3. Michelelo

Luhono lunyishi nu lwa khavira, vandu vanyishi vali va menya mu lilova. Vali ni vakhola vwoni nende injinia munonono. Vwali vuvi muno Nyasaye na lola yononyinyi lilova liosi nende michelelo mikali.

Navutswa Nuhu yanyola tsimbavasi khu Nyasaye. Yali mundu musuvilwa umenyanga mu vandu vooni. Nyasaye yavolela Nuhu khulondekhana khu muchelelo kwa ya kanakana khuruma. Yavolela Nuhu yumbashe liaro likali.

Nyasaye yavolela Nuhu yumbashe liaro liu vurambi tsi mita 140, vukalamu tsi mita 23, vulunji tsi mita 13.5. Nuhu yenyekha khumbakha ni misala, live mu vikhaa viachelekhana vivaka, ving'otso vinyishi, lidilishia ma livimbwi ikulu. Liaro liakhavishi Nuhu, vandu veve nende vuli lukanu lwi nyama imenyanga khu mulimi ihone khurulana khu michelelo.

Nuhu ya hulila Nyasaye. Ye nende vana veve vavaka vi shiyaya, vumbakha liaro khuli Nyasaye yali na va volele. Liaro liumbakhwa khu mihika minyishi shijila liali likali. Nuhu ya khuvilitsa vandu khulondokhana khu muchelelo kwali nu kwitsanga, na va volela va mukalushili Nyasaye nikhali shi va musuvila tawe.

Nyasaye khandi yivaalila Nuhu nende vandu veve va vunjelitsi shukhulia shi tukha vo, nende tsinyama. Lwa vuli shindu shia rechekhwa, Nyasaye ya volela Nuhu inyinga ya khatukha khu ye, mukhali wewe, vana veve vi shiyayi vavaka na vakhali vavo , khwinjila mu liaro-vandu munane halala.

Nyasaye yaruma tsinyama luganu nu luganu, isatsa khu ikhali nende manyonyi khu Nuhu yinjilitsi mu liaro, khu tsi honyinywi khurula khu muchelelo. Nyasaye yaruma tsinyama tsi satsa saba, khu tsi khali saba khurula mu vuli lukanu lwi tsinyama, tsia kharumishilwi khukhola misango chi shihanwa. Vuli shindu lwa shinjila Nyasaye mwene yikala muliango.

Malelo imbula ni ranga khu khuva, ya khuva ni khuva. Ya khuva matukhu makhomi kanne nende vutukhu makhomi kanne vujila khu katukha! Matsi khandi karanga khu rula mwilova. Vuli shindu mwilova mwosi shia khunikhwa nende matsi, khali vikulu virambi.

Vuli shindu shiali khu shivala shia khutsa, nikhali vandu nende tsinyama tsiali mu liaro. Liaro lielema khu matsi khulomba vindu viali mukari vivuli khwirwa na matsi.

Imbula lwa yali ni ya khakatukha, liaro lielema khu matsi mieli chiranu, na khu luhono lwene yolo matsi karanga khu kalukha hasi. Malelo litukhu lilala liaro lia hulushila khu shikulu ikulu, na shivala shiosi shiali ni shi khunishwi nende matsi. Mieli chindi chivili ni chiakhavira vuzunzu vwi vikulu vwalolekha.

Matukhu kandi makhomi kanne ni ka khavira, Nuhu yaruma ilwanyi linyonyi lilangwa likhokho lilole ni kali matsi kakhama. Likhokho lia bulukha nilitsilila khukhava havundu humu, shi lia nyola ta.

Lwinyuma Nuhu yaruma ilwanyi linyonyi lilangwa shiduti. Nikhali shi shianyola havundu hosi ni huma tawe, khu shia kalukha khu Nuhu. Lisitsa ni lia khavira yaruma khandi shiduti ilwanyi na shia menya ni shi kalukha ni lisambu liu musala ku musayituni khu munwa! Matsi kali ni kikhanga na viragwa viali ni vimela khandi!

Nuhu yalinda lisitsa lindi naruma khandi shiduti ilwanyi lukhola khavaka. Shi shia menya ni shi chelela tawe shianyola havundu hukhu hulushila. Matsi kali ni kakhamanga.

Mwieli chivili ni chia khavira Nyasaye yavolela Nuhu, ''Ivi na vandu vovo nende tsinyama tsiosi mu nyela khurula mu liaro lwenulu. Unyole vana vanyishi nende vitsikhulu ma witsulitsi shivala, ''Khu Nuhu nende vandu veve ni varula mu liaro.

Nuhu ni ya kharula mu liaro yumbakha vwali malelo nasamba khu shia vuli inyama yali ni vishilwi khuli shihanwa. Nyasaye ya yanzitswa nende shihanwa yesho na kasitsa Nuhu nede vandu veve.

Nyasaye yavola, ''Ndagaanga vu, shi ni lilaama hasi shijila vindu vitamanu via vandu vakhola, inoho nzononyinyi lilovo nende muchelelo ta. Khali ndio vandu ni voni khurula ni vali vana.''

Nyasaye khu na lomba luhembo lu khuranga khuli shi manyinyilo shi lilakana lielie. Vuli lwa luhembo lu lolekha ikulu, Nyasaye yitsushitsa ka yalaaga, khandi vandu veve ndio.

Lukanu lwi Vanjeli khurula: Liraanga 6-8