47. Filipi Khua ah Paula nih Sila

Kachun Saula chun Rom lalram kapai a fang chun a Rom rihming Paula ti chu a hmang ṭan ta a. Nika chun Paula nih a champa Sila chu Filipi khua ah Isua Chanchin Ṭha hril dingin an kal suak a. Vandung panga mipui ṭonginṭai dinga kalkhawm hei hnianga chun an va ve a . Nupang khatka puanseduk zuarpu Lidia chu an va hmu a. Ani chun Pathian a hmangai leiin a biak ṭhin a.

Pathianin Isua Chanchin hawi thei dingin Lidia lungril chu a hong pêk a, Ama nih a insûnghei chun baptisma an la ta a.

Paula nih Sila chu Filipi khua ah an châm lai chun ṭonginṭai dingin fianriala an kal ṭhin a. Nintin ṭonginṭaina hmuna an kal lai chun nupang tumawchang khawhri ihman hin a zui ṭhin a. A âisan lei chun a puhei chu sum tamka ân hmutir ṭhin a.

“Mahei hi chunginnung chema bawihei an chang hi. Sandamna lampui nangni hrilpu hei an chang.” ti in ma bawi nunghak chu ân khêk ṭhin a. mangkata ân khêk ân khêk lei chun Paula chu a ning a thik ta a.

Nika chu Paula chu a tiang chun a hei en a, “Isua rihmingin a sûng aṭangin hong suak rawh,” a ti a. Khawhri chun ma nupang chu a kal khal ta a.

Ma nunghâk pu hei chun an sum hmuna ṭhin ha ma nunghâk chun a hmu thei ta nawh ti an hong hawi chun an ning a thik ta êm êm a.

Kachun ma nunghâk puhei chun Paula nih Sila chu an hman a, an vuak hrim a, lungina an inkhumtir ta a.

Paula nih Sila chu lungin sûng inrilna taka chun an khum a, an phei heia chun kol an inbuntir a. Zânril heia chun Pathian inpâkna hlahei sakin an ṭonginṭai ṭhin a.

Kachun voikarengin li nânsa vaikan a hong inhnîng a, lungin inkhâr kapai chu ân hong rît a. Lung ina intânghei kol bunhei hom chu a hong insût pêk ta rît a.

Lungin vêngpu chun inkhâr kapai an hong rît ti a hei hmu chun, lungina intâng kapaihei chu an suak rît chang dingin a ring leiin aman inthat a tum ta a (a san chu intânghei kapai ân suak rît leiin ani hom that a chang ding leiin). Paulan a hei hmu chun rawl inring fêkan a hei inkhêk a, “I hman inhen naw rawh, mahin kin rêngkan kin om rît hi,” a hei ti a.

Lungin vêngpu chu a ṭi a, ân thing a. Paula nih Sila chu inah a ṭhui a, fâk ding a pêk a, an vuakna leia an hliamna hei chu a hruk fâi pêk a. “Sandama ki om theina dingin imawh thaw ki ti?” a ti a.

Paula chun a thung a, “Lalpa Isua ring inla, nang nih ni insûnghei chu sandamin om nin tih,” a ti a. Kachun Paulan lungin vêngpu nih a insûng kapaihei chu baptisma a pêk a, an hlim ta êm êm a.

A thâia chun khawpuia roirêlpuhei chun Paula nih Sila chu lungin aṭangin an sua a. Filipi khua chu suak khal dingin an ti a. Paula nih Sila chun Lidia nih cham ṭhenkahei chu an kan tir a, khawpui chu an suak khal ta a. Isua chanchin ṭha chu ân dar lian ta tr a, Koihran hom a hong inṭhang lian tir a.

Paula nih Kristian hruaitu ṭhenka hei chun khua tamka chu an kan a, Isua Chanchin Ṭha chu an in zîrtîr tir a. Chun Pathian Thuthlung Thar chanchin inzîrtîrin infuina dingin Koihranhei hnianga chun lekha an inzia a, an thon tir a.

Sinthawhei 16:11-40 sûng aṭanga Bible thu lâk suak a chang.