38.Yesu Utsamwilwi

Vuli muhika, Vayahudi va saangalilanga Ipasaka. Yukhu khwali khu sangalila khuli Nyasaye ya honyinya va kukaa vavo khu rula mu vu rumwa mu Misili tsimia tsinyishi tsi mihika imbeli. Mihika chivaka Yesu na ranjie lilwatsa nende liechitsa ha vulavu, Yesu ya volela veechi veve vu yenyanga khu sangalila Ipasaka yiyi navo mu Yerusalemi na ya khirilwiyo.

Mulala khu veechi va Yesu nu musatsa wa langwa Yuda. Yuda yale mu vishi wi shikapu shia mang'ondo ka veechi, ni khali yali wa yanza tsisendi khu yi vanga khu rula mu shikapu yomo vuli khase. Yesu nende veechi ni va kha tukha Yerusalemi, Yuda yatsia khu vimilili va Vayahudi na hujilila khu tsama Yesu naye ahelwi mang'ondo. Ya menya vu vimilili va Vayahudi shi va hujilila vu Yesu ni Masiha tawe.Yamenya venyanga khu mwira.

Vimili va Vayahudi ha lala nende musalisi mukali, va runga Yuda vipanda vi tsi siliva makhomi kavaka atsame Yesu. Yaka ka kholekha vutsa khuli ma vaprofeti vali ni valola. Yuda ya hujilila, na vukula tsisendi, na simukha. Yaranga khu khava vwiyangu vu khu vakhonya khu kimila Yesu.

Mu Yerusalemi, Yesu yasangalila Ipasaka na veechi veve. Ni vali khu shukhulia shi Ipasaka, Yesu ya vukula khu mukati na kumeneka. Ya vola, ''Vukuli yuku ma muli . Yuku nu muvili kwanje, ku hanwa khu munyi. Mukhole yaka khu nzitsushitsa.'' Mu injila yiyi Yesu ya menyinya vu muvili kwekwe kwa lakholekha khuli muruku kwi shihanwa khuvo.

Malelo Yesu na vukula shikombe na vola, ''Mung'wi yishi. Nu musayi kwanje ku sundulwi khuli Lihulishitsana Liyia liu khu veela vwoni. Kholi muri khu nzitsishitsa vuli lwa mung'wa.

Malelo Yesu na volela veechi veve, ''Mulala khu munyi alanzama. Veechi vi kosa ni va reva wa kha khola shindi shirwo ni vina. Yesu ya vola, ''Mundu wamba shipanda shiu mukati yishi naye mutsami.'' Ma na hana mukati khu Yuda.

Yuda ni ya kha vukula mukati shitani yi njila muye. Yuda ya simukha natsia khu khonya vimilili va Vayahudi khu kimila Yesu. Vwali vutukhu hakari.

Niva khamala shiukhulia, Yesu nende veechi veve vatsia khu Shikulu shi Misayituni. Yesu ya vola, vosi mu la nyambakhana vutukhu vwa lelo. Ka handikwa, 'Na rumula mwayi na makondi kosi ka la salana.'''

Petelo ya kalushitsa, ''khali vosi ni va khwambakhana, inzi nyala tawe!'' Malelo Yesu na volela Petelo, ''Shitani yenya munyi vosi, ni khali khu saalili ivi, Petelo, lisuvila liolio li vuli khuvwa. Khali ndio, vutukhu vwa lelo, itaywa ni shili khu lakula, u la nyambakhana makhavi ka vaka vu khali shi umanyi tawe.

Petelo malelo na volela Yesu, ''Khali ni ka nyalikha khutsi, shi nyala khu khwambakhana tawe!'' Veechi vandi vosi va vola shi lala.

Malelo Yesu natsia na veechi veve ha vundu alangwa ketsimani. Yesu ya volela veechi veve vasaale va vuli khwinjila mu machelitso. Ma Yesu natsia ha saalila wonyene.

Yesu ma na saala makhavi kavaka, ''Tata wanje, ni ka nyalikha, lekha mbuli khunywa shikombe shi linyakhana yishi tawe. Ni khali nikali menye injila yindi yosi shi ilikhu ho ya vandu va vula khu leshelwa vwoni vwavo tawe, ka kholeshe khuli wenya. Yesu yali mu li nyakhana muno na lucheli lwelwe lwali khuli musayi. Nyasaye ya ruma injelosi khu muha tsingulu.

Vuli lwa ya mala lisaala, Yesu ya kalukha khu veechi veve, na nyola vakoni. Lwa ya kalukha lwa kha vaka, Yesu ya vola, ''Vushi! Mutsami wanje wu yaha.''

Yuda yitsa nende shituma shia vandu vanyishi , vasikali nende vimilili va Vayahudi. Vali ni va chinji vivavi nende vikong'o. Yuda yitsa khu Yesu na vola, ''Milembe, Mwechitsi,'' na mutsununa khu luseye. Yishi shiali shimenyinyilu shia Vayahudi khu menya wa vakimila. Malelo Yesu na vola, ''Yuda, unzamanga khu lu khu nzununa luseye?''

Lwa vasikali vali ni vakimila Yesu, Petelo ya rulitsa shivavi na kutula shiroyi shiu muyinzili wu musalisi mukali. Yesu ya vola, ''Vikha shivavi ihale! Nakharevi Tata tsinjolosi va nwanili. Ni khali khu tukha mbe Tata luyali.'' Malelo Yesu na honyinya shiroyi shiu mundu woyo. Yesu ni ya kha chimilwa, veechi veve vosi vi lukha.

Lukanu lwi Vanjeli khurula: Matayo 26:14-56; Maliko 14: 10-50; luka 22:1-53; Yowana 12:6; 18:1-11