48. Yesu naye Muhonyi walakwa

Lwa Nyasaye yalomba lilova, vuli shindu shiali shi lunji. Vwoni shu vwali ho tawe. Adamu na Hawa vali va yanzana, khandi vali va yanza Nyasaye. Vulwale ni likhutsa shi viali ho tawe. Nyasaye ye nyanga lilova live mu liva lirio.

Shitani ya lomolomela mu inzukha yali mu mulimi khu a vehele Hawa. Malelo ye nende Adamu ni vakholela Nyasaye vwoni. Shijila vakhola vwoni, vuli mundu uli khu shivala a khutsanga.

Shijila Adamu nende Hawa va khola vwoni, shindi shindu shiu khu rishitsa shia kholekha. Vamenya ni vakwa vatsiku va Nyasaye. Khu lwa kene yako vuli mundu nu mwoni.Vuli mundu nu mutsiku wa Nyasaye khurula mu livulwa. Shu khwali ho ni milembe hakari wa vandu nende Nyasaye tawe. Khu Nyasaye yenya khulera milembe.

Nyasaye ya laka vu mulala khu vitsikhulu va Hawa ya kha tuvulanyinyi murwi kwa shitani. Khandi ya vola Shitani ya kha lumi indecheye yeye. Yaka ka menyinya Shitani ya khiri Muhonyi, nikhali Nyasaye ya kha murulitsi mu vakhutsu nu Khu muha vulamu khandi. Malelo Masiha avukuli tsingulu tsia Shitani mihika ni mihika. Mihika minyishi ni chia khavira, Nyasaye ya menyinya vu Yesu naye Muhonyi.

Nyasaye ya volela Nuhu a lombe liaro lihonyinyi vandu veve Khu rula Khu michelelo.Nindi Nyasaye ya honyinya vandu va mu suvila. Mu injila indala yene yeyo, vuli mundu a tushili khwirwa na Nyasaye shijila vwoni. Nikhali Nyasaye ya ruma Yesu a honyinyi vuli mundu u musuvila.

Khu tsimia tsi mihika, vasalisi va tsililila khu kholela Nyasaye milukha khu lukhu manyinya shijelo shiu vwoni vwa vandu. Nikhali milukha yecho shi chia va rulitsa vwoni tawe. Yesu naye Musalisi Mukali Mwene. Lukanu nende vasalisi vandi, yi rulitsa khuli musango ku khu rulitsa vwoni vwa vandu vosi khu lilova. Yesu yali musalisi mulunji shijila ya vukula shi nyashitso shiu vwoni vwa vuli mundu ya khola.

Nyasaye ya volela Aburahamu, ''Vandu vosi vali khu lilova va li kha kasitswi khu virila khu ivi.'' Yesu yali mwitsukhulu wa Aburahamu wuyu. Nyasaye akasitsa vulintsimbia tsia vandu shijila Nyasaye ahonyinya vili mwoni usuvila mu Yesu. Lwa vandu yava vasuvila mu Yesu, Nyasaye a va vukula khuli vitsikhulu va Aburahamu.

Nyasaye ya volela Aburahamu a muhanili mwana wewe, Isaka, khuli shihanwa shiu musango. Nikhali Nyasaye ya lera likondi ha vukono hu muyayi wewe, Isaka. Vosi khwenyekha khu khutsi shijila vwoni vweru! Nikhali Nyasaye ya lera Yesu, likondi lia Nyasaye, khuli shihanwa shiu musango akhutsi havukono weru.

Lwa Nysaye ya ruma matiinyu ku khu malishitsa mu Misili, ya volela vuli Muislaheli yiri likondi lilunji mu kandi malelo a veshe musayi khu tsi mbahu tsi tila muliango ikulu nende tsi mbeka tsiosi. Lwa Nyasaye ya lola musayi, ya vira khu miliango chiavo na shi ya yira vayayi vavo vu khuranga tawe. Shi kholwa yishi shi langwangwa Khuvirakhu.

Yesu ni likondi lieru liu Khuvirakhu. Yali mulunji ukhali nu vwoni khandi yirwa mu lisangala liu Khuvirakhu. Lwa mundu wosi asuvila mu Yesu, musayi kwa Yesu ku runganga vwoni vu mundu woyo. Nu khuli Nyasaye avira Khu mundu woyo, shijila shia munyashitsa tawe.

Nyasaye ya lomba li hulishitsana nende Vaislaheli, shijila vali vandu va ya rovola vave veve. Nikhali khu lwene yulu Nyasaye wa lomba Lihulishitsana Liyia khu vuli mundu. Khu woyo wosi khurula mu tsimia lukanu nu lukanu, uhujilila Lihulishitsana Liyia , yi yunga nende vandu va Nyasaye. Akhola ario shijila Khu suvila mu Yesu.

Musa yali muloli mukali wa vola makhuva ka Nyasaye. Nikhali Yesu yali muloli mukali khu vosi. Ye ni Nyasaye, khu vuli shia ya khola nu khu vola viali vi kholwa na makhuva ka Nyasaye. Nashio shijila Yesu na langwa Likhuva lia Nyasaye.

Nyasaye ya laka Mwami Daudi vu mulala khu vitsikhulu veve a li khamihi vandu va Nyasaye mihika ni mihika. Shijila Yesu nu Mwana wa Nyasaye khandi Muhonyi, naye mwitsikhulu wa Daudi wonyene wa khamiha mihika ni mihika.

Daudi yali mwami wa Islaheli, nikhali Yesu nu mwami wi lilova liosi! Alikhitsa khandi khwamiha vandu veve khu vulunji ni milembe mihika ni mihika.

Lukanu lwi vanjeli khurula: Liranga 1-3, 6, 14, 22; Khurula 12, 20; 2 Samweli 7:1-8: 13, 9:11- 10:18; Likhunula 21