо рисёл до болыбэн.

До дова дэвэс, сыр Дэвэл гадыя Иисусос мулэндыр, дуй лэскирэ ученики джянас дэ авир форо. Пирэ дром, ёнэ ракирэнас пал дова, со сыс Иисусоса, и сыр ёнэ думиндэ, со Иисусо Дова Мэсия саво авэла царёса дэ Израилё. Нэ а лэс умардэ. Тэнче джювля пхэндэ, со ёв всаек джюдо. Ученики на джиндэ, конэскэ кана тэ патя.

Сыр адалэ дуй ученики джянас и ракирэнас, кэ ёнэ подгия Иисусо и гия лэнса. Ёв пуча, палсо тумэ ракирэн, а ёнэ думиндэ со Ёв авирэ форостыр, со на джиндя со кэрэлпэ до Иерусалиме, и роспхэндэ Лэскэ саро, со исыс Иисусоса пал далэ дэвэса.

Тэнче Иисусо лыя тэ роспхэнэ лэнгэ, со сыс чиндо пал Маисеёсте дэ Дэвлэско Лав. Гара пророки ракирэнас, со захалэ мануша кэрэна со Миссия перелыджяла дукх и умарэна Лэс. Дякэш пророки ракирэнас, со пэ трито дэвэс вштэла мулэндыр.

Сыс бэвэль, сыр ученики явнэ до форо, дэ саво камнэ тэ ачапэ. Пал дава ёнэ кхардэ Иисусос тэ ачапэ пэ рат. И Ёв загия лэнса до кхэр. Сыр ёнэ бэшнэ тэ ха, Иисусо лыя маро, пхэндя наис Дэвлэскэ и роспхагья маро. И адай ученики полынэ, со ада исыс Иисусо. Нэ Лэс на ача лэнса, кэрдяпэ нанэ душло ваш лэнгэ.

Тэнче ученики пхэндэ ек екхэскэ: «Ада исыс Иисусо! Гэн палсо амэ дякэ шунасас Лэс, сыр Ёв роспхэнэлас амангэ Лав Дэвлэско!» И Ёнэ гинэ палэ дэ Иерусалимо. Сыр Ёнэ дорик явнэ, то роспхэндэ авирэнгэ ученикэнгэ: «Иисусо джидо! Амэ дыкхьям Лэс!»

Сыр ученики пал дава роспхэнэнас, то кэ ёнэ до кхэр явья Иисусо. Ёв пхэндя лэнгэ: «Бах тумэнгэ!» Ученики подуминдэ, со дыкхэн фано (духо) Лэско, но Иисусо пхэндя: «Соскэ тумэ дарэн? Соскэ тумэ на патян, со ада Мэ? Подыкхэн пэ Мирэ васта и гэра. Хиба кэ духо исын трупо?» И соб тэ допхэнэ лэнгэ, Кай Ёв нанэ духо, Иисусо помангья мэндыр хабэн. Ёнэ дынэ Лэскэ котыр мачё, и Ёв хая лэс.

Тэнче Иисусо пхэндя: «Мэ ракиравас тумэнгэ, со саро чиндо пал Мандэ дэ Дэвлэско Лав трэби дякэ и тэавэл, дякэ саро и кэрдяпэ». Тэнче Иисусо роскэрдя Дэвлэско Лав соб ёнэ тэ полэн. Ёв пхэндя: «гара пророки чинэнас, со Мэ, Мессия, пролыджява бут пхарипэн, мэрэва и пэ трито дэвэс вштава мулэндыр.

Пророки дякэш чинэнас, со Мирэ ученики авэна тэ роспхэнэн Дэвлэско Лав. Ёнэ Лэна тэ прыкхарэн манушэн, соб ёнэ тэ порисён кэ Дэвэл и тэ ачавэн бэзэха. И тэнче Дэвэл простинэла манушэнгэ бэзэха. Мирэ ученики лэна тэ роспхэнэн адава пир саро свэто и, авэла ада с Иерусалима, и джяна кэ сарэ мануша. Тумэ роспхэнэна саро, со тумэ дыкхнэ, со Мэ тумэнгэ пхэндём, со кэрдэм, и со манса кэрдяпэ».

Тэнчэ пал Саранда дэвэс Иисусо бут молы сыкавэласпэ пэскирэ учэникэнгэ. Еквар Ёв сыкадяпэ дэ ек дэвэс манушэнгэ, савэн исыс варикай панчьшэла манушэн! И бут молы Иисусо допхэнэлас Пэскирэ Ученикэнгэ, со Ёв джидо, и сыклякирэлас лэн пал Дэвлэско Царсто.

Иисусо пхэндя Пэскирэнгэ Ученикэнгэ: «Дэвэл дыя мангэ зор (власть) дэ болыбэн и пэ пхув. Пал дава Мэ пхэнав тумэнгэ, джяньте кэ сарэ мануша и кэрэн ученикэн. Болэн лэн дэ лав Дадэско, Чавэско, и Свэнтонэ Духоско. Тумэ трэби тэ сыклякирэн лэн тэ кэрэн саро, со Мэ тумэнгэ ракирдём. И Рипирэн, со Мэ авава тумэнса».

Протия саранда дэвэс, сыр Иисусо вштыя мулэндыр, Ёв пхэндя пэскирэнгэ ученикэнгэ: «Аченпэ дэ Иерусалимо, поки Миро Дад на дэла тумэнгэ зор. Ёв бичавэла тумэнгэ Свэнтонэс Духос» Тэнче Иисусо гадыяпэ до болыбэн, и облоко закэрдя Лэс лэндыр. Кана, Иисусо хулай пэ саро, со сын до свэто, бэшто пэ троно пэ право васт Дэвлэстыр до блыбэн.

Библеско история Евангелия Матфеёстыр 28: 16-20, Евангелия Маркостыр 16: 12-20, Евангелия лукастыр 24: 13-53, Иоанностыр 20: 19-23 и буты апостолэнгири 1: 1-11