20. Sal Intângna nih an Kîr Nawkna thu

Juda nih Israel hei chu Pathian hma ah an loi insual ve ve a. Pathianinin Sinai tlânga thusawm pêk a pêk ha an zawm naw a. An sualhei insima Pathian hnianga kîr nawk dingin zawlnei hei a tir nawka, changhomsiala an ngaithlâk pêk awi chuang naw a.

Kachun an hmêlma heiin anin boiraltir theina dingin Pathianin ma hnam inhnika hei chu a hrem ta a. Isrelhei chu Asuria hnam hrât nih nunrawng fêka chun ân boiraltir ta a. Asuria sipaihei chun Israel tamkahei chu an that a, an thil hlu fe fêkahei chu an lâk pêk a, an ramhei hom chu an hâl pêk rît a.

Assuria sipaihei chun an hruaitu kapai , inchonghei, mi thawthei nih kut themthiam kapai hei chu a hman a, an ram Asuria ram tiang a țhuia. Mi țangkâi loi, mi châi heika chu Israel rama chun a mâk khal a.

Assuria sipaihei chun Israel ram lua dingin ramdang mi hei chu a hong țhui a. Putianga mihei chun khawpui an isiathei chu an siam țhat a, Israel mi țhui loia omhei chu nupuiin an neia, An thla hei chu Samari mi ei iti hei hi an chang.

Juda lalrama mipuihei chun, Pathian ring loihei nih a thu zawm awiloi Israel ram Pathianin a hrem zia chu an hmu a. Changhomsiala anni hei hom chun Kanan milem pathian chu an biak rêta. Pathianin anni hei chu ințhi a zil dingin zawlneihei chu a tir a.

Kum 100ka hnung vêla chun Assuria sipaihei chun Israel ram chu an siat rît a, Juda ram chu rûn dingin Pathianin Babulon lal Nebukadnezzara chu a tir nawk a. Babulon ram chu ram hrât fêka nih thilthawthei fêka a chang a. Juda lal chun kumtin sia tamka pe ding nih Nebukadnezzara siahlaw chang dingin ân pêk lût ta a.

Judahei chun Babulon mi hei chunga chun an hel ta a. Kachun Babulon mihei chun an hong thaw nawk a. Jerusalem khawpui chu an lâk pêk a, Tempul hom an siat pêk rît a, thil hlu fe fêka hei chu an lâk pêk rît a.

Juda lal chu a hel leiin Nebukadnezzara sipai hei chun a mithmu ngeia chuna nâihei chu an that pêk a, a mit hom an kher suak pêk a. Ma hnung chun lal chu Babulon tiang tâng ina khum dingin an țhui ta a.

Nebukadzezzara nih a sipaihei chun Juda mipuihei chu Babulon ram tiang an țhui a, a châihei chai chu grep rihuan enkolpu ding nih phâi thaw dingin an mâk a. Pathian hnamthlang Isrelhei chun Ram Tiam an lua thei loi hun chu sal an tâng sûngka pai chu a chang.

Anin sualna leia sala intâng changhomsiala Pathianin a mihei nih a thutiam chu ân hnil naw a. Pathianin a mihei chu a enzuitir a, zawlnei hei hmangin an hniangah thu ala hril ta tira. Kum 70 ka hnugin thutiam rama chun an la kîr nawk ding thu a loi intiam chu ala bawzui ta tira.

Kum 70ka hnung chun Persia lal, Kura chun Babulon ram chu a hong hne a. Persia mihei chu hrât fêka an changa, changhomsiala mi zâidam hnam an chang. Israel mihei chu Judahei tia koiin an om ta a, mi tamka chu Babulon rama chun an om song ta a. Ulian hei chai chunJuda ram chu an hawi maia.

Kura a hong inlal hnung hun tawika hnung chun thil la om ngai loi chu a hong om ta a. Juda hnam mi tupai Juda ram tianga kîr awi taphot hei chu kîr thei an tih ti a hong inpuanga. Tempul bawl nawkna ding tangka ai in a pêk a. Sal an tângna ațang chun mi hroikate chaiin Jerusalem tianga kîr awi chu an om ta a.

Jerusalem an tlung chun, ramdang opna hnuaia la om changhomsiala, Tempul nih kul banghei chu an siam țhat a, Ramtizam rama chun an om ta a. Tempula chun Pathian chu an biak thei nawk ta a.

II Lalhei Bung 17, 24-25, II Kronikul 36, Ezra 1-10, Nehemia 1-13 sûn aṭanga Bible chancing lâk suak a chang.