18.Vwami Vwahukhana

Mihika minyishi ni chiakhavira, Daudi yakhutsa, ma mwikhula wewe Solomoni yaranga khwamiha Islaheli. Nyasaye yalomoloma khu Solomoni na mureva shindu shia yakha yanzi muno. Lwa Solomoni yareva vusitsa, Nyasaye ya yanzizwa naye muno na mulomba musitsa khuvira vandu vosi mu lilova. Solomoni yeka vindu vinyishi khandi yali mwahuli wu vusitsa. Nyasaye khandi ya mulomba khuva muyinda munonono.

Mu Yerusalemi, Solomoni yumbakha Litempeli lia yise yali ni yarechekha khumbakhwa. Vandu varanga khusala Nyasaye nu khukhola milukha mu Litempeli havukono hu khukholela mu Lihemo liu Khuvukana. Nyasaye yitsa nava mu Litempeli na ya menyamu nende vandu veve.

Nikhali Solomoni ya yanza vakhali khurula mu vivala vindi. Ya kholela Nyasaye vwoni khu lu khuyila vakhali vanyishi, vatukha 1,000! Vanyishi khuvo khurula mu vivala vi lwanyi. Navo vitsanga nende nyasaye vavo ni vatsililila khu vasaala. Lwa Solomoni yali niya khasakhula, yaranga khusaala nyasaye vene yavo khaliye.

Nyasaye shi ya yanzitswa nende Solomoni tawe, khu yamuha matuyu khu lu khuvula khu musuvila. Yalaka khwahulanyinya shivala shia Islaheli mu vwamihi vuvili Solomoni ni yakhakhutsa.

Solomoni ni ya khakhutsa mwikhula wewe Rehobohamu ya vukula vwami. Rehobohamu yali mundu musilu. Vandu vosi va Islaheli vitsa halala khumuha vwami. Vikaanila Rehobohamu khuli Solomoni yali ni ya vakholitsa mihinzi militoho, nu khu varunjitsa vushuru vunyishi.

Rehobohamu mu vusilu ya vakalushitsa, ''Nu mu kanakana tata wanje Solomoni ya mukholitsa mihinzi minyishi, inzi na mukholitsa chiviri hene yaho. Khandi mu lavirila khu matinyu makali khuvira khu ka ya mu viritsila khu.''

Likhomi khu tsimbia tsi shivala shia Islaheli tsiambakhana Rehobohamu. Tsimbia tsivili tsionyene tsia tsililila khu muhulila. Tsimbia tsivili tsieneyetso tsialomba vwamihi vwi Ivuyuda.

Tsimbia tsindi likhomo tsiambakhana vwamihi vwa Rehobohamu tsia rovola mundu ulangwangwa Yerobohamu ave mwami wavo. Valomba vwamihi vwavo mu luveka lwi vuluka ni va vulanga vwamihi vwa Islaheli.

Yerobohamu ya lekha khusaala Nyasaye nachila vandu ni vakhola vwoni. Yumbakha vifanani vivili via vandu khusaala ha vukono hu khusaala Nyasaye mu Litempeli liali mu vwamihi vwi Ivuyuda.

Vwamihi vwi Vuyuda nende Islaheli valomba vutsiku ni vakhuvana vuli khase.

Mu vwami vuyia vwa Islaheli, vami vosi vali voni. Vanyishi va vami yava virwa nende Vaislaheli vaandi venyanga khuva vami ha vukono wavo.

Vami vosi nende vandu vosi mu vwamihi vwa Islaheli vasaala vifanani. Khusaala vifanani khwavo khwa tsukana ni shifwavi nende khali makhavi kandi vahana vana khu kholelwa milukha.

Vami va Yuda vali khurula mu lwivulu lwa Daudi. Valala khu vami yava vali vandu valayi na vamiha mu njila inunji nu khusaala Nyasaye. Nikhali vanyishi khu vami va Yuda vali voni khandi va khali va lunji, vasaala vifanani khandi. Vami valala khali vahana vana vavo khuli milukha khu vanyasaye vu vuveyi. Vanyishi va vandu vi Vuyuda vambakhana Nyasaye ni vasaala nyasaye vandi.

Lukanu lwi Vanjeli khurula: 1 Vami 1-6; 11-12