17.Lilakana lia Nyasaye nende Daudi

Sahulu yali mwami wa Islaheli wu khuranga. Yali nu vukondo vulayi, khuli ma vandu venyanga. Sahulu yali mwami mulayi khu mihika chiu khuranga mitititi. Nikhali ya menya yava mwoni ukhahulila Nyasaye tawe. khu Nyasaye ya menya yarovola mundu hundi wakhamihi mu vwiyangu vwevwe litukhu lilala.

Nyasaye yarovola muislaheli ushili muvukha walangwangwa Daudi, ave mwami Sahulu niyakharula ho. Daudi yali mwayi khurula mu lidaala lia Betselehemu. Mu makhavi lukanu niyayitsa makondi ka tata wewe, Daudi yanyalitsa khwira isimba nende likunyuli nitsienya khwira makondi. Daudi yali mwichehitsi musuvilwa wahulila Nyasaye.

Daudi yakholekha mulwani mukali khandi mwimilili. Lwa Daudi yali nashili muyayi muvukha yalwana nende mundu mukali walangwa Goliati. Goliati yali mundu witsingulu, wechitswa vulwani khandi yali nu vurambi vwi tsimita tsivaka. Nikhali Nyasaye yakhonya Daudi khwira Goliati nahonyinya Islaheli. Daudi yimilila Vaislaheli khukura vatsiku vavo makhavi manyishi, shiajila vandu ni va mwitsominya.

Saulu ya lolela Daudi imbotokha shijila vuyanzi vwa vandu khu Daudi. Saulu yenya khwira Daudi makhavi manyishi Daudi yivisa Saulu. Litukhu lilala yali na khavanga Daudi amwiri. Saulu yinjila mwichina mwa Daudi yali ni yi visi, nikhali shi yalola Daudi tawe. Daudi yali himbi sana khu Saulu khali yakhamwiri, nikhali shi ya khola ario tawe. Yamenya ya khalaka shipanda shi nguvu ya Saulu khu amenyinyi Saulu shi ya khamwiri shijila vwami tawe.

Mwimalilitsa, Saulu yakhutsila mu lihe malelo Daudi nava mwami wa Islaheli. Yali mwami mulayi, na vandu vamuyanza. Nyasaye yakasitsa Daudi na mukhola muruchi. Daudi yalwana mahe manyishi ma Nyasaye na mukhonya khukura vatsiku Vaislaheli. Daudi yasera Yelusalemi na chilomba lidala lielie likali. khu luhono lu vwamihi vwa Daudi Islaheli yali ni tsingulu nende mwandu.

Daudi yenya khumbakha litembeli mwa Vaislaheli vanyala khusaala Nyasaye nu khumuhanila milukha. Khu mihika 400 vandu vasaalanga Nyasaye nu khumuhanila milukha mu Liheemo Liukhuvukana liali niliumbakhwa nende Musa.

Nikhali Nyasaye yaruma muloli Natsani khu Daudi amuvolele, ''Shijila uli mundu wilihe shunyala khunzumbashila litembeli tawe. Mwikhula wowo alaliumbakha. Nikhali nakhukasitsa muno. Mulala khu vitsikhulu vovo alava mwami wa vandu vanje mihika ni mihika!'' Mwitsikhulu wa Daudi wakhamihi mihika chiosi ni Muhonyi. Muhonyi yali Murovole wa Nyasaye mulala wakhahonyinyi vandu vi shivala khurula mu vwoni vwavo.

Lwa Daudi yahulila makhuva yaka, yasanditsa nu khwitsominya vwangu shijila yali na mulachi luyali lukali nende vukasu vunyishi. Daudi shi yamenya lwa Nyasaye alikhola vindi yivi tawe. Nikhali khuli kakholekha Vaislaheli vali valindi luhono lurambi Muhonyi nashili khwitsa, mihika chitukha 1,000.

Daudi yali mwami wu vulunji nende lisuvila khu mihika minyishi na Nyasaye yamukasitsa. Nikhali namalila vulamu vwevwe yakholela Nyasaye vwoni vuvi.

Litukhu lilala lwa vasikali va Daudi vali ni vali ihale mu vulwani, ya henzela ilwanyi khurula mu inzu yeye yu vwami. Yalola mukhali wu vukondo ni yisinganga. Lira lielie liali Betsisheba.

Havukono hu khuhenza iluveka Daudi yaruma mundu amulanjili. Yakona naye na mulekha akalushi iwewe. Luhono lutititi nu lwa khavira Betsisheba yaruma likhuva khu Daudi livolanga wavelekha.

Musatsa wa Betsisheba ulangwangwa Uria, yali mulala khu vasikali va Daudi valayi. Daudi yalanga Uria khurula mu lihe na muvolela atsi khuva nende mukhali wewe. Nikhali Uria yambakhana khutsia ingo vasikali veshie nivali mulihe. Khu Daudi yamukalushitsa mu lihe na volela mwimilili wewe amure ha mutsiku alinende tsingulu khulelo yirwi.

Uria ni ya kha khutsa, Daudi yayila Betsisheba. Yamenya niyivula mwana wa Daudi muyayi. Nyasaye yaleka muno khu ka Daudi yali nakholi, yaruma muloli Natsani avolele Daudi vulitoho vu vwoni khu ka yali nakholi. Daudi yikanila Nyasaye na muvela tsimbavasi. Mu vulamu vwevwe vwarikala Daudi yalonda nu khukhola ka Nyasaye khali mu tsinyinga tsindinyu.

Nikhali khuli shivoko khu vwoni vwa Daudi, mwana wewe mutoro yakhutsa. Vulwani vwali munzu ya Daudi khuranjila hawenaho. Vwami vwa Daudi vwacheha tsingulu. Khali Daudi lisuvila niliali nilichehi mu Nyasaye, Nyasaye yali nashisuvilili mu kayamulaka. Lwinyuma Daudi nende Betsisheba vanyola mwana muyayi wundi, nivamulanga Solomoni.

Lukanu lwi Vanjeli khurula: 1 samweli 10; 15-19;24;31; 2 Samweli 5; 7; 11-12