13. Lilakana lia Nyasaye nende Vaislaheli

Nyasaye ni ya khimilila vaislaheli khuvira mu Inyanza Imuchi, ya va viritsa mu shiangalangwi khutukha khu shikulu shi langwangwa Sinayi. Shikulu yishi nashio shia Musa yali na lolienje vulimu nu vwakha. Vandu va simikha maheemo kavo ha shikulu henaho.

Nyasaye yavolela Musa nende Vaislaheli, ''Nu mulonda makhuva kanje khandi mu menye khu londokhana ni lilakana lianje, mu litsa khuva vandu vanje vu murungu, vwamihi vwa vasalisi, nende shivala shi takatifu.''

Matukhu kavaka ni ka khavira vandu ni varecheshe mwioyo chiavo, Nyasaye yitsa khwikulu khwi shikulu shia Sinayi, nende tsimbeni, mwoshi, likulu nende liyoko li shisiliva linyishi. Musa wonyene neye wenyekha khutsia khu shikulu ikulu.

Malelo Nyasaye na vaha lilakana navola, ''Ninzi Yahwe, Nyasaye wenyu, wa muhonyinya khurula mu vu rukwa Imisili. Mwa khasaali vanyasaye vandi tawe.

''Mwa khalombi vifanani nu khuvinamila tawe. Shijila Inzi, Yahweh, ndi Nyasaye wi lishiendekha . Muvuli khu rumishila lira lianje mu injila indamanu tawe. Litukhu li Sabato live li takatifu. Mu makhuva kandi khola muhinzi kwokwo mu matukhu sita, shijila litukhu lia saba ni litukhu liu khu hulukha khandi khu kanakana Nyasaye.''

''Ria tata wowo na mama wowo. Wa khira tawe. Wa khaheya tawe. Wa khiva tawe. Wa khaveha tawe. Wa khikomba mukhali wu murende, inzu yeye inoho shiosi shiali nashio tawe.''

Malelo Nyasaye na handika Malako Kumi yaka khu machina kavili naha Musa. Nyasaye khandi ya hana malako kandi manyishi ku khu londwa. Vandu ni va khalondi malako yaka Nyasaye yalaka ala vakasitsa nu khuvalinda. Ni vakachiaya Nyasaye ala va viritsila khu matiinyu.

Nyasaye khandi yaha Vaislaheli mivaalo khuli yenyanga va mulombele liheemo. Lia khalanjilwi Liheemo liu Khuvukana. Liali nende ving'otso vivili via kavulwa nende shitambaya shikali. Musalisi mukali naye wa suvulwa khutsia inyuma wi shitambaya shijila Nyasaye yameenya iweneyo.

Vandu venyekha khulomba vwali imbeli wi Lihemo Liu Khuvukuna. Woyo wosi wa meneeka malako ka Nyasaye yakhaleri muruku khu vwali imbeli wi khuli shihanwa shiu musango khu Nyasaye. Musalisi yakhiri muruku yoko ma ku sambili khu vwali. Musayi ku muruku kuhanilwi ku khunikha vwoni vu mundu woyo nu khu lombwa mu nihu imbeli wa Nyasaye. Nyasaye yarovola amwavo Musa Haruni nende vitsikhulu va Haruni khuva vasalisi veve.

Vandu va hujilila khulonda malako ka Nyasaye yali na vahele, vasaale Nyasaye wonyene makhandi vave vandu veve varovole. Nikhali lu hono lwimbi ni valakienje khuhulila Nyasaye, vakhola vwoni vukali muno.

Khu matukhu manyishi, Musa yali khwikulu khwi shikulu shia Sinayi na lomoloma nende Nyasaye. Vandu va chionya khu mu linda akalushi. Khu, va lerela Haruni itsahabu ni va muvolela avalombele shifanani!

Haruni ya valombela shifanani shi shimoli khu itsahabu. Vandu varanga khusala shifanani nu khu shiha vihanwa! Nyasaye ya valechela muno shijila vakholi vwoni, na kanakana khu vamala vosi. Nikhali Musa ya vasaalila malelo Nyasaye na hulila lisala lielie shi yavamala tawe.

Lwa Musa ya kholomokha khu shikulu nalola shifanani, yaleka muno ni yaranyinya machina ka Nyasaye yali na handichikhu Malako Likhomi.

Khandi Musa yaranyinya shifanani ni shikwa vusi na vukula matsi na vikha mu, navolela vandu vanywi. Nyasaye yaruma matiinyu khu vandu vanyisi ni vakhutsa.

Musa yalomba machina kandi ka Malako Likhomi ka kalushi ha vukono wa kayali ni yarane. Malelo ya nina khu shikulu khandi nasaala Nyasaye aveele vandu tsimbavasi. Nyasaye ya hulila Musa na vaveela. Musa ya kholomokha hasi nende Malako Likhomi khu machina mayia. Ma Nyasaye narulitsa Vaislaheli khu shikulu shia Sinayi vatsi mu Shivala Shialakwa.

Lukanu lwi Vanjeli khurula: Lirula 19-34