19.Valoli/ Vaprofeti

Mu limenya liosi lia Vaislaheli Nyasaye ya varumila valoli. Valoli va hulila livola lia Nyasaye navo ni va volela vandu ka Nyasaye avoli.

Ilichia yali muloli lwa Ahabu yali mwami mu vwamihi vwa Islaheli. Ahabu yali mundu mwoni wa hujilila vandu khusaala shifanani shiavo shilangwa Bali. Ilichia yavolela Ahabu, ''Shi khuva nende imbula noho lime mu vwamihi vwa Islaheli khutukha lwa mbujilila tawe.'' Yili lia lomba Ahabu na leka muno.

Nyasaye ya volela Ilichia atsi ha muchela kuli mwichendinyama yivisi Ahabu wenyanga khu mwira. Vuli mavwevwe nede vuli khulukolova, manyonyi ka kha mulerele mukati nende inyama. Ahabu nende vasikali veve vakhava Ilichia nikhali shivamunyola tawe. Shimiyu shiali shinyishi ni shiuminya muchela.

Khu Ilichia yatsia mu shivala shirende. Mukhali mulekhwa nende mwana wewe muyayi mu shivala mwene yomo vali hambi khu vwelwa shililwa shijila khukora khwi mbula khwali khu leri inzala. Nikhali valinda Ilichia, malelo Nyasaye na va meta, inyungu yavo yu vusi nende ichupa yavo ya makura shivia vwelwa tawe. Vali nende shililwa munzala mwosi. Ilichia ya menyayo khu mihika.

Mihika chivaka nende inusu ni chiakhavira, Nyasaye ya volela Ilichia akalushi khu vwamihi vwa Islaheli ma alomolome nende Ahabu shijila yenya khuruma imbula khandi. Lwa Ahabu ya lola Ilichia yavola, ''Nivi uyu, muhaka yivi! ''Ilichia ya mukalushitsa, ''Yivi nivi muhaka! Walekha Yawe Nyasaye wa kilikali, usaala Bali. Lera vandu vosi vu vwami vwa Islaheli khu shikulu shia Kameli.''

Vandu vosi vu vwamihi vwa Islaheli halala nende valoli 450 va Bali, vitsa khu shikulu shia Kameli. Ilichia yavolela vandu, ''Mu litsililila khu kalukhanyinya tsinganakani khu luhono lurina? Yawe nali Nyasaye, murumishili! Bali nali Nyasaye, murumishili!''

Ilichia yavolela valoli va Bali, ''Yiri ichilishi ma mu lombe khuli musango, nikhali muvuli khu vwana mulilu tawe. khali inzi na khola khuli ndio khandi. Nyasaye usaalwa ma lere mulilu naye Nyasaye wa kilikali.'' Khu vasalisi va Bali va rechekha musango nikhali shi va hambitsa mulilu tawe.

Malelo valoli va Bali nivasaala khu Bali, ''Khu hulili, Bali!'' Litukhu liosi vasaala ni va lanjilitsa khali nu khwi khalaka nende tsilitwa, ni khali lijibu shi liali ho tawe.

Litukhu ni litsia khuvwa, Ilichia ya rechekha khu lombela Nyasaye musango. Ya volela vandu va tsushi tsi nyungu tsi ngali likhomi na tsivili khwikulu khwi shihanwa khutukha lwa inyama, tsikhuyi khali hasi hu vwali hatsinziva.

Khu Ilichia yasaala, ''Yawe, Nyasaye wa Aburahamu, Isaka nende Yakobo, khu manyinyi nunundi uli Nyasaye wa Vaislaheli ma khandi inzi ndi murumishi wowo. U kholele yaka khu vandu yava va menye uli Nyasaye wa kilikali.''

Vwangu vwenovo, mulilu kwakwa khurula ikulu nu ku samba inyama, tsikhuyi machina, malova nende khali matsi kali himbi nu vwali. Lwa vandu valola varwo vakwa hasi ni vavola, ''Yawe uli Nyasaye! Yawe uli Nyasaye!''

Malelo Ilichia na vola, ''Mwa khaleshi khali mulala khu valoli va Bali yilukha tawe. Khu vandu va kimila valoli va Bali ni vatsia khuviirila ihale.

Malelo Ilichia na volela mwami Ahabu, ''Kalukha vwangu mu lidala shijila imbula yitsanga.'' Khu vwangu ikulu ya mwama, ma imbula ingali niranga. Yawe yali umali shimiyu nu khu manyinya ye naye Nyasaye wa kilikali.

Matukhu ka Ilichia ni kakhavira, Nyasaye ya rovola mundu ulangwa Ilishia khuva muloli wewe. Nysaye yakhola ku khu chenyinya manyishi khu virila khu Ilishia. Lilala khu ku khuchenyinya lia kholeshela Namani, mwimilili wa valwani vatsiku wali nende vulwale vuvi khu muvili kwekwe. Yatsia khu Ilishia amuhonyinyi shijila yali na mu hulilenje. Ilishia ya mu volela atsi khwi yinikha mu muchela khwa Yorodani makhavi saba.

Lu khuranga Namani shi ya yanzitswa khu khola ario tawe, shijila vwalolekha vusilo. Yamenya na kalukhanyinya tsinganakani ni yi yinikha mu muchela kwa Yorodani makhavi saba. Lwa yarula mu matsi lukhola saba muvili kwekwe kwali kuhoni! Nyasaye yali umuhonyinyi.

Nyasaye yaruma valoli vandi vanyishi. Vosi vavolela vandu valeshe khusaala vifanani malelo varanje khuva nuvulunji nende vuveli khu veshienyie. Valoli vavolela vandu vu, ni vakhaleshi vwoni nu khu kalushila Nyasaye, Nyasaye ya kha vakhalachili khuli vwoni. Khandi yakhavaviritsili khu matiinyu.

Mu makhavi manyishi vandu shivahulila Nyasaye tawe. Vatambitsa valoli khali makhavi kandi vavira. Lulala muloli Chelemia ya suvwa mwi tuvu lia khama matsi na lekhwa akhutsilimu. Yiiyinikha mu matoyi kali yisu wilituvu lienelo nikhali mwami yali nu vuveli khuye naruma varumishi veve vatsi khurulitsa Chelemia mu lituvu na shili khu khutsa.

Valoli khali vatsililila khu lomolomela Nyasaye, khali vandu ni va khavayanza. Va khuvilitsa vandu vu Nyasaye alitsa khuvarumula ni va khikanila. Khandi vandu vitsushitswa khu lakwa khwi litsa liu Muhonyi wa Nyasaye.

Lukanu lwi Vanjeli khurula: 1 Vami 16-18; 2 Vami 5; Jelemia 38