24.Yowana Avatisa Yesu

Yowana, mwana wa Zakaria nende Liseveti, yatukha na kholekha muloli. Yamenya mu shiangalangwi, yalia vushi nende tsisichi. Khandi tsinguvu tsia yifuala tsia lombwa khu moya matinyu ki ngamia.

Vandu vanyishi vitsa khu shiangalangwi khu hulishitsa Yowana. Ya vilwatsila, navola, ''Yikanili, shijila vwami vwa Nyasaye vuli hambi!''

Lwa vandu vahulila vurumi vwa Yowana, vanyishi khuvo vikanila vwoni vwavo, ma Yowana na va vatisa. Vanyishi va vimilili va mavukana vitsa khu vatiswa nende Yowana, nikhali shivayikanila noho khu vuula vwoni vwavo tawe.

Yowana yavolela vimilili va mavukana, ''Munyi tsinzukha ziu vuziva! Mwikanili nu khu kalukhanyinya mwima. Vuli musala ku khamanga matunda malayi ku la remwa nu khu suvwa mu mulilu.'' Yowana yarweshitsa ka valoli vavola, ''Lola, Nduma murumwa wanje imbeli wowo, wa na khulombele injila.''

Valala khu vimilili vi tsidini vareva Yowana nikali menye naye Muhonyi. Yowana ya kalushitsa, ''Ninzi Muhonyi tawe, nikhali aliho mundu witsa inyuma wanje. Nu mukali khali shi ndushili khu voholola vilaro vievie tawe.''

Litukhu li londakhu, Yesu yitsa avatiswi nende Yowana. Lwa Yowana ya mulola, ya vola, ''Henzi! Yesho ni shimeme shi likondi khurula khu Nyasaye, alavukula vwoni vwa vandu vosi khu lilova.''

Yowana ya volela Yesu, ''Shi ndushili khu vatisa yivi tawe. Nivi wenyekha uvatisi inzi.'' Nikhali Yesu ya mu volela, ''Wenyekha u mbatisi, shijila nalio likhuva lienyekha likholwi.'' Khu Yowana ya mu vatisa, khali ndio Yesu shiyali niyakhola vwoni tawe.

Lwa Yesu yarula mu matsi ni ya khavatiswa, Roho wa Nyasaye ya lolekha khuli shituti khurula ikulu na yela khuye. Muluhono lwenolo, mwoyo kwa Nyasaye kwa lomoloma khurula mwikulu, nu ku vola, ''Nivi mwana wanje wa nayanza, na Nyanzizwi nende ivi.''

Nyasaye yali na volele Yowana, '' Roho wa Nyasaye aliitsa hasi ma ayeele khu mundu wa uvatisa. Mundu woyo nu Mwana wa Nyasaye.'' Nyasaye aliho vutswa mulala. Nikhali lwa Yowana ya vatisa Yesu, ya hulila Nyasaye Tata na lomoloma, nalola Nyasaye Mwana, nali Yesu, ma na lola Roho Mutakatifu.

Lukanu lwi Vanjeli khurula: Matayo 3; Maliko 1:9-11; Luka 3: 1-23