14. Thlalêra An Khual Inzinna Thu

Israel heiin tlânga Pathian Thuthlung chu an pom hnungin Ram tiam, Kanan ram panin a hruai ṭan ta a, an kalna lampui heia chun sûm ngîrin an hma a hruai tir a.

Pathianin Abrahama hniangah, Isaka hniangah, Jakopa hniangah nih an thlahei hnianga chun ram a loi intiam tâk changhmansiala ma rama chun hnam chi hrang hrang an om a. Ma hnamhei chu Kanan ram mihei an chang. Kanan ram mihei chun Pathian chu an ring naw a, pathian telêm hei chu an biaka thil sual tamka an loi thaw ṭhin.

Israel hei hnianga chun Pathianin, “Ram tiam ram aṭang chun Kanan mihei chu ihnot suak rît roi, anmani hei chu inrempui naw unla, nupui pasal homin inneipui naw roi. An milêm hei hom ise pêk rît roi. Ki thu nin ngai naw chun an milêmhei chu keima hnêkin pathian angkan nin biak zawk ding a chang,” a ti a.

Israel heiin Kanan ram an tlung taw chun Mosian Israel hnam tina mi khatka a tlang suak a. An hnianga chun ram chu i angka chia mawh a chang ti en dingin a tir suak a. Chun Kanan mihei chu mi hrât an chang nih chang loi a rûka en dingin a ti sa dên a.

Mi sawmhlei inhnika inthlang suak hei chun, ni sawm inli sûngin Kanan ram chu an fang suak rît a, an hong kîr nawk a. Enthlatu sawmkahei chun, “Ram chu a ṭhat fe a, bu nih bal hei hom an ṭhat fe a, an khawpui hei chu a roiinpui fe a, an ram mihei hom chu mi lian lianka an chang. Changhomsiala ei va doi chun ei rengkan ni that rît an tih,” an ti a.

Enthlatu inhnika a dang, Kaleba nih Josua chun kahin an ti ve a, “Kanan ram mihei chu an dung an sângkan hrât hom an hrât hrim, changrawchu va doi hne ngei ei tih, Pathianin ani doi pêk ding leiin,” an ti a.

Changhomsiala mipuihei chu Arona nih Mosia chunga chun an inphuna. “Ma ṭiomna rama hin iding khera ani ṭhui maw aw, Idoina hmuna thi a ei nâihei sala intâng hnek chun Aigupta rama han la om mai eila ṭha ding zawk,” an ti a. Kachun mipuihei chun anmani hei chu thata a Aigupta ram tianga inhruai kîr nawk ding hruaitu thar inthlang an awi ta zawk a.

Pathian chu a ning a thik ta fe a, a omna ṭhin intongkhawmna puan ina chun a hong lang ta a. Pathian chun Kaleba nih Josua ti chai loi chu, mi kum sawminhni nih a chung tiang kaphot hei chu an thi ari in ma thlalera hin invâkin ivai an tih. Ram tiam ram chu lût riai naw nih,” a ti a.

Ma thu chu mipuihei chun an hawi chun an insualna hei chu an insîr a, an râlthuamhei chu an lâka, Kanan mihei chu doi dingin an kal suak ta a. Mosian Pathianin nangni kalpui naw nih kal suak naw roi a ti hom chu an ngai awi tak naw a.

Ma indoina chu Pathian chun a kalpui naw leiin inhne in an om a, anmani laia mi tamka chu thatin an om a. Kachun Israelhei chu Kanan ram aṭang chun a kîr nawk ta a. Kum sawminli sûng kapai chu thlalera chun an invai ta a chang.

Pathianin thlalera an vai sûng kapai chu fâk ding a pêk a. Rivân aṭangin “Manna bai” a pêk a. Kachun sa an fak ding va chîka, vamîm hom riakna a pêksa den a. Kum sawminli kapai chu an zakua nih an pheikokhei hom chu inek loi dingin a vong ṭhat pêk a.

Lungpui aṭang homin Pathianin tui a pêk sa den a. Mangka chung hom chun Israel mipuihei chun Pathian nih Mosa chungah an inphunin, anla soisêl ta vu naia. Chonghomsiala Pathian chu Abrahama, Isaka nih Jakopa hnianga thu a loi intiamna a chun ringomin ala loi om ta mai a.

Voika chu mipui hei chun tui an thlasam ta a. Pathianin Mosia hniangah chun, “Lungpui hnianga chun thu hril inla lungpui aṭang chun tui hong suak mai a tih,” a ti a. Changhomsiala Mosia chun lungpui hniangah chun thu hril loiin mipui hma a chun a hrol chun voi inhnika a thuka, Pathian chu a zak tak naw a. Mi kapai in ding chu lungpui aṭang chun tui chu a hong suak ta a. Changrawchu Pathian chu Mosia chunga chun a ning a thik ta fe a, “Ram tiam rama chun lût riai naw tum,” a ti a.

Israelhei chu thlalera chun kum sawminlika an vai sûng chun Pathian chunga ihel kapaihei chu an thi rit tâk a. Kachun Pathianin anni chu ram tiang depa riin a hruai tlung nawk ta a. Mosia chu a tar tâk fe leiin ama thleng dingin Josua chu a thlang ta a. Pathianin nika chu Mosia angka zawlnei la hong inngîrtir a tih ti thu Mosia hniangah a hril a.

Mosia chun ramtiam chu a hmu theina dingin thlang insâng fêka sîpa chun a hruaia. Ramtiam chu râltiang aṭang chun ân tlîrtir a, changrawchu Ram tiam chun a lût ve naw a. Mosia chu a thi ta a, Isarelhei chun ni sawminthunka zet chu an sûn a. Josua chu an hruaipu thar a hong chang ta a. Josua chun Pathian chu a ringa, a thu chu a zawm tlat leiin hruaitu ṭha fêka a hong chang ta a chang.

Exodas 16-17; Nambar 10-14; 20, 27, Deuteronomy 34 sûng aṭanga Bible thu lak suak a chang.