9. Pathianin Mosia a koina

Josefa chu a thi hnungin, a unâi hei ha Aigupta rama chun anla om ta mai a. An thla hei rêk chun anla om a, nâi hom an nei tir a. Te nih nâi hom tamka an nei a, mahei chu Israel thla hei tia ihawi nih koi an chang.

Kum riza tamka a liam hnung chun, Aigupta rama chun Josefa hawi loi lal thar Farawa a hong inlal ta a. Kachun Aigupta mihei chun Josefa nih anmanihei a ṭangpuina zong zong ha inhnilin an hawi tâk naw a. Changhomsiala Israel mihei chu an hong pung a, an hong tam tâk fe leiin Aigupta mihei chun an ṭi ta a. Kachun Aigupta lal Farawa chun Israel hei chu salin an siam ta a.

Aigupta mihei chun an thu loiin Israelhei chu in nih khawpui lian fê fêka tamka an inbawltir a. Sin an thaw nânsat leiin an sawl fê a, an riang êm êm a, an nun a sawl inngham thei naw a. Changhomsiala Pathianin mal a sawm a, tu nih te tamka an hong nei a, an hong pung ta tual tual a.

Farawa chun Israel hei chu nâi an hong nei a, an hong pung tual tual ti a hmu chun Israel hei laiah nâi ipate piang taphot chu Nile tuidunga pai dingin thu a pe ta a.

Israel nupang khatka chun nâi ipate a nei a, a pasal rêk chun theitawp insua in an thup ta a.

A nu nih a pa chun an thup thei tâk naw hnung chun phâiruangin rilong an siam a, Nile tuidung kawla chun phâiruang bila chun an thup ta a. Nâite unu chun imawh a chang hrim ti hawi dingin a en rûk mai a.

Farawa nâinu tui insil chun ma rilongte chu a hmu a, i hrim mawh a chang ti a zuk en a. Nâite chu a hmu chun a zuk lâk a, a nâi dingin a la ta a. Ma nâite chu a enkolpu dingin a nu a chang ti hawi loiin a nu chia chu a enkol dingin a pêk a. Nâite chu a hong thlei hnung chun Farawa nâinu hnianga chun a thakkhîr ta a. Nâite rihming chu Mosia ti in a loi sak a. Mosia rihming omzia chu “Tui aṭanga lâk suak” tina a chang.

Nika chu Mosia chu a hong tlanginvâl chun Aigupta miin Israel mi suak khatka hi a vuak lai a hmu a, Mosia chun Israel mi chu a san a tum a.

Tûhmanin an hmu nawh a son a, Aigupta mi chu a that a, rinênga a phûm a, changhomsiala mi khatka chun a loi hmu a.

Farawan ma chu a loi hawiin Mosia chu that tumin a zong ṭan ta a. Kachun Mosia chu Farawa sipai heiin an that thei loina ding hmuna thlalêr tiang chun Aigupta ram aṭang chun a suak ta a.

Mosia chu Aigupta ram aṭanga ram hla fêkatia chun thlalêra bera vêngpu, bera vêngin a va om ta a. Ma hmuna chun nupui a va nei a, nâi ipate inhnika a va nei a.

Nika chu Mosia chun bera a vêng laiin hruichîmbûka chun mei chok lai hi a hmu a. Changhomsiala hruichîmbûk chu meiin a kâng nghal naw a. Mosia chun chiang fêka hmu tumin a va hnâi ta a, kachun a va hnâi chun Pathianin rawlin, “Mosi, ni pheia inthokin ni pheikhok hei ha hlîp rawh, ni ngîrna ha hmun thianginhlim a chang,” a hong ti a.

Pathianin, “Ki mihei tuarzia chu ki hmu a, Aigupta rama chun kimi Israelhei chu sal an tângna aṭangin ne hruaisuak theina dingin Farawa hniangah nang tir ke tih. Abrahama, Isaka nih Jakopa hei hnianga ram pêk dinga ki intiam ha nang pêng ke tih,” a ti a.

Mosia chun, “Miin ane tirpu chu tûmawh a chang, a rihming imawh a chang ti annên don chun imawh tîng ki ti?” a ti a. Pathian chun, “KEIMA CHU KE CHANG” a ti a. “ ‘KEIMA han nin hniangah ani hong itir ke chang,’ ti rawh. Chun Yahweh, nin thlatuhei Abrahama, Isaka nih Jakopa Pathian ke chang. Ma hi chatuana ki rihming chu a chang ti hril sa rawh,” a ti a.

Mosia chun thu chu a hril thiam ân ring naw leiin a awi tâk naw a, kachun a ṭangpuipu dingin a unâipa Arona chu Pathianin a tir a. Pathianin Mosia nih Arona hnianga chun Farawa lungril chu khir fêng a tih ti a hril sa dên a.

Exodus bung 1-4 sûng aṭanga Bible thu lâk suak a chang.