16.Vakhalachi

Yoshwa ni yakhakhutsa Vaislaheli valekha khusaala Nyasaye na shivakhunga tsimbia tsindi tsia Vakanaani tsiali ni tsirikale tawe. Vaislaheli varanga khusaala vanyasaye va Vakanaani havukono wa Yaweh Nyasaye wa kilikali. Vaislaheli shi vali nende mwami tawe, khu vuli mundu ya khola ka loli na malayi khuye.

Shijila Vaislaheli vatsililila khuvula khulonda ka Nyasaye. Ya lekha vatsiku vavo va vakura. Vatsiku yavo va huva vindu viavo ni vononyinya vindi. Va vira mu vunyishi. Mihika minyishi ni chia khavira ni va khasaalanga Nyasaye nu khu lechelelwa na vatsiku vavo, Vaislaheli vikanila ni vareva Nyasaye avahonyinyi.

Nyasaye yahana mukhalachi wa va honyinya khurula khu vatsiku vavo nalera milembe mu shivala mwene yomo. Nikhali khandi vandu vivilila Nyasaye ni varanga khusaala vifanani. Khu Nyasaye ya lakhula Vamidiani, luyia lwi shituma shia vandu shiali hambi, va vakuri.

Vamidiani va vukula virakwa via Vaislaheli khu mihika saba. Vaislaheli vali nu vuri, vi visa mu tsimbangaywa khu Vamidiani va vuli khu vanyola. Lu khumalilikha va lilila Nyasaye avahonyinyi.

Litukhu lilala mundu musatsa wa Islaheli walangwa Chidioni yali na hulanga inganu ha vwivisi khu Vamidiani va vuli khwiva. Injeiosi wa Yaweh yitsa khu Chidioni na vola, ''Nyasaye ali nende ivi, mulwani wi tsingulu. Tsia uhonyinyi Vaislaheli khurula khu Vamidiani.''

Tata wa Chidioni yali walombela shifanani vwaali. Nyasaye yavolela Chidioni asambulanyinyi vwaali vwene yovo. Nikhali Chidioni yaria vandu, khu yalinda mu vutukhu hakari. Ya sambulanyinya vwaali na vwaranyinya viasia vitititi. Yumbashila Nyasaye vwaali hambi nende ha yali nasambuli vwi shifanani. Malelo na sambilakhu Nyasaye mulukha.

Mavwevwe nu vwakhashia vandu shi vayanza lwa valola mundu wononyinyi vwaali tawe. Vatsia munzu mwa Chidioni ni venya khu mwira. Nikhali tata wa Chidioni ya va volela, ''Shijila shina muchelitsa khu khonya nyasaye wenyu? Nava nali Nyasaye leshi mwene yilindi!'' Vandu shi vamenya vira Chidioni khu londakhana khu yako tawe.

Malelo Vamidiani nivitsa khandi khwivila Vaislaheli, vali vanyishi va khavalitswa. Chidioni yalanga Vaislaheli halala va vakwane. Chidioni yareva Nyasaye vimanyinyilo vivili khulelo ave nende lisuvila Nyasaye alamurumishila khu honyinya Islaheli.

Shimanyinyilo shiu khuranga Chidioni yavikha shiselo shilikondi hasi nareva Nyasaye lime lia mavwevwe live vutsa khushiselo hasi tawe. Nyasaye yakhola ario. Vutukhu vulondakhu yareva Nyasaye lime live hasi wonyene na shiselo shiumi. Nyasaye yakhola ario khandi. Vimenyinyilo vivili yivi vialomba Chidioni namenya Nyasaye alamurumishila khuhonyinya Vaislaheli khurula khu Vamidiani.

Vasikali Vaislaheli 32000 vitsa khu Chidioni, nikhali Nyasaye yamuvolela navanyishi muno. Khu Chidioni yakalushitsa ingo 22000 vali nende vuri vu khukwana. Nyasaye yavolela Chidioni yali nashili na vasatsa vanyishi muno. Khu Chidioni yakalushitsa vandi vosi narikala nende vasikali 300.

Vutukhu yovo Nyasaye yavolela Chidioni, ''Tsia khu liheemo lia Vamidiani lwa uhulila kavavolanga, shuria khandi tawe.'' Khu vutukhu vweneyovo Chidioni yakholomokha khu liheemo lia vamidiani nahulila musikali navolela weshienyie khuli yali nalori. Wavolelwa yavola, ''Maloro yako kamenyinyanga valwani va Chidioni valakura valwani Vamidiani!'' Lwa Chidioni yahulila yaka yasaala Nyasaye.

Malelo Chidioni na kalukha khu vasikali veve naha vuli mulala shisiliva, inyungu nende lumuli. Va khumbelitsa liheemo lia Vamidiani vali nivakoni. Valwani va Chidioni 300 vavikha tsimuli tsivo mu tsinyungu khulelo Vamidiani vavuli khulola vulavu vwi tsimuli.

Malelo vasikali va Chidioni vosi ni varanyinya tsinyungu tsiavo khulala Vulavu vwi tsimuli nuvulolekha heneyaho. Vavura visiliva viavo ni valanjilitsa, ''Shivavi shia Yaweh nende shia Chidioni!''

Nyasaye ya koyanyinya Vamidiani, nivaranga khwirana vene khu vene. Vwangu vweneyovo Vaislaheli vandi valangwa khurula mu tsingo tsiavo vitsi khu khonyana khwilukhanyinya Vamidiani. Viira vanyishi khuvo, ni vakhunga varikala khurula mu shivala shia Vaislaheli. Vamidiani 120,000 vakhutsa litukhu yelo. Nyasaye yali uhonyinyi Vaislaheli.

Vandu veenya khu lomba Chidioni ave mwami wavo. Chidioni shi ya hujilila tawe, nikhali ya vareva va muhe tsipete tsii tsahabu tsiavali ni varulitsa khu Vamidiani. Vandu vaha Chidioni itsahabu inyishi.

Malelo Chidioni narumishila itsahabu khulombakhu inguvu indayi khuli ya vasalisi vakali vafalanga. Nikhali vandu vachilomba shifanani nivachisaala. Nyasaye yalekha vatsiku vavo vavakuri. Lukhumalishitsa, vareva Nyasaye vukhonyi khandi. Malelo Nyasaye navarumila mukhalachi wundi.

Limenya yili liakalushila makhavi manyishi: Vaislaheli vakhakholi vwoni, Nyasaye avahuuli, ni vareva khu velwa, Nyasaye avarumila mukhalachi wu khu vahonyinya. Khu mihika minyishi, Nyasaye ya ruma vakhalachi vanyishi vahonyinyi Vaislaheli khurula khu vatsiku vavo.

Lu khumalilikha, vandu vareva Nyasaye avahe mwami uvaruka khuli vivala vindi. Venyanga mwami murambi witsingulu, khandi unyala khu vimilila mu vulwani. Nyasaye shi ya yanzitswa nende lienya yili tawe, nikhali ya vaha vutsa mwami khuli vali ni varevi.

Lukanu lwi Vanjeli khurula: Vakhalachi 1-3; 6-8