6. Pathianin Isaka A Ngaisak Thu

Abrahama chu a hong tar ta a, a nâipa Isaka hom a hong puitling ve ta a. Abrahama chun a nâipa Isaka dingin nupui zonga hong inhruai dingin a siahlaw hei lai aṭangin a chipui hei omna rama chun a tir a.

Ni tamka a thang hnung chun Pathianin a siahlaw chu Abrahama unâipa tunu Rebeki hnianga chun a ṭhuia.

Rebeki chun a insûnghei makhalin siahlawpa izui chu a remti ta a. Khua an tlung chun Isaka rêk chun an innei ta a.

Hun sawtka an voi hnung chun Abrahama chu a thi ta a. Pathianin a hnianga thu a intiam kapai ha Isaka pesawngin a om a. Abrahaman tinsêng loi thlahei a nei ding a chang ti Pathianin ân tiama, changhomsiala Isaka nupui Rebeki chun nâi a nei thei naw a.

Isaka chu Rebeki dingin a ṭonginṭaia, Pathianin Rebeki chu nâi ân vontir a, nâi inphîr a vo ta a. Nu sûnga an om lai chun nâite inhnika hei chu an insuala, Rebeki chun imawh a omzia ti in Pathian ân don a.

Pathianin Rebeki hniangah, “Ni sunga hnam inhnika an om a. Inngei naw ni a, a ulinapu chun a naipangpu rong chu bawl a tih,” a ti a.

Rebekin nâi inphîr a hong nei chun a ulianpu chu sen therthurin, hmul tamka neiin a hong pianga, a rihming chu Esaua an saka. Ma zoi chun a nâipangpu chu a hong suak nawka, a kutin Esaua pheikhawng chu a tuma, a rihming chu Jakopa an saka.

Genesis bung 24:1-25:26 sûng aṭanga Bible thu lâk suok a chang.