19. Zawlneihei

Israelhei chanchin inziakna kapaia hin Pathuanin zawlnei hei a tirzia ei hawi a. Pathian atangin zawlnei hei hin thu an dong a Pathian thucha hei chu mipuihei hniangah an hril thin.

Israel lal rama A haba an lal laia zawlnei om chu Elija a chang. Ahaba chu lal thaloi fe a chang a. Mihei chu pathian telem Baal a chu biak dingin a fui a. Elija chun Ahaba hniangah “Ki thu loi chun Israel rama rua nih ridaw hrim hrim thla naw nih,” a ti a. Chun Ahaba chu a ning an thiktir ta em em a.

Pathianin Elija chu thlalera tuidungte ruama a chun inbi dingin a hril a. Zing nih zana a fak ding pe dingin Pathianin Vaak chu thu a pek a. Ahaba nih a sipaihei chun Elija chu an zong a, changrawchu an hmu zoi naw a. Khua chu an thal nansat fe leiin tuidungte hei hom chu an hong kan ta rit a.

Maleiachun Elija chu ramdang tiang a kal ta a. Tam chu a nansat fe leiin nuhmei khatka chu a naipa rek fak ding an thlaksam a. Changhomsiala Elija chu a loi ngaisak a, an baiphit nih an sahriak a kang loina dingin Pathianin a ngaisak zuitir a.

Kum inhumka nih a chanve hnunga chun Pathianin Elja hnianga chun Israel rama kir nawk dingin a hril a. Chun rua a sur nawk ding thu Ahaba hom hril nawk dingin a ti a. Ahaban Elija a hmu nawk chun, ”Nangma hin maw buaina siampu ha” a ti a. Elija hom chun, “Buaina siampu chu nangma ne chang, Pathian tak biak loiin Baala chu ni biak a. Tun hin mipui kapai karmel thlangah hong thui rit roi, a ti a.

Israel mipui chu Baala puithiam 450 tangsa in karmel thlanga chun an hong kal khawm a, mipuihei hnianga chu Elija chun “Lung awpin kaiin intenka maw om nin ti? Lapa chu Pathian a chang chun ama chu zui unla, a rong bawl roi. Chun Baala chu pathiana nin ngai chun ama chu zui unla ama chu biak roi” a ti a

Kachun Elija chun Baala puitham hei hnianga chun “Sehrat chal chu la unla inthawina inhlan roi, changrawchu mei chu sem chok naw roi, Kei homin mangka chia chun thaw ve ke tih. Kachun meia hong thungpu chu Pathian tak chang rise. A ti a. Kachun Baala thiampu hei hom chun inthawina chu an buatsai a, mei raw chu sem loiin.

Kachun Baala thiampuhei chu ball hnianga chun an tongintai a, “O Baal nihong thung rawh,” an ti a. Sunkhua in an tongintai a, an inkhek a, chemte hei chun an panghei chu an sun pop a, changrawchu Baala chun an inkhek ri chu a thung nawh.

Khawloi tiang chun Elija hom chu Pathian hniangah inthawina an hlan ve ta a. Tuibel lian feka sawmhlei inhnika chu tui an sung sip a, sa nih thing nih maicham bul nih a sira rineng ari in a hu chet hmaka chu maicham chu an buak khum a.

Ma zoi chun Elija chu a tiongintai a, “AW Lalpa Abrahama Pathian Isaka Pathian Jakopa Pathian, vawn hin Israel Pathian ni chang zia nih ni siahlaw hril kai loi ki chang zia ni hong inhawitir rawh. Ma mipui hei hi Pathian tak ni chag zia an hawi theina dingin ni hong thung rawh,” ti in a hni a.

Voika rengin rivan atang chun mei chu a hong thla ta a, sa nih lungpui nih maicham kawla rineng a ri in a kang fai rit a. Mipui hei chun mahei chu an hmu chun rinengah an bokkhup a, “Lalpa chu Pathian a chang! Lalpa chu Pathian a chang” an ti a.

Mazoi kani chun Elija chun “Baala puithiamhei ha hman unla khatka hom zua naw roi” a ti a, Kachun mipuihei chun Baala puithiam hei chu an hman a. Elija chun a thuia, a that rit a.

Chun Elija chun lal Ahaba hnangah “Khawpui tiang chu kir thai rawh, rua surin nang dan a tih” a ti a. Kachun khua chu a hong innim a, rua chu nansa vaikan rivan in a hong sur ta a. Pathianin khua inthal chu an tawp a. Pathian a chang zia an langtir a chang.

Elija hnianga chun Pathianin zawlei dingin Elisa chu a thlang a. Elisa hmang hin Pathianin thilmak tamka a thaw a. Thilmak a thaw laia khatka chu Naamana, hmelmahei hoitu chu vun tianga natna invoi hniagah thu a thlung a, Elisa chanchin a loi hawi chun a hniangah a hanga indam dingin a hni a. Elisa chun Jordan tuidunga voi 7ka inhnawk ding tiin a loi hril a.

A tir chem chun Naamana chu a ning a thik a. Mangkata thil chu inthlaw thlak fekan a ngai leiin a thaw awi naw a. Changhomsiala tawika hnung chun a ngaidan chu a tleng a. Jordan tuidunga chun voi 7ka an hnawk a, an hnawk zoi chun a vunhei chu a loi dam pek ta a. Pathianin a indam pek a chang.

Zawlnei dang tamka an om a, mipui hei hnianga chun mlem biak mong khal a mihei hnianga indikna nih zangaina inhmutir zawk dingin an hril a, Zawlneihei chun mipuihei hnianga chun suanlam an siam a, nun tha in an nun naw a chang chun Pathian roirelna an chungah hong tlung a ti a, hrem mai a tih tiin an hril lawk a.

Hun tamka sug chun mipui hei chu Pathian an loi ngaisak naw a. Voi tamka zawlnei hei chu an loi soisakin an loi that thin a. Nika chu Jeremia chu tui omloina tuikaia chun an thlak a, thi dingin an mak khal a, Tuikai sung chirpoka chun an hnik a changhomsiala laion inriang a hmu leiin a thi hma in a sap suak nawk a.

Mipuihei chun an hmel chun an huat lai hom chun zawlneihei chun Pathian dingin rong an bawl ta vu nai a. An sual an sim naw chun Pathianin la hrem rit a tih tiin mipui hei chu an hril lawk thin a. Ma khela chun Pathian Naipa Messiah chu a la hong ding thu an hril sa den a.

I Lalhei 16-18, II Lalhei 5, Jeremia 38 sûng aṭanga Bibe chanchin lâk suak a chang.