12. Kalsuakna Thu

Israelhei chun Aigupta ram chu an suak khal thei tâk leiin an law mêm êm a. Sala intâng an chang tâk naw a, Pathianin Abrahama thlahei hnianga a loi intiam, ram tiam rama chun an kal ding a chang tâk leiin. Israel heiin Aigupta mihei hniangah an ihni taphot rângkachak, tangkarua nih thil hman hlu fê fêkahei chu an pêk a. Hnam dang mihei homin Pathian an ring ve leiin Israel heiin Aigupta an suak khal lai han an suak ve a.

Pathianin sûna sûm ngîrin a hruaia, zâna mei ngîr insâng fêkan a hruaia. Anin zin sûng kapai chu Pathianin a hruaiin a ompui tir a. Ani chu an zui ding nih an ompui ding omsûn chu a chang.

Hun tawika hnung chun Farawa nih a mipuihei chu an lungril ân thleng thuta, Isarel hei chu an um ta chiama. Pathian chun Farawa nih an pathian hei hnêkin thil a thawthei zia nih a roiinpui zia ân langtir awi lei a chang.

Kachun Farawa nih a sipaihei chun sala siam an tum nawk leiin an um ta chiam a. Israel heiin Aigupta sipaihei chu an hei hmu chun Tuipui sen nih Farawa sipaihei inkâra inchepin an om ti an hawi suaka, an ṭi ta êm êm a. “I dinga Aigupta ram ha ei isuak khal mawh a chang? Ei thi zoi ding a chang hih,” ti in an inkhêk a.

Mosian mipui hei hnianga chun “Ṭi naw roi! Vawn hin Pathianin nangni sansuak a tih, nin ta dingin doi a tih,” a ti a. Chun Pathianin Mosia hnianga chun, “Mipui hei hi Tuipui sen tiang inthîl dingin hril rawh,” a ti a.

Aigupta mihei chun Israel mipui hei chu an hmu thei loina dingin Aigupta nih Israel hei inkâra sûm ngîr ha ân tawl tir a.

Tuipui sen ha ân ṭhen theina dingin Pathianin Mosia hnianga chun a kut phar dingin thu a pêk a. Tuipui inlâina taka chun lampui a om theina dingin tuipui chu voi tiang nih chang tiang chun thlipuiin ân sêmtir ta a.

Israel hei chun tuipui chu ṭuang angka khopa om, rinêng hula chun an sîr tiang ve ve bang angka khopa om inkâra chun an kal ta a.

Kachun Pathianin sûmpui chu ân kangtir a, Aigupta mihei chun Israel hei chu him vaikan an suak ti an hawi chun an um tir ta a.

Aigupta mihei chun Tuipui laia chun Israel hei chu an um ta tir a. Changhomsiala, Pathianin Aigupta mihei chu ân buatir a, an tolailîr phei hei chu a lâk pêk a, intak fêka chun ân khal tir a. “Rawkhal mai ei tih, Pathianin Israelhei chu a ṭangpui a chang hi,” an ti a.

Israel hei chu him vaikan vahmuang an kâi chun Pathianin Mosia hniangah a bân phar nawk dingin a ti a. A hang phar nawk chun tuipui chun Aigupta sipaihei chu ân khûm a, tuipui chu a pangâiin a hong luang nawk ta a. Aigupta sipai kapai hei chu tuia chun an thi ta rît a.

Israel heiin Aigupta sipaihei chu an thi ta rît ti an hmu chun Pathian chu an ring ta a, Mosia hom chu Pathian zawlnei a chang ti an ring ta a.

Sal aṭang nih thina aṭanga Pathianin a sansuak zia an hmu chun an lawm ta fe a, an hlimin an phûr ta êm êm a. Tun chun zalen fêkan Pathian an biak thei ta a, an zalenna lawmin hla tamka an sak thei ta a chang. Zalenna thar an nei tâk leiin Pathian chu an inpâk ta a.

Aigupta sal aṭanga a doi pêkana nih a hne pêkna leiin Pathianin Isarel hei chu kum tin Kalkân kût ruai hmang ding nih inser dingin thu pêk a. Kalkân kût ruai chu berate dem kailoi thatin bai chol ṭang loi nih Aigupta sal aṭanga a sansuakna lawmin an inser ṭhin a chang.

Exodas bung 12:33-15:21 sûng aṭanga Bible thu lâk suak a chang.