48. Isu chu Messia Miruat A Chang

Pathianin khawvel hi a siamtir lai chun thil kapai hi a famkima, soisêlna ding hi a om nawh. Evi nih Adama hom an inhmangai a, Pathian hom an hmangai a chang. Thina a om naw a, damloina nih natna hom a om nawh. Mangka chia hi a chang Pathianin a thilsiamhei chu an om dân dinga a siam chu.

Setana, rihuan sûnga om chun Evi a thlêma, a lem a ta a. Kachun Evi nih Adama chu Pathian laka chun an loi insual ta a. An insualna lei chun thinahei, natna hei, damloinahei mitin khawvela om kapai hei taksa chunga hin a kop ta tlat a.

Ma hnêka la ṭha nawk loi chu, Evi nih Adama chu Pathian rêka an inlaichinna ha ân tan ta a, a koidar ta a chang. Tun hi chun ma sualna lei chun mi kapai hi Pathian hmêlma ei hong chang ta rît a chang. Changhomsiala sualna leia thil ikapai hong se tâk chu siam ṭha nawk dingin Pathianin thiltum a nei a.

Evi thla a hong piang mi khatkan Setana lu chu lân nawitir a ti a, Setana raw chun a phei aritui chu lân hliamtir a tih tiin Pathianin thu ân tiam ta a. Ma omzia chu Setanan Isua taksa chu that a ti a, changhomsiala Pathianin ni inthumka hnungin kaithoi nawk a tih. Isua chun Setana thithawtheina chu chatuanin lân nawitir a tih.

Pathianin khawvel pumpui tui lianin a siat rît lai han, ama ringtuhei dinga sandamna lampui inentirna dingin rilong a buatsai pêk a. Magka den chun an insualna leia inboiraltir rît thlâk ni phu hom siala, Isua ringou taphothei dingh chun Pathianin sandamna lampui a hong buatsai ta a chang.

Abrahama malsawmpu ha Melkizedeka a chang. Melizedka angka den han Isua hi puithiam a chang, changhomsiala Isua raw chu puithiam Lal chem a chang. Isua chun inthawina voika chai ân hlân a, ama ngêi chu khawvel pumpui sualna la boi ding chun inthawina voika chai a ṭul. Mitinin ei insualna leia hremna ei tuar ding chu Isuan a la boi ta rît a chang.

Pathianin Abrahama hnianga chun, “Nangma a chun khawvel mi kapai malsawmin om an tih,” a ti a. Isua chu Abrahama thla a chang. Isua zarin khawvela mi kapai chu malsawmin an om a, ama ringpu kapai chu Pathian hnam thlang, thlarau tianga Abrahama thla an chang.

Pathianin Abrahama hniangah a nâipa aiin berate a pêk a. Pathian dên chun khawvel mi kapai inthawina dingin berate dang a pêk a. Pathianin, Pathian berate Isua chu a pêk a chang. Ei insualna leiin thi thlak rît ei chang. Changhomsiala Pathiani Isua chu ei aia thi dingin inthawina in a hong pêk a.

Pathianin Aigupta ram sûnga hripui ân lêngtir lai han, Israel tinin berate an that a, a kot bangahei chun a thisen chu an tât a ṭul a, Pathianin thisen a hmu tik pai a inheiha a kan a, nâi lutîr ipa hei ha a that pêk nawh a chang. Mahi Kalkân Kût a chang.

Isua hi ei kalkân ruai berate chu a chang. Ani chu dem kailoi, famkim, sual nei loi a chang a, Kalkân in ṭhe huna that a chang. Miin Isua a ring tik pai Isua thisenin a sualnahei chu a lâk boi pêk a, Pathian hremna chu an inkan ṭhin a chang.

Pathianin a hnam thlang Israelhei ni chun thuhtlung a siampui a, Pathian thuthlung thar a chun i ihnama mi hom changsiala Isua an ring phot chun Pathian hnam thlang an hong chang thei.

Mosia chu zawlnei roiinpui Pathian Thu inpuangdarpu nih Mosia angka denin Isua chu zawlnei a chang a, changhomsiala Isua chu zawlnei roiinpui chem a chang. Ani chu Pathian Thu a chang.

Pathianin Davida hniangah a thla heia inthokin khatka chu Messia chang a tih tiin thu ân tiam a. Isua, Messia chu Davida thla a mi bîk a chang.

Isua chu Davida angka lal a chang a, changhomsiala Isua chu thil siam kapai hei chunga lal a chang. Hong kîr nawk a ti a, a Lalram chu felna nih thlamuangna in roirêl a tih.

Genesis 1-3,6,14,22; Exodus 12,20; 2 Samuela 7; Hebrai 3:16,4:14-5:10, 7:1-8:13, 9:11-10:18; Thupuan 21 sûng aṭanga Bible thu lâk suak a chang.