14. Khuchendachenda mu Shiangalangwi

Nyasaye yamala khuvolela Vaisilaheli Malaki ka valonda khulondokhana ni Liliana lielie navo. Malelo navarulitsa ha Shikulu Shia Sinayi. Nyasaye yaranga khuvimilila khutsia khu Shivala Shilakwa, shialangwa Kanaani. Nyasaye yimila imbeli wavo mu malesi nikahenzi Kanaani nivakalonda.

Nyasaye yali wa laka Aburahamu, Isaka nende Yakobo vu alitsa khuha vitsikhulu viavo Shivala Shialakwa , nikhali vituma via vandu vandi viamenya mu. Valangwangwa Vakanaani. Vakanaani shi vasaala noho khu suvila Nyasaye tawe. Vasaala vifanani nu khukhola mahaka.

Nyasaye yavolela Vaislaheli, ''Murulitsi Vakanaani mu Shivala Shialakwa. Mwa khalombi mulembe navo nu khu vahila tawe. Mwononyinyi vifanani viavo viosi. Nu mu khambuliili mu lasaala vifanani viavo ha vukono hanje.''

Lwa Vaislaheli vatukha khu mbaka kwa kanaani, Musa yarovola vasatsa likhomi na vavili khurula mu tsimbia likhomi na tsivili tsia Vaislaheli. Ya vavolela khuli vatsia khu runishitsa nu khulola khuli shivala shili Khandi vatsia khulola niva Vakanaani vali nitsingulu noho ni vateteshelo

Vandu likhomi na vavili vachenda mu Kanaani khu matukhu makhomi kanne ma ni vakalukha. Vavolela vandu, ''Lilova ni linulu na viragwa ni vinyishi!'' Nikhali varunishitsi likhomi vavola, ''Madala na matinyu muno khandi vandu vakaliya! Nu khuvalwana vala khu kura ma vakhwiri!''

Heneyaho Kalebu nende Yoshua, varunishitsi vandi vavili, vavola, ''Ni kilikali vandu va kanaani na varambi ni tsingulu, nikhali khunyala khuvakura! Nyasaye ala khu khuvanila!''

Nikhali vandu shi va hulila Kalebu nende Yoshua tawe, Valechela Musa nende Haruni ni va vavolela, ''Mwakhulera havundu harishitsa hanu vunishina? khwakhamenyi mu Misili khuvira khwirilwa mu lihe ma vakhali veru na vana veru valombwi varukwa.'' Vandu venyanga khurovola mwimilili wundi avakalushitsi Misili.

Nyasaye yaleka muno ni yitsa mu Liheemo liu Khuvukana. Nyasaye yavola, ''Shijila mu ngalukhane, vandu vosi vala chendacheda mu shiangalangwi na khali Yoshwa nende Kalebu. Mundu wosi uli nende mihika makhomi kavili khutsia ikulu alakhutsila iweneyo ma shi alinjila mu Shivala Shilakwa tawe.''

Lwa vandu va hulila yaka, va hujilila vakholi vwoni ni vareva vuveli. Vavukula vindu viu vulwani ni vatsia khusera vakanaani. Musa ya vakaya vavuli khutsia shijila Nyasaye shi yali navo, nikhali shi vamuhulila tawe.

Nyasaye shi yatsia navo mu lihe yili tawe, khu va kurwa na vanyishi vavo virwa. Khu Vaislaheli vakomokha khurula Kanaani niva chendachenda mushiangalangwi khu mihika makhomi kanne.

Khu mihika makhomi kanne chia Vaislaheli va chendachenda mu shiangalangwi, Nyasaye yavahanilanga. Ya vaha mikati khurula mwikulu, chi langwa ''manna.'' Ya varumila tsisindu wa vikhalanga khu vanyole inyama yu khulia. Khu luhoono yulu lwosi Nyasaye yalomba tsinguvu nende vilaro viavo vivuli khurandukha tawe.

Khu ku khuchenyinya Nyasaye khandi ya vaha matsi khurula khu lwanda. Nikhali khu yako koosi Vaislaheli va tsililila khwi lilila nu khung'ung'una khu Nyasaye nende Musa. Khu keneyako koosi Nyasaye yali musuvilu khu kayali ni yalaaka Abrahamu, Isaka nende Yakobo.

Inyanga yindi lwa vandu vavula matsi, Nyasaye yavolela Musa, ''Lomaloma khu lwanda na matsi kalarula mulwo,'' Nikhali Musa yachiaya Nyasaye imbeli wa vandu khulukhu rumula lwanda khavili ni shisala havukono hukhululomolomela. Matsi karula mu nikanywela na vuli mundu. Nikhali Nyasaye yalechela Musa navola, ''Shulinjila mu Shivala Shilakwa tawe.''

Vaislaheli nivakhachenda chenda mu shiangalangwi khu mihika makhomi kanne, vosi vali nivachiaya Nyasaye vali vakhutsa. Khu Nyasaye yimilila vandu khutsia khu mmbaka kwi Shivala Shialakwa khandi. Musa yali wasakhuli muno khu Nyasaye yarovola Yoshwa khumukhonya khwimilila vandu. Nyasaye khandi yalaka Musa litukhu lilala yakharumi muloli wundi khuli Musa.

Malelo Nyasaye navolela Musa atsi khu shikulu ikulu khu alole Shivala Shilakwa. Musa yalola Shivala Shilakwa nikhali Nyasaye shi yamulekha yinjili mu tawe. Khu Musa yakhutsa ma Vaislaheli ni vikhula khu matukhu makhomi kavaka. Yoshwa ya kholwa mwimilili wa Vaislaheli muyia. Yoshwa yali mwimilili mulayi na yasuvila nu khuria Nyasaye.

Lukanu lwi Vanjeli khurula: Lirula 16-17 Livalitswa 10-14;20;27 Litsushitsa 34