4. Abrahama Hnianga Pathian Thutiam

Tuilian zoi, kum tamka hnung chun khawvela hin mi an hong tam nawk ta a, ṭong khatkan an ṭong a. Changhomsiala Pathianin thu a pêk angkataka luasip hnêkin hmunkan an om khawm a, khawpui an siam ta zawk a.

Mihriam hei chu an inuang fê a, Pathian thu hom an ngaisak tâk naw a. Rivân phâk daika khopin tlîrna in insâng fêka an bawl ṭan ta a. Hmunkan an om hoi a, sin an thaw lai chun thil ṭhaloi tamka thawngan tih ti Pathianin a hmu a.

Kachun an ṭong chu Pathianin ân dangtir a, ṭong dang dangin ân ṭongtir a, khawvel pumpuia ân dartir ta a. Khawpui an ibawl chu a rihming Babel an sak a, a omzia chu ‘lunginzîngna, buaina, inramna’ tina a chang.

Kum riza tamka hnung chun Pathianin Abrama hnianga chun thu a hril a. Pathianin, “Ni khua nih ni suapui hei aṭang chun suak inla, Ram nang ki lan entir ding tiang chun kal rawh. Mal nangsawm ki ti a, hnam roiinpui fêkan nang siam ki ti a, ni rihming roiinpuitir ke tih. Mal nang sawmpu hei phot chu mal sawm ki ti a, ṭongsia nang inpêlpu chu ṭongsia inpêl ke tih. Nangma a chun hnamtin la thawveng an tih,” a ti a.

Kachun Abrama chun Pathianin a hnianga thu a hril chu a zawm ta a. A nupui Saraii nih a siahlaw hei kapai nih a thil nei kapai ni chun Pathianin ram a inentir, Kanan ram tiang chun a kal ta a.

Abrama chun Kanan ram a thlung kani chun Pathianin a hniangah, “Tlîr inla, hei en vel ta, Ram ni hmu phâk kapai ari chu nang nih ni thlahei hniangah roi dingin nangni pê ke tih,” a ti a. Abrama chun ma rama chun omhmun a khuar ta a.

Nika chu Abraman Melkizedeka, Pathian thiampu chu ân tongpuia. Melkizedeka chun Abrama chu mal a sawm a; “Pathian chunginung chem rinêng nih rivân neitu chun Abrama chu mal sawm rise,” a ti a. Kachun Abrama chun a thilnei kapai aṭang chun sawmapakhat chu Melkizedeka hniangah a pe ta a.

Kum tamka a ral hnung hom chun Abrama nih Saraiin chun nâi ipa an la nei nai naw a. Pathianin Abrama hniangah nâi ipa nih rivâna arsi zaka ni thla hei la chang an tih ti in a a tharin an tiam nawk a. Pathian thutiam chu Abraman a ring a. Pathian thutiam Abraman a ring leiin Pathianin Abrama chu mifelin a ruat ta a.

Kachun Abrama hniangah Pathianin thuthlung a siam ta a. Thuthlung hi pawl inhnika karah siam a chang ṭhina. Pathianin, “Ni ṭhâlbe atang ngeiin naipa nang pe ke tih. Kanan ram chu ni thla hei hniangah ke pe ding a chang,” a ti a. Changhomsiala, Abrama chun nâi ipa ala nei naw a.

Genesis 11-15 sûng aṭanga Bible thu lâk suak a chang.