29. Ngaidamna Neiloi Siahlaw Chanchin

Nika chu Peteran Isua hniangah, “Zîrtîrtu, ki unâipa in ki chungah thil thaw sual siala, voi izaka mawh ngaidam ki ti? Voi sarika ri mawh?” a ti a. Isuan a hniangah, “Voi sari a riin ki ti nawh, voi sari hmun sawmsari ari in nang ki ti a chang zawk,” a ti a. Ma thu hi Isuan mi itik lai paiin ei ngaidam ding ti thu a hrilna a chang.

Isuan, “Pathian ram chu lal tûmaw changin a siahlawhei hinagah sum infel tum ni chun a tekhin a. A sihlawhei laia mi khatka chun kum 200,000 lai hlaw ding zet khop tangka sum a pu hnianga chun ân bâng a.

“Siahlaw chun a inbâng chu a thung thei naw leiin, “A nupui, a nâihei an insûngin a inbâng kapai a rul theina dingin sala zuar dingin thu a pêk a.”

A siahlaw chu lal hma a chun bokkhup a, “Ki chungah za ne ngai inla, ki inbâng kapai a rêngkan nang thung rît ke tih,” a ti a. Lal chun siahlaw chu inriang a hmu ta êm êm a, a inbâng kapai chu a ngaidam ta a.”

Siahlaw chu a kal a, siahlaw dang khatka a sum thla inlîka hlaw ding ân bângin a va hmu a, Siahlawpa chu a hmana, a ringa a lok a, “Ni inbâng kapai ni pe rawh,” a ti a.

Ani chu a hmakunga khûksâiindîlin, “Khawngaitakan ki chungah za ne ngai inla, ki inbâng kapai chu nang pe khîr rît ke tih,” a ti a. Changhomsiala, ani chun a ngaidam awi naw a, a inbâng kapai chu a rul zoi hmâka chu tâng ina a khum ta a.

Kachun a siahlaw champui hei chun a thilthaw aw chu an hmu in poi an ti fê a, a thithaw dân kapai chu an pu chu an va hril ta a.

Lal chun siahlaw chu a koi a, a hniangah, “Siahlaw hmangloi, ani hni chiam leiin ani inbânghei ha nang ki ngaidam a, nang hom mangka dên chun ni thaw ve ding niang a chang,” a ti a. A ningthik chun a inbânghei kapai chu a thung zoi hmâka chu lungina a khum ta a.

Chun Isuan, “Tûpai nin lungril takan nin unâihei nin ngaidam naw chun ki Pa rivâna mi homin nin chungah mangka dên chun thaw vêng a tih,” a ti a.

Mathaia 18:21-35 sûng aṭanga Bible thu lâk suak a chang.