30. Yesu Alishitsa Vandu Tsielefu Tsiranu.

Yesu yaruma varumwa veve khwilwatsa nende kwechitsa vandu mu madala lukanu nu lukanu. Lwa va kalukha wa Yesu yali va muvolela kali ni ka kholeshe. Yesu ya vavolela vambushi naye vatsi havundu hivisu vahulushi. Khu vanina khu liaro nivatsia luveka lundi lu muchela.

Nikhali valiho vandu vanyishi valola Yesu nende vechizwi veve nivarula mu liaro. Vandu yavo vilukhachila khu luchinga lu muchela khulelo vatushi luveka lundi yolo imbeli wavo. Khu lwa Yesu nende vechizwi veve vatukha, shituma shia vandu vanyishi shia liyo, ni shi valindilili.

Shituma shiali nende vunyishi vwa vandu 5,000. Vuchila khu valitsa vana nende vakhali. Yesu yali nende tsimbavasi tsinyishi khu vandu. Khu Yesu vandu yavo vali khuli makondi ka vula mwayi. Khu ya vechitsa na honyinya yavo muvo vali valwale.

Nuvutsia khwila, vechizwi va volela Yesu, ''Vwili na madala ka vula himbi. Volela vandu vatsi khulelo vanyole shindu shia valia.''

Nikhali Yesu ya volela vechizwi, ''Munyi vahii shindu shia valia.'' Va mukalushitsa, ''Khwa khanyalitsa khurina? Khuli vutsa nende mikati chiranu ni tsisutsi tsindititi tsivili.''

Yesu yavolela vechizwi veve va volele vandu vali mushituma vikhale hasi mu vunyasi. Vave mu vituma via vandu makhomi karanu karanu.

Malelo Yesu navukula mikati chiranu nende tsisutsi tsivili, nahenza ikulu mwikulu, malelo nasanditsa Nyasaye khu shiukhulia.

Malelo Yesu na meneka mikati nende tsisutsi mu vipanda ma naha vechizwi vahee vandu. Vechizwi va tsililila khu hana shiukhulia khu vandu nikhali shi shiavwa tawe! Vandu vosi valia ni vikura.

Ni va khamala, vechizwi va vunjelitsa shiukhulia shiali ni shi leshelwi na shiatukha khwitsula vilivi likhomi na vivili! Shiukhulia shiosi shiarula khu mikati chiranu nende tsisutsi tsivili.

Lukanu lwi Vanjeli khurula: Matayo 14:13-21; Maliko 6:31-44; Luka 9:10-17; Yowana 6:5-15