27. Samari Miṭha Chanchin

Nika chu dân hawi mi khatka hi Isua hniangah a hong a, “Zîrtîrtu, chatuana nunna ki nei theina dingin imawh thaw ki ti?” a ti a. Ani chun a hniangah, “Dân lekhabua han inkan ân zia?” a ti a.

Dân hawipu chun Isua hniangah, “Lalpa ni Pathian chu ni lungril kapaiin, ni thlarau kapaiin, ni hrâtna kapaiin, ni lungvâr kapaiin ne hmangai ding a chang. Chun, nangma nên hmangai angka dênin ni tualbawm hei hom ne hmangai ding a chang,” a ti a. Isuan a hniangah, “Ne thung dik chute, mangkachun thaw inla dam ne tih,” a ti a.

Changhomsiala, dân hawipu chun thiam chang awiin Isua hniangah, “Ki tualbawm hei chu tuhei mawh an chang?” a ti a.

Isuan tekhin thu thephung hmangin a thung a, “Juda mi khatka Jerusalem khua aṭanga Jeriko khua tiang ân zin a.”

Lampuia a kal lai chun suamhmangin an loi rok a, a thil nei kapai chu an lâk pêk a, an vuak hrep a. Kachun an kal khal ta a.”

Ma hnunga chun Juda mi puithiam tûmaw chang chu ma lampuia chun a zu kal a. Ma sakhua mi puithiam hin an ivuak hrep pa chu a hmu chun lampui dang tiang a hêl a; ṭangpui inngai chu ṭangpui loiin a mâk khal a.

Hun tawika hnung chun Levia chi hom chu ma lampuia chun a zu kal ve ta a. (Levia chi chu Juda hnam, Temple a puithiam hei ruan ṭhin a chang) Levia hom chun an ivuak hrep pa chu lampui dang tiang hêlin a kal khal ve a.

A dota chun Samari mi khatka , ma lampui hong hraw ve chu a om a. (Samari mihei chu Juda hnam nih hnam dang kara piang, Juda thla hei an chang.) Chun, ma Samari mi chun an ivuak hreppa ha a zu hmu chun inriang a hmu ta fê a, a enkol a, a pang hliamhei chu a tuam pêk a.

Samari mi chun a dom a, a sabengtung chunga ân chuang a, khual bûka a kalpui a, a enkol ta a.

A tûka chun Samari mi chu ân zinna tiang chun a kaltir a ṭul a. Khualbûk vêngpu hnianga chun poisa a pêk a. Loi enkol inla, ma bâka ni sêng kapai chu ki hong kîr nawk tikin nang hong pe ke tih,” a ti a.

Isuan dân hawipu hnianga chun, “Ma inthumka hei laia chun suamhmang itong, an vuak hrepa ta ding chun tû chun mawh a tualbawm chang dingin ni ring?” a ti a. Dân hawipu chun, “Inriang hmupu chu” a ti a. Chun, Isuan dân hawi mi hnianga chun, “Kal inla, mangka dên chun va thaw ve rawh,” a ti a.

Luka 10:25-37 sûng aṭanga Bible Thu lâk suaka chang.