26. Isuan Rongbawlna a Ṭan Thu

Setana thlêmna a doi zoi hnungin Isua chu a omna Galili tiang chun Thlarau Thianghlima thilthawtheina hmangin a kîr nawk ta a.

Isua chu a seilianna Nazareth khua a chun a kal ta a. Chawlni chun Pathian biakina a lût a. Zawlnei Isaia lekhabu an pêk a. Isuan ma lekhabu zual chu a sût a, a siar a.

“Riangvâihei hnianga chanchin Ṭha hril dingin a Thlarau chu ki chungah a buak a, salhei hnianga suakna thu hei, mitchawhei hnianga mit vârna thu hei, lungina intânghei suakna thu hril dingin. Ma hi Lalpa lungawi kum chu a chang,” ti hi.

Chun Isua chu a ṭhung a, Mi kareng chun a ma tiang an en ṭhup a. A thu hril chu Messia chanchin a chang ti an hawi a. Isuan, “Ma Pathian Thu hi vawn hin nin hawi kungah a hong tlung ta,” a ti a. Mi kapai chun a thu hril chu mak an ti fê a. “Ma hi Josefa nâipa ha a chang naw maw?” an ti a.

Chun Isuan an hniangah, “Thu dik nangni ke hril hi, zawlnei tuhom mani khawmi in an lawm ngâi nawh, zawlnei Elija damlai chun Israel rama nuhmei tamka an om a. Kum inthumka nih a chanve rua sûr loia a om lai han hnam dang nuhmei hniang chai ti loi chu Israel rama om nuhmei tu hniang homa Pathianin Elija a tir nawh,” a ti a.

Chun zawlnei Elisa damlai hom han Israel ramah vun natna invoi tamka an om a. Changhomsiala Elisa chun tu vun natna hom ân dam nawh. Israel hei hmêlma hoitu, Naamana chai ha ân dam ha,” a ti a. Ma thu chu mipuihei chun an hawiin an ning a thik ta fê a.

Isua chu Nazareth mihei chun inkhawmna ina inthok chun an hnuk suak a, khâmah an pai thlâk theina dingin khaw putiang chun an ṭhui a. Changhomsiala Isua chu mipui hei kara chun a rel suak a, Nareth khua chu a ma khal ta a.

Ma khua chu Isuan a mâk khal a, mipui hei chun nânsa vaikan ani chu an zui a, a hniangah an hong a, dam loi kapai mitchawhei, phei inbâi hei, kuar sêt hei nih ṭong theiloi hei an hong ṭhui a. Anmani hei chu Isuan a loi indam hoi a.

Mi tamka, ramhuai ipawlhei chu a hniangah an hong ṭhui a. Isua thupêkin ramhuai hei chu mihei sûng aṭang chun an hong suak a, “Pathian Nâipa chu ne chang,” ti in an inkhêk a. Mipui hei chun mak an ti a, Pathian an chawimawi ta a.

Chun Isuan mi sawmhlei inhnika hei, a zîrtîr an iti hei chu a thlang a. Zîrtîr hei chu Isua zîrtîr hei an chang. Ani chu an zui a, a ma aṭangin an zir a.

Mathaia 4:12-25; Marka 1:14-15,35-39; 3:13-21; Luka 4:14-30,38-44 sûng aṭanga Bible thu lâk suak a chang.